که څه هم د داعش منفورې ډلې او صهیونیستي رژیم ترمنځ په ظاهري توګه کومه رسمي او ښکاره اړیکه نشته، خو په تېرو کلونو کې ګڼ شمېر شواهد او ژور تحلیلونه خپاره شوي، چې د دې دواړو ترمنځ د ګټو همغږي او د اهدافو یووالی یې په ځانګړې توګه د اسلامي هېوادونو د بحران جوړونې او د جهادي ډلو د کمزوري کولو په برخه کې څرګند کړي دي.
سره له دې چې دواړه له بڼه او جوړښته توپیر لري، خو د زمانې خوارج (داعش) او صهیونیستي رژیم په ډېرو مواردو کې ګډې ګټې لري او که څه هم د یو بل څخه بېل عمل کوي، خو په یو مسیر کې روان دي، دلته به د هغو ناوړو کړنو څو مهمو بېلګو ته، په لنډو کې اشاره وکړو:
۱- د واقعي اسلام پر ضد برید:
د زمانې خوارج (داعش) د ړوند تاوتریخوالي، تکفیر او غیرانساني کړنو له لارې نړۍ ته یو زشت، دروغجن او تحریف شوی انځور له اسلامه وړاندې کړی دی؛ دا هغه انځور دی چې دقیقاً د صهیونیستي رژیم او د لویدیځ د زهري اسلامضد تبلیغاتو له اوږدمهالو اهدافو سره سمون لري.
د اسلام د خشن او تاوتریخجنه څېره خپرول، د صهیونیستي حاکمیت په ګټه تمامیږي، له همدې امله، هغوی تل هڅه کړې چې اسلامي نړۍ د کفر د خاورو لپاره یو احتمالي تهدید معرفي کړي.
۲- له جهادي ډلو سره دښمني:
داعش، سره له دې چې ادعاوې یې ځان د اسلام ساتونکی ښيي، خو عملاً یې تر هر چا ډېر د جهادي ډلو پر وړاندې جګړه کړې ده، هغو ډلو سره چې د اسرائیلي سیاستونو سره په مخامخ تقابل کې دي.
په هر ځای کې چې یوه ډله یا اسلامي غورځنګ د صهیونیستي رژیم پر خلاف راپورته شوی، بېځنډه خوارجو هم سر را ښکاره کړی او د یادو ډلو پر وړاندې یې جګړه پیل کړې، داسې چې ته به وایې د صهیونیستي رژیم له خوا استول شوي وي.
۳- د اسلامي هیوادونو تجزیه:
شک نشته چې د صهیونیستي رژیم له ستراتیژیکو اهدافو څخه یو دا دی چې د «نوي منځني ختیځ» یا د «برنارد لویس» د طرحې پر بنسټ، ستر اسلامي هېوادونه په کوچنیو، بېوسه دولتونو وویشي.
داعش هم، د خپل ادعایي خلافت په جوړولو سره، په عراق، شام او نورو اسلامي هېوادونو کې دا پروژه نوره هم پیاوړې کړه، او د مرکزي دولتونو د کمزوري کولو لپاره یې عملي ګامونه پورته کړل، که د دواړو (داعش او صهیونیستي رژیم) کړنې له نږدې وګورو، نو بېشکه دا ګډ خصوصیات به مو پام ځان ته راواړوي؛ لکه:
۱- د بېګناه ولس وژنه:
صهیونیستي رژیم او هم د زمانې خوارج (داعش)، دواړه د ولسي، بېوسه خلکو په وژنه کې ښکېل دي، دوی په مکرر ډول د بزدلانه عملیاتو له لارې، سپینسرې، مېرمنې، ماشومان او حتی شیدېخواره ماشومان هم وژلي او دا ناوړه کړنې یې د ستر بریالیتوب په توګه معرفي کړي.
۲- د دیني مقدساتو بېحرمتي:
داعشي خوارج د مسجدونو، زیارتونو او دیني ځایونو په الوزولو او د بېګناه مسلمانانو په وژلو سره او صهیونیستي رژیم د مسجدالاقصی پر وړاندې یرغلونو او د غزې د مسجدونو په بمبارۍ سره، د اسلامي مقدساتو درناوی تر پښو لاندې کړی.
۳- رسنیزه او رواني جګړه:
دواړه فتنې، یعنې داعش او صهیونیستي رژیم، له رسنیو او مجازي نړۍ نه پراخې ګټې اخلي، څو پر عامه ذهنیتونو اغېز وکړي، ویره خپره کړي او خپل زهرجن اهداف مخ ته یوسي، په پای کې باید وویل شي، هغه څه چې د دې دوو قسم خوړلو دښمنانو ـ یعنې داعش او صهیونیستي رژیم ـ له کړنو او اهدافو را جوتیږي، یوه تريخ خو نهردېدونکی حقیقت دی:
داعشي خوارج او صهیونیستي رژیم، که څه هم په ظاهر کې بېل دي، خو په میدان کې لکه د قیچي دوه لوري، د اسلامي امت پر پرې کولو یو بل ته مټ ورکړی دی.
