مولوي مستغفر الحنفي
خوارج چې اصل کې په منځني ختیځ او شاوخوا سيمو کې د امریکا او اسرائیلو د ګډو ګټو د ساتنې لپاره جوړ شوي، خو ډېری وخت د نړۍ د نورو ملکونو استخبارات يې هم د پیسو په بدل کې د خپلو ګټو لپاره استعمالوي.
یانې خوارج داسې دي لکه یوه تجارتي جنګي کمپنۍ او شرکت چې په ملکونو انسانان پلوري او پېسې يې لاسته راوړي، یا هم لکه د څو پيسو په بدل کې د یو چا وژل او اختطافول.
خو لنډه دا چې د امريکا د بليک واټر د پوځ یوه برخه داعشي خوارج دي، خو له امریکایي بلک واټر سره يې فرق دا دی چې دوی په اسلامي ړندې افراطي مفکورې روزل شوي او امریکایي بلک واټر د خوارجیت مفکوره نلري.
نور د دوی او د هغوی ترمنځ هیڅ فرق نشته، دوي هم د کفارو یو جنګي کمپنۍ ده، هغوی هم…
نو داچې موږ ته ثابته شي چې خوارج د امریکا او اسرائیلو ګټې ساتي، او ترڅنګ يې مافیایي او تجارتي کړۍ هم ده، نو لومړی په منځني ختیځ کې د امريکا ګټې او خوارج، دوهم په منځني ختیځ کې داسرائیلو ګټې او خوارج، دریم د خوارجو مافیایي او تجارتي جنګونه مطالعه کوو.
۱_: خوارج او په منځني ختیځ کې د امريکا ګټې:
داچې منځنۍ ختيځ یو له خورا ستراتیژیکو او طبیعي منابعو څخه ډکه سیمه ده او امریکا یو بدماش نړیوال زبرځواکی قدرت ده، چې غواړي ټولو هغو سیمو کې شتون ولري، کوم چې زيات طبیعي منابع لري او شتمنۍ او منابع يې باید لوټ کړي.
نو په همدې ډول په منځني ختیځ کې د امریکایانو شتون امریکا ته له ډېرو اړخونو اړین ده، خو په منځني ختیځ کې د امریکایانو شتون هغه وخت دوامداره پاتې کېدلای شي چې کله په منځني ختیځ کې يو پايدار او مستحکم دولت شتون ونلري او په دوامداره توګه ګډوډي وي، بیا هم که چېرته کوم پایدار دولت شتون لري نو هغه به خامخا د امریکا غلام وي لکه اسرائیل یا مصر…
که چېرته په منځني ختیځ کې کوم خود مختاره قوي دولت جوړ شي، نو خامخا د امریکا شتون ته خطر پېښوي، نو ځکه د امریکا د شتون لپاره د فشار ډلې او ګډوډیو ته ضرورت دی.
دا چې د منځني ختیځ خلګ مسلمانان دي، نو باید دا ګډوډي د اسلامي جهاد او د نورو ډول ډول شرعي خوځښتونو په نامه پیل شي.
اوس که په منځني ختیځ کې دا ګډوډي د یوې خود مختاره اسلامي جهادي ډلې لخوا جوړه شي، نو هغه ډله به هم د امریکا شتون ته خطر پېښوي، لکه د القاعدې مجاهدین؛ نو د دې لپاره چې په منځني ختیځ کې د امریکا شتون ته هیڅ نوعه خطر پېښ نشي، نو د اسلامي جهاد په نوم داسې يوې ډلې ته ضرورت دی چې هم د منځني ختیځ دولتونو سره وجنګېږي، هم له دغو خود مختاره مجاهدینو سره وجنګیږي او هم په پټه توګه د امریکا ګټې خوندي کړي، چې هغه ډله داعشي خوارج (لعنت الله علیه اجمعین) ده.
امریکا په منځني ختیځ کې داسې یو حالت روان کړی، داعش يې نړېوالو ته داسې معرفي کړی، لکه دوی (داعش) چې دومره يو لوی قدرت وي، چې ټولې نړۍ ته خطر وي.
نړېوالو ته وايي، چې موږ ځکه په منځني ختیځ کې نظامي اډې جوړې کړي، چې نړۍ د داعش له خطر څخه وساتو، که زموږ نظامي اډې په منځني ختیځ کې شتون ونه لري، نو داعش به لومړی عربي ملکونه بیا ټوله نړۍ وخوري.
