له افغانستانه د اشغالګرو له وتلو او د اسلامي امارت له حاکمیت سره سم په هیواد کې د ځینو راپاتې دسیسه یي فتنه ګرو لخوا د هیواد په ځینو برخو کې د امنیت د اخلال او د اسلامي نظام د بدنامۍ کوشش ترسره کېده. په ځینو ځایونو کې موږ ولیدل چې بزدل دښمن خپله کمزوري د ځینو بریدونو په ترسره کولو سره ښکاره کړه، دوی نرم اهداف لکه جماتونه، مدارس، او نور داسې ځایونه چې د هغو د هدف په توګه توجیه کېدل هېڅ منطق او دلیل نه درلود، په نښه کړل.
که څه هم په لومړیو کې زیات داسې تحلیلونه مخې ته راتلل چې ګواګي دا فتنه ګر به د نظام لپاره یو سرخوږی شي او د یوې ډلې په توګه به یې سیمییز او نړیوال استخبارات په حاکم نظام د فشار د آلې په توګه استفاده او لا ډېر قوي کړي، خو وس داسې ښکاري چې دا تحلیلونه تر هماغو ګردي میزونو پورې محدود پاتې شول او نتیجه د برعکس ظهور په حال کې ده.
په دې وروستیو کې د اسلامي امارت د استخباراتو لخوا د فتنه ګرو پر څو مهمو پټنځایونو پیچلي عملیات او د کلیدي مشرانو وژل یې زموږ د پورتنۍ ادعا لپاره ښه ثبوت کیدای شي او همدا رنګه پر هغه شویو تحلیلونو هم د بطلان کرښه راکاږي، پر همدې اساس ارزي چې د اسلامي امارت ځواکونو ته په داسې سخت وخت کې د حالاتو د قابو کولو له امله سل نُمرې ورکړل شي.
اسلامي امارت د فتنه ګرو د محوې او یو مخ د منځه تللو لپاره مټې رابډ وهلي دي، د استخباراتو د لوی ریاست د مرستیال ملا تاجمیر جواد حفظه الله په اختریز پیغام کې دې ټکي ته په ډېرو واضحو ټکو اشاره شوې ده، عموماً استخباراتي ادارې خپل دښمن په مخامخ ډول داسې نه چیلنجوي، او بیا اسلامي امارت چې هېڅکله هغه څه نه وایي، چې د کولو اراده یې نلري، بلکې څه چې وایي، هغه بیا کوي؛ نو د ملا تاجمیر جواد حفظه الله لخوا په داسې توګه: «د طاغوت، فتنې او شر او فساد لارویانو! په الله قسم موږ به د اسلامي امارت د دفاع او د خپل ځورېدلي مجاهد ولس د سر، مال او عزت د خونديتوب او د ژوند د هوساينې په موخه ستاسې په وړاندې په ډېر جديت او قاطعيت د جهاد او قتال فريضه تر سره کړو او په ډېره مېړانه به د تاسې سره وجنګېږو. ستاسې په وړاندې به مبارزه وکړو او تاسې ته به اجازه درنکړو چې د دجالي او طاغوتي قوتونو شيطاني برنامې زموږ په ګران هیواد کې پلې او تطبيق کړئ او زموږ ملت له مصيبتونو او کړاونو سره مخ کړئ او د جهاد او قتال په نتيجه کې راغلی اسلامي شرعي نظام د پرديو د خوښيو لپاره وننګوئ.» د فتنه ګرو مخاطبول دا په ډاګه کوي چې اسلامي امارت د فتنه ګرو د بیخ کندۍ لپاره تعهد او هوډ کړی، ان شاءالله.
په ټوله کې دا د خوښۍ ځای دی چې اسلامي امارت په ډېرو سختو شرائطو کې د استخباراتي او پروژه یي فتنه ګرو مخه په ډېره ښه توګه سره ډب کړه او خصوصاً استخباراتو په دې برخه کې خپله وړتیا په سمه مانا سره ښکاره کړه، نړۍ ته یې وښوده چې نور نو باید افغانستان ته د بې سرپوښه دېګ په سترګه ونه کتل شي، وس دلته هر قدم په حساب دی.
