ما هغې ناواده شوې ته د نکاح پیغام ورکړ، په مهر کې مې توري نېزې او مهارت لرونکي آس سپاره ورکړل، هغه نېزې چې د غنمو رنګ یې درلود د مهر په توګه ومنل شوې، هغې ته د سپينې کلا د ناوې حیثیت ورکړل شو، الله اکبر! الله تعالی ډېر لوی دی، د هغو ونو میوه چې ته یې خوښوې، ستا له تا څخه دمخه ستا عزتمند پلار کرلې دي.
د مصر د سلطان په لیک کې راغلي دي:
الله اکبر! هذا النصر والظفر، هذا هو الفتح، لا يزعم البشر.
«الله اکبر! دا فتحه او بریا هغه کامیابي ده چې د انسانانو له ګمان او تصور پورته ده.»
د مصر د سلطان د شاعر وینا د قسطنطنیې د فتحې په مناسبت:
په همدې ډول باید د الله تعالی د رضا لپاره لوړې ارادې وي، ګنې تېزې تورې له دستمالونو نه بېلېږي. ستا لښکر هغه دی چې آسونه یې د لوی بحر په څېر دي، چې څپې یې وېره خپروي، هغه لښکر چې د بریا بیرغ یې له څلورو خواوو چاپېره کړی دی. دا بیرغ د بریا نښه ده، بلکې بریا او کامیابي د دې لښکر غلامان او خدمتګاران دي.
ای د اسلام مرسته کوونکې! ای هغه چې د یرغلونو داستان به دې تر وروستیو د زمانې د کتاب په هره پاڼه رسم وي!
تاته دې دا بریا مبارک وي. د ځمکې پر مخ به د دې بریا یاد د هغو ورځو په څېر تلپاتې وي چې وسوځېږي، نو د سبا او ستورو منزلونه د دې لپاره تعریف کوي.
د سلطان محمد فاتح لیک د مکې شریف په نوم:
سلطان محمد د مکې شریف په نوم یو لیک ولیکه، په هغه کې یې د فتحې د زېري په ورکولو سره د دعا غوښتنه وکړه، د دې لیک ترڅنګ یې قیمتي تحفې هم واستولې. د لیک څو کرښې په لاندې ډول دي:
په پیل کې د مکې مکرمې شریف ستاینه کوي، بیا یې لیکلي دي:
«موږ دا لیک ځکه درواستاوه چې تاسې ته د هغې فتحې زیری درکړو چې خدای تعالی پرې په دې کال کې ونازولو، دا یوه له هغو بریاوو څخه ده چې نه کومو سترګو لیدلې وه او نه کومو غوږونو یې په اړه اورېدلې وه. دا د قسطنطنیې د سیار مشهوره بریا ده، له تاسې هیله کوو چې د دې خبر په ترلاسه کولو سره خوښي وکړئ او ستاسې ترڅنګ د حرمینو اوسېدونکي، علما، نیک خلک، زاهدان، عبادت کوونکي، شیخان، پرهېزګار امامان، لوی او واړه ټول خوښي څرګنده کړي.»
هغه خلک چې د بیت الله شریف د غلاف لمنه نیسي، یعنې د کلکې عقیدې خاوندان چې هېڅکله نه ماتیږي، هغه چې د زمزم او مقام ابراهیم څښتنان دي، هغه چې د رسول الله صلی الله علیه وسلم په ګاونډ کې اعتکاف کوي، هغه چې په عرفات کې زموږ د امپراتورۍ لپاره د الله تعالی په دربار کې زارۍ کوي، الله تعالی دې د هغوی د برکتونو له امله پر موږ د رحم او کرم بارانونه نازل کړي او د هغوی درجې دې لوړې کړي.
زه د استازي په لاسونو تاسې ته دا ډالۍ درلېږم، دا ډالۍ یوازې ستاسې لپاره ده: د سرو زرو بشپړ وزن فلوري، د غنیمت مال، یو تېز رفتار آس. اووه زره فلوري یوازې د غریبانو لپاره دي، دوه زره د سردارانو او مشرانو لپاره، زر د حرمینو د ځانګړو خادمانو لپاره دي، پاتې د مکې او مدینې د اړمنو لپاره دي، زما له تاسې دا هیله ده چې دا پیسې به د اړمنو خلکو ترمنځ د اړتیا په کچه ووېشئ.
له ټولو خلکو مې غوښتنه ده چې موږ دې تل په دعاوو کې یاد وساتي او پر موږ دې مهرباني او احسان وکړي. الله تعالی دې ستاسې ساتنه وکړي او تر قیامته پورې دې تاسې ته نېکبختي او د عزت سرداري درکړي.