امریکا د عربي نړۍ ملکونو ته وايي، که غواړئ چې د داعش له خطر څخه خوندي شئ، نو موږ ته په خپلو ملکونو کې نظامي اډې راکړئ، ګنې ستاسې له داعشي خوارجو څخه ستاسې خوندي پاتې کېدل ډېر سخت دي، نو همدا خبره ده چې د عربي نړۍ په ملکونو کې نه یواځې دا چې ځای يې مفته ورکړی، بلکې سربیره پردې په منځني ختیځ کې د امریکا نظامي اډو مصارف او کرایه هم عربي ملکونه پرې کوي، نو دا خلګ يې په چا ډار کړي؟
اوس به پوه شوي ياست چې په داعشي خوارجو؛ نو داچې یو طرف ته امریکا د داعشو د فشار څخه په استفادې د منځني ختیځ نیم ملکونه خپل غلامان ګرځولي او د دوی له ستراتيژيک موقعیت او طبیعې منابعو څخه مفته استفاده کوي، بل طرف ته په کومو ځمکو کې چې داعشي خوارج نفوذ لري د هغو ځمکو طبیعي منابع هم په غیر مستقیم ډول د امریکایانو د ګټې لپاره استعمالېږي.
هغه داسې چې امریکایان او اسرائیل ځیني داسې تجارتي کمپنۍ لري چې په راس کې يې یهود دي، خو ظاهراً هیڅ داسې نه ښکاري چې دا به یهودي کمپنۍ وي، نو د داعشي خوارجو له لاس لاندې ځمکو څخه ټولې طبیعي شتمنۍ او قیمتي زیورات دغه کمپنۍ لوټوي.
یو متل ده؛ “اوبه خړې کړه، ماهیان ونیسه”، امریکا هم په منځني ختیځ کې له همدغه فارمولې څخه استفاده کوي.
نو په منځني ختیځ کې د خوارجو لومړی ګټه امریکا ته دا ده، چې امریکایانو د همدوی شتون د خپل شتون لپاره دلیل ګرځولی او دوی (داعشيانو) امریکایانو ته داسې زمینه سازي کوي ترڅو امریکایان د منځني ختیځ شتمنۍ په مکمل ډول لوټ کړي.
امريکايانو ته د داعشي خوارجو دوهمه ګټه:
د داعشي خوارجو دوهمه ګټه امریکایانو ته دا ده چې په منځني ختیځ کې هغه با نفوذه دولتونه وبېروي، کوم چې د امریکایانو د ګټو خلاف دي، چې ښه مثال يې موږ ایران او د ایران نیابتي ډلې ورکولای شو.
ایران یو له هغو هېوادونو څخه دی چې په منځني ختیځ کې د امریکا او اسرائیلو شتون ته خطر دی، نو د دې لپاره چې ایران امریکا ته مشکلات جوړ نکړي باید امریکا ایران ته مشکلات جوړ کړي.
نو له همدغې وجې د داعشي خوارجو په عقیده شيعه مذهبه خلګ د نړۍ تر ټولو سخت کفار دي.
داعشي خوارج ځکه د شیعه ګانو باره کې داسې شدیده عقیده لري چې ایران شیعه مذهبه دي، بالفرض که ایران شافعي مذهبه وای، نو داعشي خوارجو به خامخا ویل چې شافعي مذهبه خلګ د نړۍ تر ټولو سخت کفار دي (العياذ بالله).
دا د دې لپاره چې داعش ته اصلاً اسلام او مذهب کوم اهمیت نلري، هغوی ته د امریکا ګټې اهمې دي، کوم خلګ چې د امریکا د ګټو خلاف دي هغه هم مشرکین دي لکه ایران، هم مرتدین دي لکه د افغانستان اسلامي امارت (نعوذ بالله)، خو حال داچې د داعشي خوارجو مشرانو کې يهوديان هم شته دي.
نو د داعشي خوارجو د جوړښت څخه د امریکایانو دوهم هدف دا دی، چې په منځني ختیځ کې ایران او ایران پلوه ډلې پرې وځپي.
امریکايانو ته د داعشي خوارجو درېمه ګټه: امریکایانو ته د داعشي خوارجو درېمه ګټه د اسلام بدنامي ده، داچې امریکایان د اسلام سرسخته دښمنان دي، نو د اسلام په تحریف او بدنامۍ هم له نورو ډېر زيات خوشحالېږي، بل خوا داعشي خوارج د اسلام په نوم بغير له وحشت او دهشت څخه بل څه نه کوي، چې پدې سره د اسلام مبارک دین حقانیت او رحمانیت ته سخته ضربه رسېږي.
