د یویشتمې پېړۍ په لومړۍ یوه نیمه سلیزه کې امریکا د سيپټمبر د (۱۱) مې پيښې په پلمه پر افغانستان پوځي برید وکړ، وروسته یې د ویجاړونکو اسلحو په پلمه پر عراق یرغل وکړ، چې په دې کار سره یې په سویلي اسیا او منځني ختیځ کې د مرګ او ژوند لویه جګړه را منځته کړه چې لا تر اوسه جریان لري، دا ناورین یوازې تر پوځي ځواک کارونې پورې محدود پاتې نه شو، بلکې په څنګ کې یې نورو فتنو هم سر را پورته کړ، چې د مسلمانانو د ډېري ستري ځوروني سبب وګرځېد.
په عراق کې د شیعه او سني تر نامه لاندې فتنه دومره وغوړېده، چې آن ټول منځنی ختیځ یې په لمبو کې را ایسار کړ، د همدغې فتنې د لا تازه کولو او ژوندي ساتلو په موخه د داعشي خلافت په نوم یوه بله فتنه را منځته شوه، د خلافت نامه ته که څه هم د لنډ مهال لپاره د مضطرب امت هیله مندي پیدا سو؛ خو ډېر ژر د هغوی د نا اسلامي او نا انساني کړونو له امله نا امیده شو.
دغه فتنه د مسلمانانو لپاره هغه وخت نوره هم خطرناکه ثابته شوه چې د بنسټ تړون یې له یهودي او صلیبي چینلونو سره تړلی وګڼل شو؛ د یر غلګرو دا لوبه هغه مهال نوره هم واضح شوه، چې تخم یې د افغانستان په پاکه خاوره کې را څرګند شو، د داعش په نامه د خوارجو ډلې په (۲۰۱۳) کال په عراق کې خپل شتون اعلان کړ، چې څه موده وروسته یې فعالیت په بېلا بېلو هیوادونو کې څرګند شو او یوې ډلې افغانانو هم په افغانستان کې له دوی سره بیعت وکړ.
په افغانستان کې د دغې ډلې له را څرګندېدو وروسته د څه مودې لپاره افغانستان اسلامي امارت د دغې ډلي له خلکو سره هيڅ کار نه درلود، بلکې یو ډول یې څارل، په هغه وخت کې د اسلامي امارت رهبر امیر المؤمنین شهید ملا اختر محمد منصور تقبله الله د داعش مشرانو ته د یو لیک په استولو سره، هغوی د افغانستان د جهادي سیمو حالاتو او شرایطو ته متوجه کړل او دوی یې د اسلامي امارت له دریځ څخه خبر کړل.
داعش په کم وخت کې د افغانستان په بېلا بېلو ولایتونو کې خلک پیداکړل او نفوذ یې زیات شو، په جلال اباد، کنړ او نورو ولایتونو کې یې فتنې پیل کړې او د اسلامي امارت په ضد یې پاڅون وکړ، اسلامي امارت دغو حالاتو په کتو سره خپل توجه دوی ته واړوله او په یو څه وخت کې یې دغه فتنه ورکه کړه.
له ولایتونو څخه د دوی د زوال وروستۍ ورځې وې، د داعش له امریکایانو او مخکني رژیم سره پټې اړیکې چې په رأس کې امرالله صالح و، معلومې شوې، څو ځله په مختلفو جبهو کې، کله چې د دوی وروستي سنګرونه ونړول شوه او د اسلامي امارت د مجاهدینو له خوا محاصره شول، نو د پخواني رژیم څرخکي به د دوی مرستي ته راغلې او کابل ته یې یوړل، هلته یې هم درملنه کېده او هم ځایونه ور کول کېدل.
