که څه هم داعش ځان مسلمانانو ته د یوې اسلامي او جهادي ډلې په توګه معرفي کوي، خو د دوی کړنې او چلند یو بل حقیقت څرګندونه کوي. جوماتونه د اسلام له لومړیو ورځو راهیسې د اسلامي امت د دیني، علمي او ټولنیز ژوند بنسټیز مرکزونه دي او پاتې به وي. د تاریخ په اوږدو کې د اسلام دښمنانو تل له همدې مرکزونو ماتې خوړلې او علماوو د جوماتونو له منبرونو او د جمعې د خطبو له لارې خلک د اسلام، جهاد او د حق د لارې دفاع ته رابللي دي.
په افغانستان کې د امریکا ماتې هم د جومات او مدرسې له همدې سنګره پیل شوه. د اشغالګرو پر ضد د جهاد غږ او د هغوی پر وړاندې د مبارزې شرعي مشروعیت د جمعې په ورځو کې د جوماتونو له منارو پورته کېده. همدغه جوماتونه او مدرسې د دې لامل شول چې افغانستان د برېتانیا هدیره شي، د شوروي اتحاد ملا د افغانستان په غرونو کې ماته کړي او د امریکا پوځي هیبت له خاورو سره خاورې شي. نن هم افغانستان د الله تعالی جلجلاله په فضل د یوه بشپړ اسلامي نظام تر سیوري لاندې ساه اخلي.
خو داعش، چې باید د دغو دیني او علمي مرکزونو د ساتنې او پیاوړتیا لپاره هڅه کړې وای، برعکس جوماتونه په نښه کوي، د هغوی د ورانولو لپاره ماینونه ځای پر ځای کوي او لمونځ کوونکي په وېره کې اچوي. حال دا چې د الله تعالی جلجلاله د عبادت مخنیوی او د جوماتونو د ورانولو هڅه په اسلام کې له سترو ګناهونو څخه شمېرل کېږي.
الله تعالی جلجلاله فرمایي: ﴿وَمَنْ أَظْلَمُ مِمَّنْ مَنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَىٰ فِي خَرَابِهَا ۚ أُولَٰئِكَ مَا كَانَ لَهُمْ أَنْ يَدْخُلُوهَا إِلَّا خَائِفِينَ ۚ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ﴾
«او تر هغه به څوک زیات ظالم وي چې د الله جلجلاله په جوماتونو کې د هغه د نوم له یادولو مخنیوی وکړي او د هغو د ورانولو هڅه وکړي؟ دغه کسان د دې وړ نه دي چې جوماتونو ته بې له وېرې ننوځي؛ د هغوی لپاره په دنیا کې ذلت او په آخرت کې ستر عذاب دی.» (سورة البقرة: ۱۱۴)
اوس دا پوښتنه راپورته کېږي چې داعش ولې جوماتونه په نښه کوي، حال دا چې سلګونه زره مسلمانان د همدې جوماتونو له لارې د خپل دین احکام زده کوي او د اسلام له لارښوونو سره اشنا کېږي؟ د افغانستان جوماتونه په هېڅ ډول له هغه ضرار جوماتونو سره ورته نه دي چې منافقانو جوړ کړي وو.
د ضرار جومات تر شا څلور ناوړه موخې پرتې وې: د مسلمانانو پر ضد دسیسه، د امت ترمنځ د تفرقې رامنځته کول، د اسلام د دښمنانو ملاتړ او د مؤمنانو ځورول. خو د افغانستان جوماتونه د ایمان، یووالي او هدایت مرکزونه دي. له دغو جوماتونو څخه د الله تعالی جلجلاله د اطاعت، د رسول الله صلیاللهعلیهوسلم د پیروۍ او د اسلامي ورورولۍ غږ پورته کېږي.
نو راځئ، داعش د اسلامي شریعت په تله کې وتلو. ایا هغه څه چې داعش یې ترسره کوي، د محمدي شریعت له احکامو سره سمون لري؟ هېڅکله نه. د دوی کړنې له اسلامي شریعت سره هېڅ ډول اړیکه نه لري. له همدې امله داعش یوه منحرفه ډله ده چې د اسلام له سمې لارې او د محمدي شریعت له سپېڅلي منهج څخه اوښتې ده.
