د اسلام مبارک دين له پيل څخه بيا تر دې مهاله؛ د ټولنيز ژوند، انساني اړيکې، د ټولنې د مختلفو قشرونو ترمنځ تعامل، سياسي او دولتي ارتباط، د حق دفاع او د باطل محوه… ټول د شريعت په مقدس او سپيڅلي چوکاټ کې، بيان شوي، تفسير شوي او عملي شوي دي.
حاکم؛ د الله تعالی د سپېڅلي شريعت اصلي او مسئول شخص دی، چې تر خپل حاکميت لاندې به د الله تعالی په مخلوق د غوره ژوند، هوساينې، ټولنيز عدالت او پرمختګ لپاره د رب تعالی شريعت تطبيق کوي. د عالیقدر امير المؤمنين صاحب فرامين د ټولنيز ژوند او عدالت يوازنۍ بيلګه ده، چې په لنډ ډول يې تر څو کوچنيو عنوانو لاندې خلاصه کوو.
شريعت؛
عالیقدر امير المؤمنين صاحب، په خپلو فرامينو کې د شريعت تفسير او تطبيق ته لومړيتوب ورکړی، د الله تعالی د سپيڅلي کلام او نبوي احاديثو ارشادات يې په عامه، ساده او مصلحه ژبه تفسير کړي، د غير شرعي فاسدو او ناوړه کارونو مخنیوی يې کړی.
عدالت؛
عالیقدر امير المؤمنين صاحب، په خپلو فرامينو کې د عدالت ټول اړخونه په پوره معنی او ښه شکل په پام کې نيولی، د شخصي، سمتي، ژبني او مقتدرانه نه تزادونو مخنوی يې کړی، د يو عادل حاکم لپاره يې لاره خلاصه کړې او د يو مظلوم محکوم غږ اوريدو ته يې لبيک ويلی، د عدالت هغه د شريعت غوښتنې اصل ته يې اوليت ورکړي.
ټولنيز ژوند؛
عالیقدر امير المؤمنين صاحب، د انساني ژوند دا مصروف او مغشوش حالت په نظر کې نيولی، د اسلام په اصولو کې د يو سالم، خپلواک او جامع ژوند ټول اصول يې خپل رعيت ته په يو جامع، شامل او کامل ليک کې، د انساني غوښتنو په نظر کې نيولو سره بيان کړي. هغه د ژوند په هره برخه کې د خپلو فرامينو په اساس داسې په وزن برابر او تول تللي ارشادات فرمايلي، چې په تطبيق به يې د عصر ټولې روانې او احتمالي فتنې دفعه شي.
اقتصاد او سياست؛
شيخ صاحب مبارک، اقتصاد ته د ژوند د يو مهم اړخ په توګه پاملرنه کړې، د ټولنې د هرې طبقې ضرورت او مجبوريت يې په نظر کې نيولی، د يو په ځان بسيا اقتصاد لپاره يې هر اړخيزه کوشش کړی،د ناروا را کړو ورکړو په مخنوي کې يې د زړه له تله کوشش کړی او داسې جامع او کامل فرامين او هدايت يې را ليږلي، چې هر اړخ يې په شريعت وزن شوی او تطبيق يې انساني ټولنه د خيرخواهی او ځان بساينې په لور بيايي.
د سياست مثال يې هم په ټوله نړۍ کې بې ساري دی؛ د مکې فتحې تاريخ يې ژوندی کړ، له نړۍ سره يې د تعامل لپاره اسلامي ارشادات تفسير کړل، غلام او بل واک سياست يې لغوه کړ او نړيوالو ته يې وښوده چې اسلام د سولې پخلاينې، له مظلوم څخه د دفاع او په ظالم د حق او عدالت پلي کولو نظام دی.
لنډه دا چې؛ د زړونو د رهبر هر فرمان د شريعت تفسير دی، چې د يو اسلامي نظام پټ شوي، ورک شوي، بدل شوي او استعمار شوي ټولنيز،نړيوال، اقتصادي او سياسي اصول يې په ښکلي او روان شکل د خپل ملت په واک کې ورکړل او د تطبيق لپاره يې ټولو مسئولو اړخونو ته لارښوونه وکړه، د ښه تطبيق او تعقيب په موخه يې له پوره صلاحيت څخه برخمنه اداره جوړه کړه، چې د هرې ادارې په چوکاټ کې شتون لري او ټول راپور يې له رهبري سره شريکوي.










































