افغانستان د خپل ځانګړي جغرافیایي موقعیت، تاریخي شرایطو او سیمهییزو تحولاتو له امله تل له بېلابېلو امنیتي ننګونو سره مخ پاتې شوی دی. په داسې شرایطو کې د هېواد د امنیتي او استخباراتي بنسټونو پیاوړتیا د ملي حاکمیت، ثبات او د خلکو د امنیت له اساسي اړتیاوو څخه ګڼل کېږي.
د افغان استخباراتي او امنیتي ځواک د پیاوړتیا انځور د یوه داسې امنیتي بنسټ انځور دی چې له دفاعي انتظار څخه د فعال امنیتي تدبیر پر لور حرکت کوي. د ګواښ تر رامنځته کېدو وروسته غبرګون د امنیت یوه برخه ده؛ خو د ګواښ تر رامنځته کېدو وړاندې تشخیص او مخنیوی د استخباراتي ځواک د مسلک لوړه کچه ده.
په دې وروستیو کې د هېواد په شمال ختیځ ولایت بدخشان کې د پردیو استخباراتي کړیو له لوري د ځینو باغي عناصرو تمویل او روزنه، د اسلامي امارت په مقابل کې په مستقیم ډول د جګړې ډګر ته داخلول، او همداراز د حسیب قوه مرکز په نوم د شر او فساد لنډغرو او د هغه د څو نورو لنډغرو له منځه وړل، چې د بهرنیو کړیو له لوري د تخریبي هڅو لپاره کارول کېدل، د همدغه تهاجمي عملیاتو یوه برخه وه.
خو په منظم ډول د همدغو فتنو مهارول د دې ښکارندویي کوي چې افغان استخباراتي او امنیتي ځواک د هرې بهرنۍ دسیسې په اړه معلومات او د هغوی د تحلیل بشپړه وړتیا لري. دغه ټول بغاوتونه چې په رأس کې له یوه منحوس او نجس بهرني ادرس لخوا تمویل کېږي، چې د هېواد د ولسونو تر منځ د تفرقې او د ملي حاکمیت د ننګولو هڅه کوي.
همداراز په بشپړ قاطعیت سره د همدغو خطرونو له منځه وړل د داعش منحوسې جبهې پر وړاندې د استخباراتي او امنیتي ځواک بل کلک ګوزار وو. افغان امنیتي او استخباراتي ځواکونو وکولای شول چې په هېواد کې د داعشي خوارجو، باغیانو او د شر او فساد لنډغرو پټنځایونه، تمویلونکي ادرسونه او د هغوی لوژستیکي او تبلیغاتي دستګاوې کشف او په بشپړ ډول له منځه یوسي.
په اوسني حساس سیمهییز چاپېریال کې د داسې امنیتي او استخباراتي ځواکونو شتون چې د ګواښونو د پېژندلو، د خطرونو د مخنیوي او د امنیت د ټینګښت بېسارې وړتیا ولري، د مؤمن هېواد لپاره ځانګړی ارزښت لري. پر همدې اساس، پیاوړي استخبارات، چټک غبرګون، منظم امنیتي جوړښت او مسلکي ځواکونه د یو باثباته او خوندي افغانستان مهم بنسټونه جوړوي.
په پای کې، له دفاعي حالت څخه د تهاجمي دریځ پر لور د دوی حرکت د دې څرګندونه کوي چې د هېواد د امنیت لپاره یې وړتیاوې پراخې او د هر ډول ګواښ پر وړاندې د مقابلې هر اړخیزه وړتیا لري. د استخباراتي او امنیتي ځواکونو انضباط، مسلکي مسؤولیت، زړورتیا او د مؤمن هېواد د امنیت ساتنې احساس هغه ځانګړنې دي چې د یوه پیاوړي استخباراتي ځواک انځور وړاندې کوي.
