د غرب بل هدف د داعش څخه د جهاد او قتال بدنامول و.
غرب د داعش په واسطه مسلمانانو او نړیوالو ته جهاد داسې تعریف کړی چې ګواکې، نعوذ بالله، جهاد وحشت، ظلم، د بېګناه انسانانو وژل او تخریب دی. داعش د جهاد د بدنامولو لپاره هغه کارونه وکړل چې جهاد یې د اکثریت ناخبره مسلمانانو او ځوانانو په ذهنونو کې بد معرفي کړ.
جهاد (قتال)، چې د الله تعالی یو سپېڅلی حکم او فریضه ده او کفار او غربیان ترې په سخته ویره کې دي، د مسلمانانو د دفاع یواځینۍ لار ده.
جهاد مسلمانان د خپلې مشروع دفاع، د خپل ناموس او مال د ساتلو لپاره، همدارنګه د محاربو کفارو په مقابل کې د وطن ساتنې، له ظلم څخه د خلاصون او د اسلامي نظام د دفاع په خاطر کوي.
هو، په جهاد کې د بېګناه انسانانو له وژلو څخه په کلکه منع شوې ده؛ خو د دې لپاره چې غربیان د مسلمانانو دا سپېڅلې الهي فریضه بدنامه کړي، د داعش په واسطه یې لاندې کارونه وکړل:
داعش په زرګونو بېګناه انسانان، خصوصاً مسلمانان، ووژل او د جهاد نوم یې ورکړ.
په داسې حال کې چې پر دې دنیا انسان ته د اور سزا ورکول منع اعلان شوي دي او په حدیث کې ذکر شوي دي چې حدیث یې په لاندې ډول دی:
«لَا تُعَذِّبُوا بِعَذَابِ اللَّهِ»
ژباړه: «د الله په عذاب (اور) سره عذاب مه ورکوئ.»
حواله: صحیح البخاري، کتاب الجهاد والسیر، باب «لا يعذب بعذاب الله»، حدیث ۳۰۱۶.
خو داعش یو د اردن هېواد تبعه پیلوټ ژوندی په اور وسوځاوه او فلمونه یې ترې جوړ کړل. د دې وحشت ننداره ټولې نړۍ وکړه، او داعش همدغه کار ته د جهاد نوم ورکړ.
په حدیث شریف کې راځي چې تاسې ماشومان او ښځې د جګړې پر وخت مه وژنئ او مه یې په نښه کوئ.
حدیث په لاندې ډول دی: له عبدالله بن عمر رضي الله عنهما څخه روایت دی:
«نَهَى رَسُولُ اللَّهِ صلی الله علیه وسلم عَنْ قَتْلِ النِّسَاءِ وَالصِّبْيَانِ»
ژباړه: «رسول الله صلی الله علیه وسلم د ښځو او ماشومانو له وژلو څخه منع کړې ده.»
حواله: صحیح البخاري، حدیث ۳۰۱۵؛ صحیح مسلم، حدیث ۱۷۴۴.
داعش په عراق او افغانستان کې زرګونه ماشومان او ښځې قصداً د جهاد تر نوم لاندې ووژل. همدارنګه، زرګونه دیني مراکز، جوماتونه او مدرسې یې د جهاد په نامه تخریب او قصداً یې نظامي هدف وګرځول.
