د کابل بانک پر نمایندګۍ د برید طراح په پېښور کې وژل شوی.

المرصاد ته سرچینو ویلي چې په پېښور کې د نامعلومو وسله والو په برید کې یو مهم داعشی وژل شوی دی.
باخبرو امنیتي منابعو المرصاد ته ویلي چې د زلمي بدخشي په نوم د داعشیانو د خراسان څانګې مهم عملیاتي طراح د پېښور په شاه کس سیمه کې نامعلومو وسله والو وژلی دی.
د سرچینو له قوله، زلمی بدخشی، چې د داعش د خراسان په څانګه کې د سلمان په نوم هم پيژندل کېده، د ۲۰۲۵ میلادي کال په اکتوبر مياشت کې له افغانستان څخه فراري شو او په خیبر پښتونخوا کې د داعشیانو فعالو مرکزونو ته ولاړ.
د معلوماتو په اساس، نوموړی په کندز ښار کې د ۲۰۲۵ ميلادي کال د فبروري میاشتې په ۱۱مه نېټه د کابل بانک پر نمايندګۍ باندې په ترسره شوي بريد کې مستقيماً دخيل و او ياد بريد يې طرحه کړی و.
د یادوني وړ ده چې په افغانستان او بلوچستان کې تر ځپل کېدو وروسته، داعشیانو اوس خپل مرکزونه د تیراه جبارمیلې، توردرې، اورکزیو او شلمان ته انتقال کړي، خو هلته هم د افغانستان د اسلامي امارت د ځواکونو لخوا په نښه شوي دي.
د فبروري په ۲۸تمه، د تیراه په تور دره کې د دوی پر مرکزونو د لیزري دوربینونو په توسط عملیات ترسره شول، چې لس تنه داعشیان پکې ووژل شول. همداراز، د مارچ په لومړۍ نېټه د اورکزیو د غلجو په تورکاڼي او نریک سیمه کې په یوه برید کې د حاجي الرحمن (ابو ناصر) او ملا فاروقي په نومونو د دوو مهمو داعشي قومندانانو په شمول ۹ داعشیان ووژل شول.