د هجرت او بیعت مفهوم تحریفول!
د داعش له پیدایښت لومړیو ورځو څخه، پوهانو او عقللرونکو خلکو ته دا په ډاګه وه چې دا ډله نه د خدای د دین خدمتګاره ده او نه د محمدي شریعت، بلکې یوازې د اسلام د دښمنانو په لاس کې یوه آله او د دې دین پر ضد یوه وژونکې وسله ده.
داعشي خوارجو د «خلافت» تر دروغجن بیرغ لاندې داسې وحشتونه وکړل چې د اسلامي امت وجود یې له دننه زخمي کړ او د بهرنیو دښمنانو یرغلونو ته یې زمینه برابره کړه.
د داعش کړنو په واضح ډول وښودله چې د دوی له باطلې ادعا سره سره چې ځانونه یې اسلامي حرکت او د مسلمانانو مدافعین بلل، په اصل کې د دوی لاره د لویدیځ بادارانو اهدافو ته غځېدلې وه او هر څه یې چې کولای شول، د هغوی د ګټو لپاره یې ترسره کړل.
د مسلمانانو وژنه، د اسلامي هیوادونو ورانول، خونړیو فتنو خپرول او له اسلام څخه د یوې وحشي او غیر انساني څیرې وړاندې کول، د هغو خدمتونو یوه برخه وه چې دې ډلې د کفر جبهې ته وړاندې کړل؛ هغه موارد چې د دې لړۍ په مخکېنیو برخو کې یې یو په بل پسې یادونه وشوه.
د شریعت له سپیڅلو مفاهیمو څخه ناوړه ګټهاخیستنه او د هغوی تخریبول، د دې دورې د خوارجو لپاره د دوی د بادارانو تر ټولو لویه لاس ته راوړنه ده؛ په داسې ډول چې د جهاد، خلافت، د حدودو اجرا او نورو په دې څیر مفاهیمو ته یې ناسم تعبیر ورکړ، دې مفاهیمو ته یې نه جبرانېدونکی زیان واړاوه او هڅه یې وکړه چې د امت نوی نسل له دې خبرو څخه پردي کړي.
هجرت او بیعت هم هغه شرعي مفاهیم و، چې د خوارجو له شره خوندي پاتې نشول؛ دا دوه مفاهیم چې د اسلامي امت د ودانولو له اساسي ستنو څخه ګڼل کېږي، د داعشي خوارجو لخوا د فریب او فتنې د وسیلې په توګه وکارول شول.
هجرت په اسلامي منطق کې د خدای د دین د مرستې او له فتنې څخه د خلاصون لپاره یو سپیڅلی سفر دی، لکه څنګه چې رسول اکرم (صلى الله عليه وسلم) فرمایي: «لا تنقطع الهجرة حتى تنقطع التوبة، ولا تنقطع التوبة حتى تطلع الشمس من مغربها.» رواه ابوداود.
ژباړه: هجرت تر هغه وخته پورې پای ته نه رسېږي چې توبه قبلېږي، او توبه تر هغه وخته نه قطع کیږي چې لمر له لویدیځ څخه راخیژي.
خو داعشي خوارجو هجرت د وژنې او وینې تویدنې سفر باندې بدل کړ او ناخبره ځوانان یې په دې دروغو دوکه کړل چې هجرت وکړي، خو نه د دین د قایمولو لپاره، بلکې د فتنې او فساد ځالو ته.
له بله پلوه، بیعت په اسلام کې له یو عادل امام سره د اطاعت تړون دی چې د خدای کتاب او د هغه د رسول صلی الله علیه وسلم سنت پلي کړي. لکه څنګه چې هغه وفرمایل: «من مات وليس في عنقه بيعة مات ميتة جاهلية.» رواه مسلم
ژباړه: څوک چې مړ شي او په غاړه یې بیعت نه وي، د جاهلیت په مرګ مړ شوی دی.
خو هغه بیعت چې داعش غوښت، له جاهلانو او کم عقلانو سره بیعت و، نه له هدایت کوونکو امامانو سره؛ د بیعت په نامه یې امت له الهي عالمانو او رښتیني امیرانو او مجاهدینو څخه جلا کړل او خلک یې د فاسدو او فتنهاچونکو مشرانو د اطاعت په جال کې ګیر کړل.
د دې سپیڅلو مفاهیمو تحریف، اسلامي امت ته یوه سخته ضربه وه، داعش د عادل حکومت جوړولو پر ځای، لکه څنګه چې یې نارې وهلې، اسلامي سیمې یې د کورنیو جګړو، عام وژنې او کډوالۍ په ډګر بدلې کړې.
خو هغه څه چې اوس ټول امت ته څرګند شوي، دا دي چې داعش نه د جهاد استازی و، نه د اسلامي خلافت ښکارندوی، بلکې د امت د دښمنانو لخوا رهبري شوې پروژه او د دننه څخه د ویجاړولو لپاره یوه وسله وه.
نن ورځ پر اسلامي امت لازم ده چې د هجرت او بیعت خالص مفاهیم د داعشي خوارجو له غلطو تعریفونو څخه جلا کړي او داسې یې روښانه کړي لکه څنګه چې د اسلامي امت لپاره اړین دي، ترڅو یو ځل بیا د امت ځوانان د خوارجو له خوږو خو زهرجنو خبرو څخه تېر ونه وزي او ځان د دې خطرناکې فتنې پر ضد مبارزې ته چمتو کړي.
