حکمراني د نفوذ او محبوبیت په معنا هم ده، حکمراني یوازې پر خلګو او خاورې د واک او اقتدار مفهوم نه دی؛ داعش نه یوازې چې نشي کولای پر افغان ولس حاکمیت او حکمراني وکړي، بلکې د اولسونو تر منځ نفوذ او محبوبیت هم نشي ترلاسه کولای، د همدې اړوند مو د داعش د وحشتونو بحث درلود، چې تېره برخه کې مو په سوریه کې د داعش ځینې وحشتونه یاد کړل، دلته په افغانستان کې د داعش پر وحشي کړنو او بربریتونو غږيږو.
په ننګرهار کې د داعش وحشتونه:
داعش په ۲۰۱۵ مېلادي کال په ننګرهار کې ظهور وکړ، ننګرهار د علم او فرهنګ ښار دی چې یوه اوږده تاریخي او فرهنګي مخینه لري، داعش له خپل ناوړه ظهور سره سم د ننګرهار په بیلابیلو والسوالیو، سیمو او کلیو کې جنایتونه پیل کړل، د مجاهدینو په وړاندې ودرېدل او د عامو وګړو قتل عام یې پیل کړ.
داعش د ننګرهار مخور او جید علماء کرام په شهادت رسول، دوی د چپرهار ولسوالۍ، د للمې سیمې مخور دینې عالم مولوي فاروق په شهادت ورساوه، د مولوي فاروق له شهادت څو ورځې وړاندې یې د همدې ولسوالۍ د کنډیباغ سیمې بل مخور عالم مولوي عبد الرحمن او د سیمې یو بل مخور عالم او د لویې جامع امام مولوي حزب الله په شهادت رسولي وو، همدارنګه د ننګرهار د روداتو ولسوالۍ د اخون کلي دیني عالم او خطیب مولوي عبد الصمد اومړی له ځان سره یووړ او وروسته یې په شهادت ورساوه.
د خپل ناوړه ظهور په پیل کې یې د عامو وګړو درویشت کورونو ته اور اچولی و، لومړی به یې کورونه سوځول، بیا به یې ماشومان په منځ پرې کول، سپین ژیري او ځوانان یې ذبحه کول او یا به یې په بمونو الوزول، زیات وخت به یې ښځې او ماشومان له ځانونو سره برمته وړل چې وروسته یې په وحشتونو کې استفاده کول او یا به یې په بربریت سره په شهادت رسول.
داعش یوازې د ننګرهار د اچین ولسوالۍ ۶۰۰ تنه وګړي په شهادت رسولي و، دا خبره د جمهوریت د ادارې د اچین والسوال کړې وه، دا هغه شمېر دی چې رسنیو ته رسېدلی و، د ولسوال په وینا داعش په اچین ولسوالۍ کې درې لوی زندانونه لرل چې عام وګړي، ماشومان او ښځې یې برمته نیول او له زړه بوږنونکو شکنجو وروسته یې په شهادت رسول، په دې زندان کې یوازې ۱۳۰ تنه دینې مخور علماء، قومي سپین ژیري او نورې مخورې څهرې برمته کړې وې.
داعش په اچین والسوالۍ کې معصومې پیغلې برمته نیولې او وروسته یې خپلو جنګیالیو ته په زور او جبر نکاح کولې، دا د داعش د وحشت یوه وړه نمونه وه، د اچین او چپرهار والسوالیو تر څنګ داعش د پچیراګام والسوالۍ په کلیو کې عام وژنه پیل کړې وه، د یادې والسوالۍ زیات شمېر کورونه یې سوځولي و، د ننګرهار اچین، چپرهار، پچیراګام، توره بوړه، هسکه مېنه، شینواري او کوټ ولسوالۍ د داعش د وحشتونو او بربریتونو شاهدي ور کوي.
داعش په ۲۰۱۶ مېلادي کال د ننګرهار د کوټ ولسوالۍ کې، په یوه ولسي او قومي جرګه کې چاودنه وکړه چې لسګونه هیوادوال په شهادت ورسېدل، په ۲۰۱۷ مېلادي کال یې د نازیانو په سیمه کې په یوه ولسي غونډه کې چاودنه وکړه او لسګونه هیوادوال یې شهیدان کړل، په ۲۰۱۹ مېلادي کال یې د هسکې مینې د یوه جومات په چاودنه کې لسګونه لمونځ کوونکي هیوادوال په شهادت ورسول.
داعش په ننګرهار کې یوازې نه و، د امریکا عسکر او جهموري اداره یې ښکاره ملګرې وه، له داعش سره څو کلونه د اسلامي امارت زړورو مجاهدینو بې درېغه مقابله وکړله، زیات شمېر یې د هلاکت کندو ته ورسول او بلاخره یې د ننګرهار له تاریخي، علمي او فرهنګي ښاره د داعش ناوړه قدم ایسته او دا خاوره یې له دې لاره ورکو لارویانو پاکه کړه، دا په ننګرهار کې د داعش د وحشتونو څو بیلګې وې، په راتلونکو برخو کې د افغانستان په نورو سیمو کې د داعش په وحشتونو ږغېږو، ان شاء الله.
