مسلمانان بریالي دي:
که مسلمانان، عزت، سرلوړي، بریا او د بیت المقدس پاکه ځمکه د ظالمو او غاصبو صهیونستانو له منګولو ژغورل غواړي، نو یوازینۍ حل لاره یې؛ د الله جلجلاله لوري ته رجوع، په نبوي شریعت پابندي، یووالی، همغږي او د الله جلجلاله د کلمې لوړولو لپاره مخلصانه جهاد دی.
مفتي محمد شفیع رحمة الله علیه په خپل تفسیر معارف القرآن کې لیکي: یوازې هغه وسلې او لارې چې د بیت المقدس او فلسطین د بیرته ترلاسه کولو لامل ګرځي، هغه د الله جلجلاله لوري ته رجوع، په آخرت باور، د شریعت د احکامو پیروي، د نورو تقلید نه کول او په معاشرت او سیاست کې یوازې په الله تعالی جلجلاله باور او مخلصانه جهاد دی.
هغه زیاتوي: الله جلجلاله په ځمکه کې دوه ځایونه د خپلو بندګانو د عبادت لپاره ټاکلي دي: یو بیت الله او بل بیت المقدس؛ خو د دواړو لپاره د الهي قانون ځانګړې اصول وضع شوي، د بیت الله ساتنه او په هغه باندې د کفارو د تسلط مخنیوی په خپله الله جلجلاله اخیستی دی، چې پایله یې په قرآن کريم کې د “فیل” په پېښه کې ذکر شوې ده، خو د بیت المقدس په اړه داسې قانون نشته.
د بني اسرائيل په سورت کې له آیتونو څرګندېږي چې هرکله مسلمانان په ګمراهۍ او سرغړونې اخته شي، د جزا په ډول به دغه قبله ترې واخیستل شي او کفار به پرې برلاسي شي، له دې امله مسلمانان باید پر الله جلجلاله توکل وکړي، د رسول الله صلیاللهعلیهوسلم د لارښوونو اطاعت وکړي او د هغه نبوي وړاندوینې څرګنده بیلګه شي چې فرمایي: آن ونې او کاڼي به د کفارو او مشرکینو پر ضد د مسلمانانو ملګرتیا وکړي.
امام مسلم د ابو هریره رضي الله عنه څخه روایت کوي چې رسول الله صلیاللهعلیهوسلم وفرمایل:
«لَا تَقُومُ السَّاعَةُ حَتَّى يُقَاتِلَ الْمُسْلِمُونَ الْيَهُودَ، فَيَقْتُلُهُمُ الْمُسْلِمُونَ حَتَّى يَخْتَبِيَّ الْيَهُودِيُّ مِنْ وَرَاءِ الحَجَرِ وَالشَّجَرِ، فَيَقُولُ الحَجَرُ أَوِ الشَّجَرُ: يَا مُسْلِمُ يَا عَبْدَ اللهِ هَذَا يَهُودِيٌّ خَلْفِي، فَتَعَالَ فَاقْتُلْهُ، إِلَّا الْغَرْقَدَ، فَإِنَّهُ مِنْ شَجَرِ الْيَهُودِ».
ژباړه: «قیامت به تر هغو را نه شي ترڅو چې مسلمانان د یهودانو پر وړاندې جګړه ونه کړي، مسلمانان به هغوی ووژني، تر دې چې یهودیان به د تیږو او ونو تر شا پټ شي او تیږې او ونې به ووايي: ای مسلمانه! اې د الله بنده! دلته یو یهودي زما شاته پټ دی، راشه او هغه ووژنه، پرته د غرقد د ونې څخه ځکه د غرقد ونې د یهودانو ونې دي».
په بل حدیث کې رسول الله صلیاللهعلیهوسلم فرمایي:
«لَا تَزَالُ طَائِفَةٌ مِنْ أُمَّتِي عَلَى الدِّينِ ظَاهِرِينَ لَعَدُوِّهِمْ قَاهِرِينَ لَا يَضُرُّهُمْ مَنْ خَالَفَهُمْ إِلَّا مَا أَصَابَهُمْ مِنْ لَأَوَاءَ حَتَّى يَأْتِيَهُمْ أَمْرُ اللهِ وَهُمْ كَذَلِكَ. قَالُوا: يَا رَسُولَ اللهِ وَأَيْنَ هُمْ؟ قَالَ: بِبَيْتِ الْمَقْدِسِ وَأَكْنَافِ بَيْتِ الْمَقْدِسِ».
ژباړه: «همېشه به د امت یوه ډله په حق ولاړه وي، په خپلو دښمنانو به برلاسي او بریالي وي، هغه کسان چې هڅه کوي هغوی نا امید کړي، څه به ترلاسه نه کړي، یوازې هغه ستونزې چې هغوی ته ورسېږي، دا حالت به تر هغه دوام وکړي چې د الله جلجلاله حکم راشي او هغوی به په همدې حال کې پاتې وي» صحابه کرامو پوښتنه وکړه: یا رسول الله صلیاللهعلیهوسلم! هغوی به چېرته وي؟ رسول الله صلیاللهعلیهوسلم وفرمایل: په بیت المقدس او د بیت المقدس په شاوخوا کې».
د هغې ورځې په هیله چې رب العالمین بیت المقدس، د فلسطین سپېڅلې ځمکه او ټول اسلامي هېوادونه د کفارو او ظالمانو له اسارت څخه آزاد کړي او د اسلام له رحمتونو ډکې غېږې ته وروګرځوي، مسلمانانو ته یووالی، همغږي، بریا، عزت، سرلوړي او سوکالي ور په برخه کړي.
