څو ورځې وړاندې د ملګرو ملتونو د تحلیلي حمایې او بندیزونو د څار ټیم خپل ۳۵ راپور امنیت شورا ته وړاندې کړ. دا راپور د داعش، القاعده او نورو ډلو د وضعیت په تړاو یاد ټیم په کال کې دوه ځله خپروي او اوسني راپور یې د ۲۰۲۴ز له نیمايي بیا د ډسمبر تر پایه پورې وضعیت څېړي.
په راپور کې ویل شوي چې د پاکستان امنیتي ادارو د داعشي خوارجو درې مهم مشران په تېر اوړي کې نیولي او په دې ډول یې په پاکستان کې د مرکزیت جوړولو لپاره د داعشیانو د خراسان څانګې هڅې له خنډ سره مخ کړې. د نیول شویو داعشي مسؤلینو نومونه عادل پنجشېری، کاکا یونس ازبکستانی او ابو منذر تاجکستانی ښوول شوي دي.
د پاکستان امنیتي ادارې معمولًا داسې لاسته راوړنه پټه نه ساتي، خو دا چې د خپلو رسنیو پرځای یې دا خبره د ملګرو ملتونو د بندیزونو د څار ټیم په خوله کې ورکړې، نو ممکن څو علتونه ولري.
په افغانستان کې د اسلامي امارت د امنیتي ځواکونو له لوري تر سختو عملیاتو وروسته، د خراساني خوارجو رهبري پاکستان ته وتښتېده او په بلوچستان او خیبر پښتونخوا کې یې ځان ته مراکز جوړ کړل. ملګرو ملتونو، نړیوالو خبري اژانسونو او پخپله د پاکستاني پوځ له لوري تمویلېدونکو مطبوعاتي چېنلونو هم د دې راپورونو تایید کړی دی.
د پاکستاني رژیم امنیتي ادارې چې اوس د پنجشیري، یونس او ابو منذر د نیولو ادعا کوي، دا پخپله د المرصاد او نورو ادرسونو پر هغو راپورونو د تایید مهر لګوي چې خراساني خوارجو خپل مرکزیت پاکستان ته انتقال کړی او له هغه ځایه په سیمه او نړۍ کې بریدونه تنظیموي. هېره دې نه وي چې عادل پنجشیری او ورسره ملګري د ایران په کرمان کې د هغه برید پلانوونکي او تسهیلوونکي بلل کیږي چې د ۲۰۲۴ز کال د جنوري میاشتې په دریمه نېټه ترسره شوه او نږدې ۴۰۰ کسانو ته مرګ ژوبله پکې واوښته. په پاکستان کې د دوی نیول کېدل د دې ثبوت دی چې د کرمان برید هم له بلوچستانه طرح شوی و او پاکستاني استخباراتو ځان ته د اوړو د پزې جوړولو لپاره نیولي دي. (د امنیتي سرچینو له قوله، عادل پنجشېري د ۲۰۲۰ز کال د نومبر په ۲یمه نېټه پر کابل پوهنتون برید پلان کړی و او ابو منذر تاجکستاني د مسکو د کروکوس هال برید په پلانولو کې نقش درلود.)
ډېر امکان شته چې پاکستان عادل پنجشېری په دې نیت نیولی وي چې له ایران سره د بلوڅ بېلتونپالو د ځینو مطلوبو غړو پر سر یې تبادله کړي او خپلې موخې ته ځان پرې ورسوي.
د کرمان د برید اصلي طراح د طارق او عبدالله په مستعارو نومونو یو تاجکستانی وګړی و، چې في الحال هم د پاکستان په بلوچستان ایالت کې اوسیږي، خو پاکستاني رژیم د ملګرو ملتونو د بندیزونو د څار ټیم ته ادعا کړې چې نوموړی په افغانستان کې دی او هلته فعالیت لري. طارق د کرمان د برید ترڅنګ د کندهار د تېر کال د مارچ میاشتې برید هم طرحه کړی و، بریدګر اسدبیګ مادیاروف ته یې د بلوچستان په کمپونو کې روزنه ورکړې وه او بیا یې له بلوچستانه کندهار ته رالېږلی و.
پاکستان کوښښ کوي چې په بلوچستان او خیبر پښتونخوا کې تر خپل نظر لاندې د داعشیانو له فعالو مرکزونو د نړیوالو پام واړوي، خو د هرې ورځې په تېرېدو سره نور هم رسوا کیږي او خپلې ادعاوې ورباندې ثبوت شي. که د بلوچستان او خیبر پښتونخوا د داعشیانو مرکزونو ته پام ونشي، لیرې نه ده چې سیمه د کرمان، کندهار، کابل او نورو ځایونو په څېر د خونړیو بریدونو شاهده واوسي.
