د ناوړه استفادې د پروسې پړاوونه
د څو هویتونو په کارولو سره د ټولنیزو مرستو د ترلاسه کولو بهیر معمولاً په یو شمېر منظم او محاسبه شوو پړاوونو کې ترسره کېږي. داعش پورې تړلې کړۍ د دې پړاوونو په مرسته د دولت له سیستم څخه پټ پاتې کېږي او په دوامداره توګه مالي عاید تر لاسه کوي. لاندې یې ذکر شوی دی:
۱- د څو جعلي هویتونو لپاره د مرستو غوښتنلیک ثبتول:
په لومړي پړاو کې، مجرم کسان د جعلي اسنادو په کارولو سره د بېکاري، کورنۍ ملاتړ یا نورو ټولنیزو فایدې پروګرامونو لپاره غوښتنلیکونه ثبتوي. هر هویت د یو “جلا شخص” په توګه سیستم ته معرفي کېږي، څو د مرستو لپاره د جلا دوسیې په توګه ومنل شي.
۲- د استوګنې جعلي پتې کارول:
د څار څخه د ځان د پټولو لپاره، د هر هویت لپاره یوه جلا پته ثبتېږي. دا پتې:
✓ یا د هغو ودانیو پتې وي چې څوک پکې نه اوسیږي،
✓ یا د پېسو په بدل کې د هغو کسانو پته کارېږي چې د خپلې پته د شریکولو اجازه ورکوي،
✓ او ځینې وخت د کاپي او ډېروالي لپاره جعلي کرایه لیکونه جوړېږي.
✓ دا کار د دې لپاره کېږي چې هویتونه د یو بل سره ونه تړل شي.
۳- د بېلابېلو بانکي حسابونو پرانیستل:
د هر هویت لپاره یو جلا بانکي حساب پرانیستل کېږي، څو مرستې په جلا ډول ورننوځي. بانکونه ډېری وخت یوازې په سطحي ډول اسناد ګوري او که اسناد لوړ کیفیت جعلي وي، نو حساب پرته له ژورې څېړنې پرانیستل کېږي.
۴- د بېلابېلو ادارو څخه د ټولنیزو مرستو ترلاسه کول:
کله چې هویتونه ثبت او بانکي حسابونه فعاله شي، نو د بېلابېلو ادارو له خوا لاندې مرستې ورته راځي:
✓ د بېکارۍ مرستې
✓ د کورني ملاتړ یا ماشومانو مرستې
✓ د کډوالۍ یا استوګنې ځانګړي امتیازات
✓ د بیړنیو ټولنیزو خدماتو نقدي ملاتړ
✓ ځکه چې هر هویت جلا پته او حساب لري، ادارې نه پوهېږي چې دا ټول یو واحد کس ته رسېږي.
۵- د ټولو عوایدو یو ځای کول او انتقال:
په پای کې ټولې مرستې په یو ځای جمع کېږي. دا کار معمولاً د منځګړو یا غیررسمي شبکو په وسیله ترسره کېږي. پیسې:
✓ نغدې کېږي
✓ یو ځای راټولېږي
✓ او د انتقال تر جوړې شوې لارې سیمې ته لېږدول کېږي
✓ په دې توګه د څو هویتونو په نوم ترلاسه شوې مرستې په یوه واحد مالي جریان بدلېږي چې د داعش شبکې یې د تمویل لپاره کاروي.
د مرستو د څو چنده ترلاسه کولو میکانیزمونه
د داعش مالي شبکې په لوېدیځو هېوادونو کې له دولتي ټولنیزو مرستو د ناوړه استفادې لپاره منظمې لارې کاروي. اصلي میکانیزم یې د جعلي هویتونو، څوګوني اسنادو او د ادارو د کمزوري همغږۍ څخه ګټه اخیستل دي. د دې له لارې هغوی د لاندې پروګرامونو څخه هممهاله مرستې ترلاسه کوي:
۱- د بېکارۍ مرستې (Unemployment Benefits)
د جعلي نومونو او اسنادو په وسیله څو ځلې د بېکارۍ ثبت کول، په داسې حال کې چې ځینې یې په مخفی ډول کار کوي او عاید هم لري.
۲- د ماشوم او کورنۍ مرستې (Child / Family Benefits)
شبکې ځینې وخت د جعلي کورنیو جوړښتونه، جعلي ماشومانو یا تکراري اولادونو نومونه کاروي ترڅو د زیات شمېر کورنیو مرستو ته لاسرسی پیدا کړي.
۳- د معلولیت او ملاتړ پروګرامونه (Disability / Support Schemes)
د جعلي طبي راپورونو، د خیالي ناروغیو او د ناسم معلولیت اسنادو له لارې د معلولیت میاشتنۍ پیسې تر لاسه کېږي.
۴- د استوګنې ملاتړ (Housing Allowances)
یو شخص په څو نومونو د بېلابېلو سیمو لپاره د کور کرايې مرستې اخلي؛ ځکه د ښاروالیو او ټولنیزو ادارو تر منځ همغږي ډېره کمزورې ده.
۵- نور ټولنیز عامه پروګرامونه
لکه:
✓ د انرژۍ سبسایډي
✓ د روغتیا لګښتونو ملاتړ
✓ د بیړنیو حالاتو مرستې
د شبکې غړي په څو هویتونو سره په بېلابېلو ولسوالیو کې ورته مرستې اخلياو داسې ښکاري چې دا بېلابېل اشخاص دي.
