یو ځل بیا د پاکستان پوځي رژیم د غوسې او ناکامۍ اور د بې ګناه افغانانو ګریوان نیولی دی. څو ورځې وړاندې د دغه هېواد جنګي الوتکو د ننګرهار او پکتیکا ولایتونو ځینې سیمې په نښه کړې، ترڅو په یوه وحشیانه عمل کې، د خپل داخلي امنیت د خوندیتوب په برخه کې خپله ناتواني په دې ډول ځواب کړي. اسلام اباد ادعا کوي چې د ترهګرو پټنځایونه یې په نښه کړي دي؛ خو دا ادعا د بې دفاع ښځو او ماشومانو د شهادتونو په وړاندې په ښکاره ډول بې اعتباره او درواغ ثابتیږي.
هغه رژیم چې د خپلو خونړیو داخلي بحرانونو د کنټرول توان نه لري او هره ورځ په ښارونو کې د مرګونو چاودنو شاهد دی، اوس په دې بریدونو سره هڅه کوي چې خپل عامه افکار له پرله پسې ماتو څخه واړوي او خپلې امنیتي ناکامۍ د ګاونډي هېواد په غاړه واچوي. دا یوه تکراري او زړه سناریو ده؛ د نورو پر ملي حاکمیت په تجاوز او د هغو انسانانو په وینه تویولو سره د داخلي ناتوانیو پټول چې یوازینۍ ګناه یې د یوې مصنوعي پولې هاخوا ژوند کول دي.
پاکستاني رژیم په دې جنایت کې، تر بل هر وخت ډېر خپل رښتینی ماهیت نړۍ ته څرګند کړ. لکه څنګه چې صهیونیستي رژیم په فلسطین کې د روغتونونو او ښوونځیو په بمبارۍ سره خپل وحشي مخ څرګند کړ، پاکستاني پوځي رژیم هم په افغانستان کې د استوګنې کورونو او یوې دیني مدرسې په نښه کولو سره وښودله چې د بې ګناه ماشوم او یوه وسله وال ترمنځ ورته هیڅ توپیر نشته.
افغان ملت به دا صحنې له یاده ونه باسي؛ د هغو ماشومانو بې روحه جسدونه را ایستل چې د بمباریو تر خاورو لاندې شوي وو او د هغو میندو ژړاګانې چې په یوه شیبه کې یې خپل عزیزان له لاسه ورکړي وو. راپورونه وایي چې په دې بریدونو کې لسګونه ملکي وګړي شهیدان شوي، چې په هغوی کې د یوې کورنۍ اوولس غړي هم شامل دي چې له یو کلن څخه تر اتیا کلن پورې یې تر خاورو لاندې خپل ژوند له لاسه ورکړی دی، دا ټکان ورکوونکې کیسې دي.
نه انکارکېدونکی حقیقت دا دی چې په پاکستان کې اوسنۍ ناامنۍ او جګړه، د دغه هېواد د خپلو غلطو پالیسیو او په تېرو لسیزو کې د ترهګریزو او وسله والو ډلو څخه د اوږد مهاله ملاتړ پایله ده. دا هغه آفت دی چې پخپله یې پاللی او نن یې ورته ګریوان نیولی دی.
افغانستان نه یوازې د پاکستان په داخلي چارو کې هیڅ ډول لاسوهنه نلري، بلکې پخپله هم هڅه کوي چې په خپله خاوره کې هیڅ ډول ناامنه کوونکی عنصر شتون ته اجازه ورنکړي او تل یې د خبرو اترو او ډیپلوماسۍ له لارې د مسلو پر حل ټینګار کړی دی. د بې ګناه افغانانو وینه، د پاکستان بې بنسټه ادعاوو ته ځواب دی او دا پوځي رژیم باید پوه شي چې یوه ورځ به د دې تجاوز او د دې ټولو جنایتونو تاوان ورکړي.
