د داعش رهبري چې د بعثی سیکولرانو او خوارجو څخه مشترکه جوړه وه په لاندې ډول وه.
۱- ابوبکر البغدادي، د داعش عمومي مشر، یا په اصطلاح خلیفه:
اصلي نوم یې ابراهیم عواد، یا ابراهیم البدري السامرایي و. نوموړي د بعثي حکومت تر چتر لاندې د بغداد اسلامي پوهنتون کې په اسلامي علومو کې دوکتورا کړې ده، او تر دې وروسته د صدام د حکومت تر سقوط پورې استاد او امام پاتې شوی دی.
نوموړي تر ۲۰۰۳م میلادي کال پورې د هېڅ اسلامي نړیوال جهادي خوځښت سره اړیکې نه درلودې، او نه هم تر دې وخت پورې په نړیوال خلافت او نړیوال جهاد باور درلود؛ ځکه بعثیانو ټول امامان او دیني استادان تر سختې څارنې لاندې نیول، او داسې چاته چې فقط یې جهادي او خلافتي فکر درلود، د استادي او امامت اجازه نه ورکول. عیناً لکه نن چې په عربي اماراتو، سعودي عرب او کویټ کې پر داسې عالمانو سخت بندیز دی.
بله خبره دا چې ابوبکر البغدادي سني عربي او د بدري قبیلې غړی و، خو داعش او سي ای اې د هغه لپاره کاذبه ادعا وکړه چې نوموړی د قریشي قبیلې څخه دی. حال دا چې یو واضح او ستر حقیقت دی چې بدري قبیله د عراق محلي قبیله وه، نه حجازي قبیله. هېڅ داسې سند نشته چې بدري قبیله دې د حجازي قبیلو او یا قریشو سره تړاو ولري.
۲- ابومسلم الترکماني:
اصلي نوم یې فاضل احمد عبدالله الحیالي و. د بغدادي معاون و، مخکې تر داعش د بعثي ګوند غړی، سیکولر او د صدام حسین د حکومت د پوځ جنرال و. د صدام د ځانګړو ځواکونو قومندان و او د بعث ګوند فعال غړی و.
۳- حاجي بکر:
اصلي نوم یې سمیر عبد محمد الخلیفاوي و، نوموړی په ظاهره د بغدادي مشاور و، مګر په حقیقت کې د داعش ټول واک د ده سره و، او د داعش د تشکیل، جوړښت او رامنځته کولو حقیقي مسؤل و. تر بغدادي یې د پردې تر شا واک ډېر و، همدا حاجي بکر و چې د داعش پروژه یې ډیزاین، پلان او شروع کړه. تر داعش مخکې نوموړی یو سیکولر بعثي و، د صدام حسین د پوځ ډګروال و، د صدام حسین د بعثي ګوند یو فعال غړی او د صدام د حکومت یو مهم استخباراتي افسر و.
۴- ابوعلي الانباري:
اصلي نوم یې عدنان اسماعیل نجیم وو، په داعش کې د بغدادي له خوا د سوریې مسئول او د بغدادي معاون وو، همدارنګه د بغدادي له خوا د نړیوال خلافت د خپرولو مسئول او په نورو هېوادونو کې د داعش سره د یوځای کېدونکو ډلو مسئول او همغږی کوونکی و. نوموړي د داعش په نړیوالتوب کې کلیدي رول درلود، تر داعش مخکې نوموړی یو سیکولر بعثي و او د صدام د بعثي حکومت د پوځ لوړپوړی او مهم جنرال و. همدارنګه د صدام حکومت کې د بعثي فکر د خپرولو او د پوځ د زده کړو او تعلیم مسئول و.
۵- ابوعبدالله الکردي:
د داعش د استخباراتو مهم غړی دی، تر داعش مخکې د صدام د پوځ د استخباراتو مهم افسر او د بعث ګوند فعال سیکولر غړی دۍ.
۶- ابواحمد العلواني:
د داعش د رهبرۍ مهم غړی دی، تر داعش مخکې د صدام د حکومت د استخباراتو مهم افسر او د بعث ګوند فعال سیکولر غړی وو.
۷- ابولقمان:
د داعش د رهبرۍ مهم او کلیدي غړی دی، تر داعش مخکې د بعث ګوند فعال سیکولر غړی او د صدام د حکومت استخباراتي افسر وو.
راځئ پوه شو چې د سیکولرانو تر څنګ، د داعش رهبرۍ کې څوک وو؟
۱- ابومحمد العدناني:
اصلي نوم یې طه صبحي فلاح و. د داعش ویاند، مهم غړی او په ساده اصطلاح د داعش مغز و. تر داعش مخکې د القاعدې د مجاهدینو څخه و، د ابو مصعب الزرقاوي تقبله الله نږدې ملګری و او د القاعدې د مشرانو سره یې بیعت درلود. خو العدناني د پخوانیو خوارجو په څېر د خپلو امیرانو څخه بغاوت وکړ، ټول اسلامي او جهادي خوځښتونه یې تکفیر کړل او د هغوی د قتل فتوا یې ورکړه.
العدناني د پخوانیو خوارجو په څېر ډېر ګستاخ و او د ټولو اسلامي خوځښتونو په اړه یې سپکه ژبه کاروله. او بالاخره یې الله تعالی هغه دعا هم قبوله کړه چې ویل یې: «ای الله! که موږ خوارج یو، موږ نیست او نابود کړه.»
۲- ابوعمر الشیشاني:
اصلي نوم یې تارخان باتیراشویلي و. د جورجیا هېواد تبعه و او د داعش دفاع وزیر، د جنګ مسئول او د داعش د رهبرۍ غړی و. نوموړی یو سرسخته افراطي سلفي او خوارجي فکر درلود او ده هم ټول مسلمانان، اسلامي خوځښتونه او جهادي حرکتونه تکفیر کړل، او په سوریه کې یې ډېر هغه مجاهدین شهیدان کړل چې د روس او د سوریې رافضي نظام پر ضد جنګېدل.
۳- ابوحمزه المهاجر:
نوموړی د بغدادي مهم مشاور او د داعش د رهبرۍ غړی و. خو تر داعش مخکې د القاعدې سره یې بیعت درلود او د ابو مصعب الزرقاوي تقبله الله څخه وروسته د عراق د القاعدې د برخې مسئول و. د تاریخي خوارجو په څېر یې د خپلو امیرانو څخه بغاوت وکړ، هغوی یې تکفیر کړل او خپل مشر، شهید ابوخالد السوري، چې د القاعدې د رهبرۍ غړی و، په شهادت ورساوه.
۴- ابو یمن العراقي:
دی د القاعدې غړی و. دوی ټولو بغاوت وکړ، خپل امیران یې تکفیر کړل، ټول اسلامي جهادي خوځښتونه او د ټولې نړۍ مسلمانان یې تکفیر کړل، او ډېر مجاهدین او عام مسلمانان یې شهیدان کړل.
