شهاب الأفغاني
د پاکستان حکومت د ترهګرۍ سره د مبارزې په پلمه د افغان مهاجرو د نيولو کمپاین پیل کړی.
په ټولنيزو رسنیو کې ځینې ويډيوګانې لاس په لاس کېږي چې د افغان ماشومانو سربیره ښځینه مریضان هم پکې شامل دي چې د پاکستان حکومت له لوري نيول شوي او په بند خونو کې د انساني حقوقو څخه بې برخې د بند شپې تېروي.
د پاکستاني چارواکو دا هڅې هغه مهال پیل شوې چې د پاکستان امنیتي ادارې د خپل ولس په خوندي ساتلو کې پاتې راغلې، او د بې ځایه پړه اچولو وروسته یې د نيولو او ربړولو دا ناکار عمل پیل کړ.
د پاکستان حکومت دا کړنه کټ مټ د داعشيانو د کړنې په څېر ده چې د ننګرهار ولایت ولسونو ته یې د اجباري کډوالۍ حکم کړی و.
داعشیانو د ننګرهار شیرزادو، خوګياڼیو او د شینوارو ولسونو ته اخطارونه ورکول، او دا به یې ورته ویل«که مرګ مو خوښ وي، په خپلو کورونو پاتې شئ».
اوس نو د همدې لوبې لوبغاړي پاکستاني چارواکي دي خو؛ دومره فرق لري چې د دواړو استبدادي لورو بیرغونه توپير لري مګر په کړنو کې د یو بل سره برابر دي.
که موږ وګورو داعش هم د مسلمانانو د وژلو، ربړلو او کډوالۍ ته د اړ کولو دنده په غاړه درلوده، چې بدبختانه اوس پاکستاني چارواکي په سيمه کې دا کار ترسره کوي.
په پاکستان کې د نا امنیو باعث افغان مهاجرين نه دي بلکې همدا په فساد او غلا ککړ چارواکي دي چې د پاکستان اقتصادي، سیاسي او امنیتي وضعیت یې کړکېچن کړی، چې آن د لویو فساد ګرو قضیې یې د محاکمو له لوري د مفسدینو په طبعي مړينې ټپ او خاموشه شوي دي.
