دا چې داعش د امریکا پروژه ده، نو د څه لپاره یې پلان کړې ده؟
داعش د امریکا پروژه ده او تطبیقوونکي یې بعثي جنرالان او خوارج دي، د لاندې هدفونو لپاره پلان شوې ده:
۱- د غربيانو د دې داعیې د قوي کولو او ثبوت لپاره، چې خلافت، اسلامي نظام، استبداد، جبر او نور په اوسنۍ زمانه کې د تطبیق وړ نه دي، نعوذ بالله.
۲- جهاد ترهګري، د بېګناه خلکو وژل، دهشت او ظلم دی، نعوذ بالله.
۳- د اسلامي فکر بدنامول او د مسلمانانو تر منځ یې منفور کول.
۴- د مسلمانانو تر منځ بېاتفاقي او مسلمانوژنه د اسلام په نوم.
۵- ټول هغه اسلامي خوځښتونه ځپل او تضعیف کول، چې غرب ورسره خپل راتلونکی په خطر کې ویني.
۶- ټول هغه جهادي فکر لرونکي نوي مسلمانان، چې په غرب کې وو او شمېر یې لسګونو زرو ته رسېده، له غرب څخه په اسانۍ ایستل او د داعش په دام کې ګیرول.
۷- استشهاد، چې د اسلامپالو یوازینۍ هغه وسیله وه چې غرب ورته عاجز و، بدنامول.
۹- په عموم کې اسلام او د اسلام مهم رکن، جهاد، بدنامول، د مسلمانانو فکرونه مشکوکول او د مسلمانو ځوانانو فکري تحریف.
۱۰- د غربي فکر او غرب مشروعیت لوړول، او ډیموکراسي او سرمایهداري د نړۍ لپاره مهم کول.
دا اهداف به دا ځل د مستشرقینو او د غرب د پېژندل شوو سیکولري ګوډاګیانو په وسیله نه ترلاسه کېدل، بلکې دا ځل به غربي جاسوسان د پردې تر شا وو، خوارج به ورسره مل وو او د ناپوهو، ساده مسلمانو ځوانانو څخه به یې ګټه اخیسته. د غرب لپاره تر ټولو کامیابه پروژه ځکه ده، چې د دښمن د نوم، فکر او هدف څخه په استفادې خپل هدف ته رسېږي.
دا چې داعش خوارج وو، زه پرې نه غږېږم، ځکه پر دې پوره پوره کتابونه لیکل شوي دي. په نړۍ کې داسې عالم نشته چې د دوی د خوارجیت فتوا یې نه وي ورکړې. زما اصلي مقصد دا دی چې دوی د خوارجو تر څنګ د امریکا او اسرائیلو یوه پټه پروژه وه، چې اهداف مې پورته ذکر کړل. په تاریخ کې خوارجو چې اسلام ته څومره زیان اړولی، پر دې هم کتابونه لیکل شوي دي. نو که فکر وکړو چې خوارج خپله اسلام ته زیان دي، که همدا خوارج د کفارو استخباراتو استعمال کړي وي، زیان به یې څو چنده زیات وي.
د داعش د جوړېدو زمینهسازي
د داعش د جوړېدو مهم مرکز بوکا زندان و، چې د CIA مهم استخباراتي مرکز و. هغه داعش مشران چې بوکا زندان ته وړل شوي دي:
۱- ابوبکر بغدادي
۲- بعثي حاجي بکر
۳- ابو مسلم الترکماني
۴- ابو علي الانباري
۵- ابو احمد العلواني
دا کسان د داعش هسته وه. ټول بوکا زندان ته وړل شوي وو. بوکا زندان د عراق په جنوب کې، د بصرې ښار څخه ۷۰ کیلومتره لرې پروت دی. راځئ پر همدې موضوع لږ تم شو.
د عراق مرکزي زندانونه، ابوغریب او بل مشهور زندان، کمپ کراپر، هم د بغداد هوايي ډګر ته نږدې موقعیت لري. نږدې ټول سیاسي مخالفین او لوړپوړي مشران په همدې زندانونو کې اوسېدل. مګر عجیبه دا ده چې د داعش ټول مشران بیا بوکا، چې یو ولایتي زندان و، ته وړل شوي او هلته اوسېدل. د دې زندان په اړه، د CIA پرته، هغه وخت بل هېڅوک نه پوهېدل چې هلته څه روان دي.
تر ټولو عجیبه دا ده چې د ویکيلیکس له خوا هک شوي څلور لکه د پنټاګون اسناد چې خپاره شول، په یوه راپور کې چې پنټاګون ته ورکړل شوی و، راغلي وو چې د داعش د غړو تر منځ ښه تاوده بیعتونه په بوکا کې روان دي. یو بل راپور، چې پنټاګون ته ورکړل شوی و، پکې راغلي وو چې بعثي افسران او جهادي مشران اوس د پلان جوړولو په حالت کې دي.
د CIA یو بل پټ سند، چې په ۲۰۱۲ میلادي کال کې افشا شو، پکې راغلي وو چې په سوریه او عراق کې د یوه افراطي دولت جوړول به د لویدیځ له خوا پر منځني ختیځ د فشار یوه وسیله وي. په همدې سند کې راغلي وو چې یو افراطي سلفي امارت په سوریه او عراق کې به د ایران او بشارالاسد پر ضد ګټور وي.
باید یادونه وکړو چې د ویکيلیکس د امریکايي پوځ راپورونه، چې د Iraq War Logs په نوم وو، په ۲۰۱۰ میلادي کال کې افشا شول، او د CIA راپور هم په ۲۰۱۲ کې افشا شو، خو داعش په ۲۰۱۴ کې ظهور وکړ. له دې څخه معلومېږي چې د داعش د پروژې زمینهسازي تر ۲۰۱۰ مخکې پیل شوې وه.
که د بغدادي په اړه لنډ ووایو، نو داسې به وي:
بغدادي یو وړوکی امام و. امریکا زندان ته د دښمن په نوم واچاوه، بېرته یې د بېګناه په نوم خوشې کړ، او په ۲۰۱۴ کال کې یې نړیوال ترهګر او د نړۍ خطرناک کس معرفي کړ. دا هر څه په حقیقي ډول په څو کلونو کې امکان نه لري.
