د «داعش» ناوړه پدیده په بشپړه توګه یو نوی غورځنګ نه شي ګڼل کېدای؛ بلکې د دې فکري، اعتقادي او چلندیزې ریښې هغه ډلې ته ورګرځي چې د اسلام په لومړیو کې په «خوارجو» پېژندل کېده، لکه څنګه چې خوارجو د دین له سطحي او افراطي برداشتونو سره د مسلمانانو د یووالي او ورورولۍ تارونه وشلول، نن ورځ داعش هم په هماغه فکر، چلند او ناوړه اعمالو سره د اسلامي امت امنیت او وحدت ګواښوي.
موږ د تاریخ په اوږدو کې څرګنده ده چې دغه تکفیري ډله نه یوازې د اسلام د بدنامۍ لامل ګرځېدلې او د اسلامي امت په بدن کې تر ټولو زهرجنې ریښې غځولي؛ بلکې د مسلمانانو ترمنځ یې د تفرقې او اختلاف اور هم بل کړی دی، د اسلام د دښمنانو له ستراتیژیکو موخو څخه یوه دا ده چې د همدې کړیو په مټ د تفرقې اور بل کړي او سپېڅلی اسلام بدنام کړي.
کله چې موږ د دې ډلې د دقیقې پېژندنې لپاره غور وکړو، پوهېږو چې د پرونیو خوارجو (د صدر اسلام) او د نن ورځې خوارجو (داعش) فکري او تاریخي ریښې په یوه رنګه خاورې خړوبې شوې دي، د بېلګې په توګه، د پرونیو خوارجو شعار دا و: «لا حکم إلا لله»؛ خو د دې شعار ناسم او مطلق برداشت دوی دې ته را اړ کړل چې د امت د مسلمانانو پراخ تکفیر وکړي او د اسلامي ټولنې پر وړاندې جګړې ته مټې ونغاړي.
د قرآن عظیمالشان او سنتو د ژور درک پر ځای د سطحي لیدلوري او فکري وړتیا نه درلودل، د نېکو او صالحو مسلمانانو پر وړاندې پراخ تکفیر، د افراطي تاوتریخوالي کارونه، په داسې حال کې چې د اصلي کفارو پر وړاندې نرمښت ښودل، د عادل امام پر ضد خروج او په ټولنه کې د فتنې رامنځته کول د هغوی څرګنده ځانګړنې وې.
دغه باطلې اندېښنې او عقیدې تر دې بریده رسېدلې وې چې آن د اسلام پر ستر لارښود حضرت محمد صلی الله علیه وسلم یې اعتراض وکړ او د بشریت ستر اعمال یې د ځان لپاره د منلو وړ ونه ګڼل، دوی په تاریخ کې تل دا هڅه کړې چې د امت غوره شخصیتونه، حقاني عالمان او داعیان وځپي او هغوی په شهادت ورسوي.
خو د نن ورځې خوارج (داعش) څرګندوي چې دا ډله د هماغه خوارجي فکر دوام دی؛ د یهودو، نصاراوو او د اسلام دښمنانو په ملاتړ د اسلام پر ریښو تېغ وهي او غواړي سپېڅلی او مبارک دین د نړۍ پر وړاندې د ترهګرۍ او وحشت په دین بدل وښيي. د دوی تر ټولو لویه هڅه د اسلامي امت هغه وحدت له منځه وړل دي، کوم چې د امت د نجات او د مسلمانانو د عزت لامل دی.
په اوسني عصر کې ټولو ته څرګنده ده چې دښمن د داسې افراطي او له دین نه ناخبره کسانو په جوړښت او ملاتړ سره تر ټولو ستره ضربه پر سپېڅلي اسلام وارده کړې، په ډېرو اسلامي خاورو کې، همدغه خوارج د ریښتینو مجاهدینو د ځپلو او د اسلامي امت د تیتپرک کولو وسیله شول، چې بېلګې یې په شام (سوریه) او نورو ځایونو کې څرګندې دي.
د امریکا د اشغال پر مهال په ګران افغانستان کې دښمنانو د خپلې ناکامې دسيسې په ترڅ کې «داعش خراسان» را منځته کړ، څو د اسلامي امارت د سرښندونکي مجاهدینو مبارزه د اشغالګرو او اجیرانو پر وړاندې کمزورې کړي او د بېګناه ښځو او ماشومانو په وحشیانه وژنو سره اسلام د بېرحمۍ او د شفقت څخه لرې دین معرفي کړي او د غرب بېځواکه نظام ته په افغانستان کې د دوام لاره هواره کړي.
خو د اسلامي امارت مجاهدینو چې موخه یې د الله متعال جلجلاله رضا، د اسلام سربلندي، د اسلامي نظام قیام او د ارزښتونو او نوامیسو آزادي وه، هغوی ته اجازه ورنه کړه چې له خپلې اندازې واوړي او د صهیونیستانو او د اسلام دښمنانو غوښتنې پوره کړي.
د الهي نصرت او مرستې په برکت یې د متجاوزینو او اشغالګرو پوزې د خاورې سره خاورې کړې او الحمدلله د اسلام دښمنان (داعش) هم د ماتې پر لور روان شول، ان شاء الله له دې وروسته به هېڅ ډلې ته چې د یهودو، نصاراوو او نورو دښمنانو په ملاتړ جوړېږي، د طغیان، ظلم او د علماوو او امت ترمنځ د اختلاف د خپرېدو اجازه ورنه کړل شي.
