د داعش د څو مشهورو قوماندانانو او غړو وروستۍ وژنې یو ځل بیا د پاکستان د رژیم پټه څېره بربنډه کړه، دا پیښې په ډاګه کوي چې پاکستان نه یوازې د داعش پر ضد په جګړه کې رښتینی نه دی، بلکې خپله د دې ډلې لپاره په یوه خوندي ساتنځای او اصلي ملاتړ بدل شوی دی.
په داسې حال کې چې داعش په افغانستان کې د اسلامي امارت د امنیتي ځواکونو له لوري له منځه وړل شوی او ډېری مشران یې وژل شوي، راپورونه څرګندوي چې د دې ډلې پاتې غړيو اوس په پاکستان کې پناه اخیستې ده. هغوی د وزیرستان، بلوچستان او د هېواد په نورو سیمو کې د خوندي هډو له لارې خپل فعالیتونه ته دوام ورکوي او حتی د افغانستان پر ضد د چاودېدونکو عملیاتو پلانونه جوړوي.
د پاکستان رژیم له ډيري مودي راهیسې د داعش وحشي ډلي په اړه دوهمخیز سیاست تعقیبوي؛ له یوې خوا په نړیواله کچه ځان د ترهګرۍ ضد هېواد معرفي کوي، خو له بلې خوا په عملي ډګر کې د دې ډلې د فعالیتونو زمینه برابروي او غړو ته یې پناه ورکوي. ګڼ شمېر استخباراتي او ساحوي راپورونه څرګندوي چې د داعش لپاره مالي، وسلوال او استخباراتي ملاتړ د پاکستان پر خاوره ترسره کېږي، په داسې حال کې چې د دغه هېواد رسمي ادارې پرې سترګې پټوي.
اسلاماباد له دې فریبکارې تګلارې سره هڅه کوي چې له داعش څخه د خپلو سیاسي موخو لپاره د یوې وسیلې په توګه ګټه واخلي، په ځانګړي ډول د افغانستان پر وړاندې. خو دا خطرناکه لوبه د اور له لمبو سره ملګرتيا ده چي ژر یا ناوخته به خپله پاکستان هم د همدې اور ښکار شي. تجربې ثابته کړې چې هېڅ هېواد د داعش په پاللو او پناه ورکولو سره خوندي پاتې کېدای نه شي. هغه ډله چې نن د نورو پر ضد کارول کېږي، سبا به خپل کوربه په نښه کوي.
په مقابل کې، د افغانستان اسلامي امارت د قاطع او مدبرانه دریځ له مخې وتوانېد چې د داعش ریښې په بشپړه توګه له خپلې خاورې وباسي. د امارت امنیتي ځواکونو په ټول هېواد کې د دقیقو او هدفمنو عملیاتو په پایله کې د دې ډلې د مرکزونو د له منځه وړلو بریا ترلاسه کړې ده. دا بریالۍ تجربه کولای شي د پاکستان او د سیمې د نورو هېوادونو لپاره یو عملي الګو وي.
د پاکستان رژیم باید دا درک کړي چې د داعش ملاتړ او ساتل به یواځې د کورنۍ ناامنۍ، بېثباتۍ او سیمهییزې بېباورۍ سبب شي. نړیواله ټولنه هم باید ومني چې د داعش د فعالیتونو سرچینه په افغانستان نه، بلکې د پاکستان په خاوره کې ده.
که اسلاماباد په رښتینې توګه د سولې او ثبات غوښتونکی وي، نو اړینه ده چې خپله دوهمخیزه پالیسي پرېږدي او د سیمې له هېوادونو سره په ګډه د داعش د بشپړ نابودۍ لپاره ګام پورته کړي. د داعش ملاتړ کول د هغه اور د سون توکو راټولول دي چې لمبې به یې، ناوخته یا ژر، د پاکستان کور ته ورسېږي.
