د اسلامي امارت له بیا بریا څخه نږدې پنځه کاله تېرېږي. افغانستان نن له هغه انځور سره، چې دښمنان او ځینې رسنۍ یې وړاندې کوي، له ځمکې تر اسمانه توپیر لري. راځئ هغه ورځې را په یاد کړو چې د هېواد خاوره د بهرنیو یرغلګرو تر قدمونو لاندې وه، هره ولسوالۍ د سیمهییزو زورواکو په منګولو کې وه او د چاودنو غږ د خلکو د ورځني ژوند په یوه عادي برخه بدل شوی و.
په هغو تورو ورځو کې هېچا باور نه کاوه چې یوه ورځ به راورسېږي چې یو خپلواک او اسلامي نظام به نه یوازې د خلکو کورونو ته امنیت راولي، بلکې په اقتصادي، قضايي، ټولنیزو او ډیپلوماتیکو برخو کې به هم له ځانه روښانه او د پام وړ کارنامې پرېږدي. خو نن دغه باور پر واقعیت بدل شوی او اسلامي امارت د خپل ایمان او د ولس په ملاتړ توانېدلی چې په دې ستړي او جګړهځپلي هېواد کې تاریخي بدلونونه رامنځته کړي.
خو د افغانستان په څېر یوه سیمه کې هر ستر بدلون تل د شکونو، تورونو او تخریب د څپو ملګری وي. د اسلامي امارت نظام هم له دې قاعدې مستثنا نه دی. د امارت له بېرته راستنېدو سره سم، هغو ډلو چې اصلي پانګه یې په ناامنۍ او ګډوډۍ کې وه، هغو رسنیو چې د خلکو له بدمرغیو او کړاوونو څخه یې خپل خبري خوراک برابرولو او ځینو سیمهییزو او له سیمې بهرنیو قدرتونو، چې خپلې ګټې یې په افغانستان کې د بحرانونو له دوام سره تړلې وې، د دې نظام پر وړاندې هر اړخیز کمپاین پیل کړ.
دوی هڅه وکړه چې د اسلامي امارت سترې لاسته راوړنې د هېواد د ادارې د ناتوانۍ، نړیوالې انزوا، د حقونو د ځپلو او یا له ترهګرو ډلو سره د همکارۍ په څېر تورونو په وسیله تر پوښتنې لاندې راولي. دغه تورونه، چې هره ورځ په نوې ژبه او نوې بڼه تکرارېږي، که څه هم په لومړي نظر کې قانع کوونکي ښکاري؛ خو د ترلاسه شویو واقعیتونو په رڼا کې یو په بل پسې خپل قوت له لاسه ورکوي.
ځکه چې حقیقت بل شی دی. حقیقت دا دی چې اسلامي امارت په تېرو پنځو کلونو کې د هېواد په ټولو مهمو برخو کې داسې لاسته راوړنې ثبت کړې دي چې تر دې وړاندې نه د جمهوریت په دوره کې او نه هم د افغانستان د معاصر تاریخ په بل پړاو کې ورته بېلګه لیدل کېږي. د امنیت په برخه کې افغانستان نن په تر ټولو خوندي وضعیت کې دی. په تېره نیمه پېړۍ کې د لومړي ځل لپاره د هېواد پولې په بشپړه توګه د ملي ځواکونو تر کنټرول لاندې دي او د داعش هغه ترهګره ډله چې یو مهال د وحشت او بربریت سمبول ګڼل کېده، د نظام د چارواکو په وینا او د نړیوالو راپورونو له مخې، له دې خاورې څخه په بشپړه توګه له منځه وړل شوې ده. دغه پراخ امنیت د نظام تر ټولو ستره شتمني ده، چې د نورو ټولو پرمختګونو لپاره یې زمینه برابره کړې ده.
د اقتصاد په برخه کې هېواد له بهرنۍ مرستې او د سوال له دورې څخه د وتلو په لور روان شوی او د کورنیو عوایدو پر بنسټ یې د ځانبساینې په لور مهم ګامونه اخیستي دي. د قوشتپې ستر کانال، چې په سیمه کې له سترو زیربنایي پروژو څخه ګڼل کېږي، د ملي لګښتونو له لارې د هېواد د شمال تږې ځمکې خړوبوي او د بهرنیو اسعارو پر وړاندې د افغانۍ ثبات د نظام د اقتصادي بنسټونو د پیاوړتیا ښکارندويي کوي. د قانون د حاکمیت او عدالت په برخه کې شرعي محکمو په چټکۍ او دقت سره سلګونو زرو حقوقي او جزايي قضیو ته رسېدنه کړې ده او د شریعت پر بنسټ قضايي نظام نه یوازې د خلکو په ژوند کې د عدالت د ټینګښت زمینه برابره کړې، بلکې د ځمکو د غصب او اداري فساد د مخنیوي لپاره یې هم ګامونه اخیستي دي.
اسلامي امارت په ټولنیز ډګر کې هم د پام وړ کارنامه لري. د یتیمانو، کونډو او معلولینو هر اړخیز ملاتړ، د لسګونو زرو هغو کسانو درملنه چې پر مخدره توکو روږدي شوي او د اشغال پر مهال د دې کور ورانوونکي آفت ښکار شوي وو او د راستنېدونکو کډوالو ستونزو ته رسېدنه، ښيي چې دغه نظام ځان د خلکو پر وړاندې یو ژمن او مسوول نظام ګڼي؛ نه هغه ډول چې دښمنان یې تبلیغوي. د بهرني سیاست په ډګر کې هم، سره له ټولو فشارونو او بندیزونو، اسلامي امارت توانېدلی چې له سیمهییزو هېوادونو او نړیوالو قدرتونو سره پراخې اړیکې او تعاملات رامنځته کړي او د روسیې په ګډون د ځینو سترو قدرتونو له خوا رسمي پېژندنه ترلاسه کړي.
د دې لړۍ د لیکنو موخه د همدې ساده او څرګندو حقیقتونو بیا بیانول دي. موږ نه غواړو چې د سترو شعارونو او عمومي خبرو له لارې د لوستونکي ذهن ستړی کړو؛ بلکې هڅه کوو چې د روانې، انساني او مستندې ژبې په کارولو سره د نظام پنځه کلنه کارنامه ــ له امنیت او اقتصاد څخه تر عدالت او ډیپلوماسۍ پورې ــ یو په بل پسې د حقیقت په هنداره کې وړاندې کړو. له دې سره به هغو تورونو ته هم روښانه او منطقي ځوابونه وړاندې کړو چې له بېلابېلو لورو څخه د دې نظام پر وړاندې مطرح کېږي.
ځکه زموږ په باور، شکونه په تیارو کې پاتې کېږي او یوازې د حقیقت په رڼا کې له منځه تللای شي. اسلامي امارت نن یو تاریخي او ملي واقعیت دی چې د دې خاورې د ځوانانو په وینو او قربانیو رامنځته شوی او هر هغه خپلواک انسان چې د افغانستان په سوله او سوکالۍ باور لري، دا دنده وګني چې د دې نظام د ساتنې او دوام لپاره هڅه وکړي او دروغپالو ته اجازه ورنه کړي چې دا ستره لاسته راوړنه له دې خاورې له خلکو څخه واخلي.
