اسلام د عدالت دین دی؛ د ظلم له منځه وړونکی، د عدالت ټینګونکی او د انسانانو او پېریانو دواړو لپاره د سولې، آرامتیا او خیر پیغاموړونکی دی. په دې معاصر عصر کې لویدیځ او ختیځ د ټکنالوژۍ او رسنیو په وسیله هڅه کوي چې د خپلې واکمنۍ او حکومتونو د دوام لپاره اسلام د خلکو په ذهنونو کې د وېرې، وحشت او تاوتریخوالي د دین په توګه انځور کړي. که نړۍ اسلام په خپل ریښتیني او سپېڅلي ماهیت وپېژني، نو ډېر خلک به له الحادي افکارو څخه د اسلام پر لوري راوګرځي. د اسلام د بدنامولو او د هغه د اصلي څېرې د تحریف په برخه کې د لویدیځ او ختیځ له مهمو لاسته راوړنو څخه یوه هم د داعش رامنځته کېدل وو. دې پروژې د اسلامضدو کړیو موخې تر ډېره پوره کړې.
داعش د سر پرې کولو د ویډیوګانو په خپرولو سره اسلام د لویدیځوالو په سترګو کې د یوه وحشتناک دین په توګه انځور کړ او د هغو سلګونو انسانانو د مسلمانېدو مخه یې ونیوله چې ښايي یوه ورځ مسلمانان شوي وای. یوه سیکولر څېړونکي، د خپلو وګړو د مسلمانېدو د مخنیوي په موخه، د اسلام په اړه داسې څرګندونې کړې دي: «ایان حرصي علي پر اسلام سختې نیوکې وکړې او ویې ویل: اسلام د وېرې، وحشت او سر پرې کولو دین دی؛ ځکه چې داعش د اسلام له استازو څخه ګڼل کېږي. داعش مطالعه کړئ، څو ووینئ چې دوی څومره وحشي دي.»
ډېرو نورو سیکولرو شنونکو هم پر اسلام نیوکې کړې او داعش یې د اسلام د یوې نمونې په توګه وړاندې کړې ده؛ حال دا چې هغوی پوهېږي چې اسلام بېل دین دی او داعش بېله ډله. داعش له اسلام سره هېڅ تړاو نه لري او هیڅکله د اسلام استازیتوب نه شي کولی. د داعش خوارجو ډلې نن ورځ د اسلام د پرمختګ او خپرېدو بهیر له خنډ سره مخ کړی دی؛ په داسې حال کې چې مجاهدین په شام، عراق، چیچنیا او د نړۍ په بېلابېلو سیمو کې پراخ حضور درلود او د پرمختګ په حال کې وو.
د داعش ډلې د مجاهدینو د کمزوري کېدو او د دښمن د بریا لپاره زمینه برابره کړه. ځینو ناپوهو کسانو هم د مجاهدینو له لیکو څخه ځانونه جلا کړل، له بیعته يې لاس واخیست او له داعش سره یې بیعت وکړ. راځئ د سالم عقل، قرآني پوهې او د محمد رسولالله صلیاللهعلیهوسلم د سیرت په رڼا کې وڅېړو چې داعش د اسلام په نوم لویدیځ او ختیځ ته کوم دین او کوم شریعت وړاندې کوي. د هر مسلمان دنده ده چې د اسلام د دفاع لپاره داعش له اسلامه جلا وبولي، دا حقیقت نړۍ ته څرګند کړي او د اسلام هغه سپېڅلې او رښتینې څېره نړۍ ته وروپېژني چې د انسانانو او پېریانو دواړو لپاره د سولې، آرامتیا او خیر پیغام لري.
اې لویدیځوالو! د مسلمانانو د تېرو خلافتونو تاریخ مطالعه کړئ، څو ووینئ چې هغوی څنګه نړۍ له ظلم او بېعدالتۍ څخه د اسلامي عدالت پر لوري رهبري کړې ده.
د «داعش کوم شریعت وړاندې کوي؟» د دې لړۍ په ترڅ کې به په څرګنده روښانه کړو چې د فتنهګرې داعش ډلې کړنې له اسلام سره هېڅ ډول تړاو نه لري؛ بلکې دا ډله د اسلام د دښمنانو، لویدیځو استخباراتي ادارو او نورو اسلامضدو کړیو له لوري ملاتړ او پیاوړتیا مومي او د خپلو ظالمانه واکمنیو د ساتنې لپاره له فتنهګرو څخه ګټه اخلي.
