د افغانستان اسلامي امارت د سیاست په نوې مرحله کې د یوه داسې بهرني سیاست بنسټ ایښی، چې نه تنها سیمه ییزه ډیپلوماټیکه فضا یې ورسره خلاصه کړې، بلکې د افغانستان د مشروعیت، اقتصادي ودې او نړیوال تعامل لپاره یې نوې امکانات هم رامنځته کړي. دا سیاست د امارت د رهبرۍ د هوښیار، متوازن او روښانه فکر ښکارندویي کوي، چې پر اساس یې له انزوا څخه د خلاصون او له نړۍ سره د تعامل لپاره مؤثرې لارې چارې برابرې شوې دي.
په دې وروستیو کې د اسلامي امارت له لوري د سیمه ییزو هېوادونو سره اړیکې دومره پراخې شوي، چې اوس د امارت دیپلوماتیک فعالیتونه د یوه منزوي حکومت پر ځای د یوه فعال، پر ځان ولاړ او با عزته دولت بڼه غوره کړې ده. د یو شمېر هېوادونو لخوا په افغانستان کې د سفارتونو پرانیستل، په ځینو هېوادونو کې د افغان سفارتونو فعال ساتل او تر څنګ یې افغان وګړو ته د ویزو او نورو اړتیاوو، په برخه کې د اسانتیاوو برابرول، دا ټول هغه پرمختګونه دي چې د اسلامي امارت د بریالي بهرني سیاست او په داخل کې د ولس او نظام تر منځ د متقابل اعتماد له امله لاسته راغلي.
یو له مهمو لاسته راوړنو څخه د بهرنیو پانګوالو لپاره د جذب شرایطو برابرول دي. اسلامي امارت د پانګوالو اعتماد ګټلی، د امنیت فضا یې ورته رامنځته کړې او د پانګونې لپاره یې قانوني او اساسي زمینې برابرې کړي. له همدې امله، د چین، روسیې، قطر، ترکیې او داسې نورو هېوادونو پانګوال د افغانستان د انرژۍ، لارو، زېرمو، زراعت او ساختماني سکتور لپاره لیوالتیا ښيي.
د افغانستان د تولیداتو او محلي محصولاتو لپاره د نړیوالو بازارونو موندل یو بل مهم پرمختګ دی، اوس د افغانستان وچه میوه، جلغوزې، قالینې، طبي بوټي او نور توکي د منځنۍ آسیا، چین، هند، او خلیجي هېوادونو بازارونو ته په منظم ډول صادرېږي. دا نه یوازې د هېواد اقتصادي وضعې ته قوت ورکوي، بلکې د ولس په ورځني ژوند کې د ثبات او هوساینې څرک هم راولي.
د امارت له خوا په نړیوالو او سیمه ییزو کنفرانسونو کې فعال ګډون هم یو مثبت تحول دی. د روسیې د مسکو فارمټ غونډه چې د افغانستان د بهرنیو چارو وزیر مولوي امیرخان متقي پکې رسمي ګډون وکړ، یو مهم اقدام و. په دې غونډه کې د سیمې هېوادونو سره د اعتماد فضا نوره هم پراخه شوه او دا ثابته شوه چې اسلامي امارت د سولې، همکارۍ او اقتصادي پراختیا لپاره چمتو دی.
همداراز، د هند سفر چې د هندي حکومت له رسمي بلنې سره ترسره شو، د امارت د دیپلوماتیک ځواک ښکاره ثبوت و. د هند بهرنیو چارو وزارت نه یوازې متقي صاحب ته د لوړ پروتوکول هرکلی ورکړ، بلکې د سفارتي سطحې لوړولو، اقتصادي، تجارتي، طبي همکارۍ، ترانزیتي دهلېزونو پراختیا، او د ولسونو ترمنځ د تګ راتګ د اسانتیاوو ژمنې یې هم وکړې. دا لیدنه هغه مهال رامنځته شوه، چې د یو شمېر ګاونډیو هېوادونو هڅه دا وه چې افغانستان د نړۍ له تعامل څخه محروم وساتي، خو اسلامي امارت د خپل متوازن سیاست له برکته دا هڅې شنډې کړې.
د امارت بهرنی سیاست اوس په یوه فعال تعامل ولاړ دی، چې د “د تعامل له لارې مشروعیت” پر اصل ولاړ دی. دا سیاست نه یوازې د ملت واقعي غوښتنه پوره کوي، بلکې د یو داسې افغانستان زېری ورکوي، چې خپل هویت، خپل دین، خپل سیاست او خپل اقتصاد د نړۍ په کچه له عزته ډک او ثبات لرونکی ښکاره کوي.
اسلامي امارت نه تنها د تعامل بنسټ ایښی، بلکې هغه عملي اقدامات یې هم کړي چې د باور فضا یې پیاوړې کړې ده. او دا ټول د هغه حقیقت څرګندونه کوي چې افغانستان نور یو منزوی هېواد نه دی، بلکې د سیمې او نړۍ د همکارۍ یو مهم، ارزښتناک او پیاوړی شریک دی.
