درېیم لامل – د پاکستان د استخباراتي سازمانونو رسوایي او ضعف
درېیم لامل چې له مخې یې پاکستان د سقوط پر لور روان دی، هغه د پاکستان د استخباراتي ادارو رسوایي او ضعف دی. د پاکستان استخباراتي ادارو تر عمل زیات تبلیغاتي بڼه لرله، خو اوس د دغو ادارو اصلي څېره هم د پاکستان خلکو ته او هم د دوی مخالفینو ته څرګنده شوې ده.
کلونه مخکې د پاکستان د عوامو په ذهن کې په تبلیغاتي ډول دا خبره ځای پر ځای شوې وه چې ګواکې د پاکستان هر درېیم کس د پوځ او حکومت جاسوس دی.
خلک دومره په وېره کې ساتل شوي وو، چې که به په کوم ځای کې امنیتي پېښه رامنځته شوه، نو سمدستي به ویل کېدل: «دا خو د آی ایس آی په خوښه کېږي.»
خلک ذهناً دومره د آی ایس آی تر اغېز لاندې راغلي وو، چې داسې یې ګڼله، زموږ هېڅ کار د آی ایس آی له نظره پټ نه دی.
همدارنګه، د آی ایس آی په اړه عمومي تصور دا و چې ګواکې دا اداره په هېواد او عوامو بشپړ کنټرول لري، هېڅ فساد نه کوي، او هر څه د هېواد او خلکو د ګټې لپاره ترسره کوي. خو په تېرو پنځو ـ شپږو کلونو کې، د پاکستاني طالبانو او بلوڅ ازادۍ غوښتونکو مبارزو د آی ایس آی ټول تبلیغات رسوا کړل. خلکو ته څرګنده شوه چې آی ایس آی د عمل پر ځای یوه تبلیغاتي اداره ده، او د هغې د دننه چارواکي په کچه ډېر مفسد او عیاش کسان دي.
دوی د دې پر ځای چې د هېواد ګټو ته لومړیتوب ورکړي، شپه او ورځ د پاکستان د عوامو پر سر معاملو ته بوخت دي. د دوی سپین سترګي تر دې حده رسېدلې ده، چې حتی د نړۍ له ستر جابر، اسراییلو سره هم پټې اړیکې او معاملې لري.
د استخباراتي ادارو هغه زیات ظلمونه چې د پاکستاني عوامو پر عزت او ناموس یې وکړل، خلکو ته دا خبره نوره هم روښانه کړه، چې آی ایس آی هغه اداره نه ده، چې د عوامو د خیر لپاره کار کوي.
پخوا به چې آی ایس آی یو څوک ناحقه وژل، نو خلک به ویل: «یقیناً دا سړی پخپله پړ و، ځکه آی ایس آی بې دلیله پر چا ظلم نه کوي.» خو اوس دا انګېرنه بدله شوې ده، د نن ورځې زیاتره پاکستانیان پوهېږي چې آی ایس آی د خپلو شخصي ګټو او د پردیو هېوادونو د پلانونو د پلي کولو لپاره ناحقه وژنې کوي.
د پاکستان د استخباراتي ادارو هغه دروغ هم رسوا شول، چې ویل یې: «د پاکستان پوځ د نړۍ تر ټولو ځواکمن پوځ دی.» اوس چې د آی ایس آی هغه پخوانی ډار د خلکو له ذهنه وتلی، نو خلکو ته جرئت پیدا شوی چې خپل حق وغواړي او د حق او ناحق ترمنځ خپله فیصله وکړي.
دغه بدلون وسله والو مخالفینو ته دا فرصت ورکړی چې د خلکو ملاتړ ترلاسه کړي او له هغوی څخه مرسته وغواړي.
دا هماغه لامل دی چې نن سبا د پاکستان د پوځي رژیم پر ضد یو مرګونی طوفان راولاړ شوی دی، چې د پاکستان حکومت یې وارخطا کړی. خو د دې پر ځای چې حقیقت درک کړي، د خپلو ناکامیو پړه پر ګاونډیو هېوادونو اچوي.
