په اسلام کې جهاد یو روښانه او سپېڅلی مفهوم دی، چې څرګند شرعي احکام، ټاکلي حدود او لوړ اهداف لري؛ د دغو اهدافو له جملې څخه یې د دین ساتنه، ځان، انساني کرامت او د عدالت ټینګښت یادولی شو. خو په اوسني عصر کې، د داعش په څېر ډلو دا لوړ او سپېڅلی مفهوم تحریف کړی او د جهاد تر نوم لاندې یې تاوتریخوالی، وژنې او ویجاړۍ توجیه کړې دي.
په حقیقت کې، هغه څه چې د اسلام دغه ناوړه ډله (داعش) نن ترسره کوي، جهاد نه؛ بلکې د دین په جامه کې یو څرګند عقیدوي انحراف دی. جهاد په اسلامي شریعت کې د ځانګړو شرایطو، ټاکلو مقاصدو او مشروع مشرتابه تابع دی او هېڅکله دا معنا نه لري چې د بېګناه انسانانو وژنه، د مسلمانانو تکفیر او د ټولنو ویجاړول، لکه څنګه چې دې ډلې په وروستیو کلونو کې ترسره کړي، جهاد وبلل شي.
داعش، جهاد د خپلو سیاسي او فکري موخو د تحقق لپاره په یوه وسیله بدل کړی او هغه یې له اخلاقو، عقل او د شریعت له مقاصدو بېل کړی دی. د دې ډلې یو شمېر غړي، چې د داعش له اصلي ماهیت او حقیقت څخه ناخبره دي، د آیتونو او احادیثو په ټاکنیز او جزوي استناد سره، له دین څخه یو سطحي او افراطي فهم وړاندې کوي.
باید ټوله نړۍ وپوهول شي چې هغه تاوتریخوالی او ترهګریزې پېښې، چې د ښځو، ماشومانو او سپینږیرو د وژنې لامل ګرځي، زموږ په دین کې هېڅ ځای نه لري او ترې په بشپړ ډول لرې دي. هغه کسان چې دا ډول اعمال ترسره کوي، لازم ده د اسلامي علماوو لهخوا په ښکاره توګه وغندل شي او د دغسې توندلارو او افراطي افکارو مخه د هرې ممکنې لارې ونیول شي.
خلاصه دا چې، د داعش د ستونزې اصلي ریښه د دین د فهم په عقیده او منهج کې انحراف دی. دا ګمراهه ډله، تکفیر په پراخه، بېضابطه او افراطي بڼه کاروي؛ تر دې چې نږدې نوي سلنه مسلمانان او د اسلام حقاني علما تکفیر کوي. دوی په ډېر آسانه د مسلمانانو وینه مباح ګڼي او د خپل ظهور له پیل څخه تر نن پورې یې ټول تمرکز د مسلمانانو په نابودۍ ولاړ دی او دا هر څه د ځان لپاره جهاد بولي.
دا ډول اعمال په څرګند ډول د اسلام د لومړي عصر له خوارجو سره ورتهوالی لري؛ هماغه ډله چې رسول اکرم صلیاللهعلیهوسلم یې د اهل افراط او د حق له لارې د وتلو معرفي کړي دي. د داعش کړنو نه یوازې دا چې د زرګونو بېګناه انسانانو د وژنې او بېکوره کېدو لامل شوې دي، بلکې د اسلام سپېڅلې څېره یې په نړیواله کچه زیانمنه کړې؛ او د اسلامي امت د تفرقې او کمزورۍ زمینه برابره کړه.
داعش د جهاد له سپېڅلي نوم څخه په ناوړه ګټه اخیستنې سره، له اسلام سره تر ټولو لوی خیانت ترسره کړی دی.
ریښتینی جهاد د شریعت په چوکاټ کې دی، نه په افراط، تکفیر او وینې تویولو کې. د دیني پوهاوي پیاوړتیا او د اسلام د سم، متوازن او اصیل فهم پر لور بېرته ستنېدل، د دغسې خطرناکو انحرافي ډلو پر وړاندې د مبارزې یوازینۍ اغېزمنه لار ده.
