د علمي او فکري کدرونو جبري مهاجرت:
داعش په ظاهره ځان د “اسلامي خلافت” مدعي باله، خو د دوی کړنو دا وښودله چې په عمل کې یې د اسلام د دښمنانو د پیاوړتیا لپاره ترټولو اړین کارونه ترسره کړل، د داعش یو له مهمو او پټو خدماتو څخه په اسلامي هېوادونو کې د علمي او کلتوري چاپیریال ویجاړول او په پایله کې، د فکري او علمي کدرونو جبري مهاجرت ته اړ کول وو.
دا لړۍ لامل شوه چې اسلامي ټولنې له خپلو ځلانده استعدادونو بېبرخې شي او دا استعدادونه د لوېدیځ په خدمت کې قرار ونیول شي؛ هغه لویدیځ چې تل له نړۍ د کدر او متخصصينو کسانو د جذب په لټه کې دی.
د داعش لومړۍ اغېزه د کدرونو، د پوهنتون استادانو، ډاکټرانو او ممتازو زده کونکو لپاره د ناامنه او ویرهانګېزه چاپیریال رامنځته کول وو. په عراق، سوریه او نورو سیمو کې چې داعش فعالیت درلود، په اکاډمیک مرکزونو، پوهنتونونو او حتی روغتونونو باندې د دوی وحشي برېدونو د کدر کسانو ژوند په نښه کړ.
د پوهنتون ډيری استادان او مسلکي ډاکټران دېته اړ شول چې د ځان او کورنۍ د ژغورلو لپاره له هېواده ووځي، هغه غوره زده کونکي چې د اسلامي ټولنې راتلونکی یې جوړولای شو د اروپا او امریکا په سفرونو شروع وکړه او په دې توګه، داعش په غیر مستقیم ډول د لویدیځ د ګټې لپاره د “اسلامي سیمو د کدري مغزو پاکوالي” پروژه پلي کړه.
باید وویل شي چې د تعلیمي او څیړنیزو مرکزونو ویجاړول، د اسلام د دښمنانو لپاره د داعش یو بل خدمت وو، په پوهنتونو کې چاودنې، د کتابتونونو سوځول او د لابراتوارونو لوټ کول د ډلې د پالیسیو یوه برخه وه، د دې ویجاړتیا پایله د پوهنتونونو تړل او د علمي پروژو بندول وو. په داسې وضعیت کې، طبیعي وه چې پوهان او څېړونکي نور هیڅ هیله د خپل هېواد د خدمت لپاره ونه لري او د امن هېوادونو لوري ته مهاجر وکړي.
دا هغه څه وو چې لویدیځ غوښتل: د اسلامي ټولنو علمي بنسټونه کمزوري کړي او خپل پوهنتونونه او څېړنيز مراکز پیاوړي کړي، لویدیځ هېوادونه د کلونو راهیسې د بهرنیو استعدادونو د راجلبولو لپاره پراخ پروګرامونه پلي کړي، له تحصیلي بورسونو نیولې تر ډاکټرانو او انجینرانو لپاره د زړه راښکونکي دندو وړاندیزونو پورې.
هغه کدرونه چې ممکن هیڅکله یې د خپل ټاټوبي د پرېښودو اراده نه درلوده، د داعش د ګواښ او د علمي چاپیریال د سقوط له امله پرته له مهاجرت بله چاره ونه موندله، په حقیقت کې، داعش د یوه پل په څېر عمل وکړ چې د اسلامي نړۍ استعدادونه یې د غرب پر لور روان کړل.
دغو مهاجرتونو د لویدیځ لپاره لویې لاسته راوړنې درلودې: د مسلکي کسانو د کمښت بشپړول، د علمي څېړنو پیاوړتیا او د پوهانو د روزنې لګښتونه صفر ته کمول.
د اسلامي ټولنو علمي او فکري کدرونو کمښت هم جدي پایلې درلودې؛ روغتونونه له متخصصو ډاکترانو پرته پاتې شول، پوهنتونونه له تجربه لرونکو استادانو بېبرخې شول او ځوان نسل خپل علمي او فکري الګو له لاسه ور کړه، په ډېری هېوادونو کې، علمي شاتګ او په غرب پورې تکیه نوره هم زیاته شوه، ځکه چې متفکرو کسانو د وطن پر ځای د اروپا او امریکا په لابراتوارونو او روغتونونو کې کارول کېدل.
دا علمي او کلتوري وروسته پاتې والی هغه څه وو چې د اسلام دښمنان یې په لټه کې وو. داعش، د خپل اسلامي ظاهري بڼې او خپلو ځلیدونکو شعارونو سره، په عمل کې د نوي استعمار ورته موخې پلي کړي: د اسلامي ټولنو کمزوري کول له دننه څخه.
هغه څه چې داعش مسلمانو ملتونو ته وړاندې کړل د ویجاړتیا، ترهګري او ناامني پرته بل څه نه وه؛ مګر د لویدیځ لپاره، دا یو زرین فرصت و چې د اسلامي نړۍ کدر استعدادونه جذب کړي او د استعماري او نظامي موخو لپاره ترې کار واخلي. په دې توګه، داعش نه یوازې د لویدیځ لپاره یو خیالي دښمن و، بلکې په عمل کې د لویدیځ د تمدن د پیاوړتیا او د اسلامي امت د کمزوري کولو لپاره یو بشپړ خدمتګار شو.