۲_: د داعشي خوارجو ګټې اسرائیلو ته:
په منځني ختیځ کې د امریکا او اسرائیلو ګټې مشترکې دي، نو خوارجو چې کومې ګټې امریکا ته رسېږي هغه اسرائیلو ته هم رسېږي، خو اسرائیلو ته يې یوه اضافي ګټه هم رسیږي هغه دا چې د اسرائیلو حکومت په يو داسې موقعیت کې شتون لري چې چار چاپیره ترې ټول دښمن دولتونه دي، نو دغه دښمن دولتونه که په کرار او آرام سره پرېږدي، نو دوی یوه ورځ خامخا په اسرائیلو حمله کوي او یا هم د اسرائیلو دولت ته مشکلات جوړوي، نو د دې په خاطر چې اسرائیلي دولت امن او آرام کې پاتې شي، د اسرائیلو په مخالفو همسایه ملکونو کې باید ګډوډي او جنګونه پېښ شي، ترڅو هغوی دې ته فارغه نشي چې اسرائیلو ته مشکل جوړ کړي لکه سوریه، عراق، سپاه پاسداران، حماس، حزب الله او داسې نور…
دغه ټولې ډلې او دولتونه د اسرائیلو د دولت شتون نه خوښوي، نو ځکه داعشي خوارج دې ټولو سره د دوی د دښمنۍ په اندازې جنګېږي، د مصر دولت چې کله کله لږ لږ اسرائیلو سره خلاف کېږي، نو داعشي خوارج هم کله کله لږ لږ له مصر سره هم سرحد کې جګړه کوي.
خو بل خوا چې یهود تر ټولو شدید کافران دي خوارج هیڅ خطر نه ورته پېښوي او نه هم د امریکایانو نظامي اډو ته کوم مشکل پېښوي، نو د دې لپاره د اسرائیلو د دولت د شتون او ساتلو برخه کې داعشي خوارج ډېر مهم دي، چې دوی د یهودو له ټولو دښمنانو سره جګړه کوي.
خلاصه دا چې داعش د اسلام په نوم او د اسلام په جامه کې د اسرائیلو د دولت ساتنه هم کوي.
۳_: داعشي خوارج او د دوی تجارتي جنګونه:
داعشي خوارج خو په اصل کې د دې لپاره رامنځته شوي چې په منځني ختیځ کې د امریکایانو او اسرائیلو ګټې وساتي، خو د دې ترڅنګ د نړۍ د نورو ملکونو له استخباراتو سره هم د پیسو په بدل کې فعالیتونه کوي، چې ښه مثال يې موږ د تاجکستان او د افغانستان د اسلامي امارت ترمنځ مسئلې کې وینو.
د جمهوریت وخت کې تاجکستان افغانستان ته نه کوم خوارج رالېږل او نه يې کوم مشکل ورته جواړوو، خو کله چې اسلامي امارت حاکم شو، نو تاجکستان له اسلامي امارت سره د ځینو مسايلو په سر اختلاف کې شو، اوسمهال اکثریت خوارج د تاجکستان لخوا راځي او دلته د جهاد په نوم خپل ناوړه فعاليت او تروریستي کړنې کوي، حال دا چې د تاجکستان نظام يو سوچه کفري نظام دی.
نو مسئله داسې ده چې د تاجکستان حکومت داعشي خوارج او د دوی مفکوره خریداري کړې ده، یانې تاجکستان حکومت داعشي خوارجو سره داسې تړون کړی چې موږ به پېسې درکوو، تاسې خلګ راکوئ چې افغانستان کې موږ خپل اهداف پرې وساتو.
له دې سربېره هر ملک کولای شي چې داعشي خوارج د پیسو په بدل کې د خپلې ګټې لپاره استعمال کړي.
لکه هند کولای شي چې داعشي خوارج خریداري کړي او د پاکستان په مقابل کې يې وجنګوي، پاکستان هم کولای شي چې خوارج خریداري کړي او د هند په مقابل کې يې وجنګوي، همداسې او کراین کولای شي چې داعشي خوارج خریداري کړي او د روس په مقابل کې يې وجنګوي.
خلاصه دا چې داعشي خوارج هم د امریکایانو نورو جنګي او مافیایي کمپنيو غوندې یو کمپني ده، خو هغوی سره يې فرق دا ده چې خوارج چې چا سره جنګېږي، نو لومړی یو ښه کلکه د کفر ټاپه هم پرې ولګوي، نور هیڅ فرق له نورو امريکايي جنګي کمپنیو سره نلري.
الله ﷻ دې ټول مسلمانان د خوارجو له شر څخه وساتي. آمین
وماعلینا الاالبلاغ
