د سوریې د کورنیو چارو وزارت ویلي چې په پلازمېنه دمشق کې یې د داعشیانو پر پټنځایونو په عملیاتو کې دوه داعشیان قتل او شپږ نور ژوندي نیولي دي.
د نوي حکومت د کورنیو چارو وزارت په خبرپاڼه کې ویلي چې عملیات پرون دوشنبه (۲ سرطان/۲۶ ذوالحجه) د دمشق په حرستا او کفربطنا سیمو کې پر هغو کورونو ترسره شول چې داعشیان پکې پټ وو.
د خبرپاڼې له مخې، د عملیاتو په نتیجه کې د داعشیانو د یوې شبکې د مسؤل په ګډون شپږ کسان ژوندي ونیول شول او دوه نور یې ووژل شول. د مسؤلینو په وینا، په وژل شویو کسانو کې یو هغه و چې د مار الیاس کلیسا ته یې د بریدګر په دننه کولو کې مستقیمًا لاس درلود.
د سوریې امنیتي چارواکو زیاته کړې چې له پټنځایونو یې یو منفجر کېدونکی واسکټ او موټرسایکل، ماینونه، انفجاري مواد، وسلې او نور مهمات ترلاسه کړي دي.
د یادونې وړ ده، د سوریې امنیتي ځواکونو په دمشق کې د داعشي خوارجو پر پټنځای دا عملیات تر هغه وروسته ترسره کړي چې د یکشنبې په ورځ د مار الیاس په نوم کلیسا کې یوه کس ځان ته انفجار ورکړ او لسګونو کسانو ته یې مرګ ژوبله واړوله. د عملیاتو مسؤلیت مستقیمًا داعشیانو نه دی منلی، خو د سرایا انصار السنة په نوم یوې نوې جوړې شوې ډلې ویلي چې برید دوی ترسره کړی دی. دې ډلې د داعشي خوارجو له منهج او اعمالو ملاتړ اعلان کړی او فکر کیږي چې له خوارجو سره مستقیمې اړیکې لري.
