د غزې تونلونه، چې نن یې خلګ د ستراتیژیکې او نه ماتېدونکې وسلې په نوم یادوي، تر ځمکې لاندې یوه پټه نړۍ ده؛ هغه نړۍ چې د فلسطیني مجاهدینو د کلونو زحمت، استقامت او خاموش جهاد پکې نغښتی وو. د کلکو محاصرو، دوامداره څارنو او سختو شرایطو باوجود، دغو اتلانو تونلونه وکیندل، پراخ یې کړل او بیا یې د جګړې په میدان کې وکارول.
مجاهدین به ناڅاپه له تونلونو راڅرګند شول، برید به یې وکړ، دښمن ته به یې درانه تلفات واړول، غنیمتونه به یې ترلاسه کړل او بیا به د ځمکې د سینې په کوم ژور لوري کې یو دم ورک شول. دا تکتیک د اسرائیلي پوځ لپاره د داسې معما په توګه بدل شو چې حل یې ناشونی و. لکه څنګه چې رسول الله صلی الله علیه وسلم د خندق کیندل د جګړې د بریا یو غوره تدبیر وګرځاوه، همداسې د غزې د مجاهدینو تونلونه د اشغالګرو د ماتولو لپاره یوه نوې، پټه او عاجزونکې لاره وګرځېده.
د ځمکې لاندې د لوږې او اکسیجن سره جګړه:
په دغو تونلونو کې ځینې ځوانان شهیدان شول، ځینې د اشغالګرو لخوا هغه مهال ونیول شول چې د خوړو او اوبو د لټون لپاره بهر راوتلي وو او ځينې لا هم نادرکه دي. حیرانوونکې دا ده چې څنګه نوي ځوانان د څو شپو او ورځو لپاره د ځمکې لاندې، بې له اوبو او بې له خوړو ژوند کوي؛ خو بیا هم په لاس کې قرآنکریم لري، تلاوت کوي، د شپې په تیاره کې د خپل رب مخې ته ولاړ وي او په تونلونو کې یې له زړونو تودې ژړاګانې راپورته کېږي.
هغوی د دې دنیا هغه آسانه د (تنفس) نعمت، چې هر انسان یې لري، هم له لاسه ورکړی. د اکسیجن د کموالي له امله هره شېبه د ژوند او مرګ تر منځ به انتظار وو، خو د ایمان رڼا یې زړونه داسې روښانه کړي وو چې د تیارو هغه نړۍ ورته رڼا ښکاريده.
هغه مجاهد چې د تونل په تیارو کې د ساه بندۍ سره جګړه کوي، د لوږې سختې شپې تېروي، د پردیسۍ سلګونه شپو ته غاړه ږدي، د خپلو ملګرو له غږه محروم وي، د خپلوانو له حاله ناخبره وي او د سیمې او نړۍ له روان وضعیته هیڅ معلومات نه لري چې څه شوي او څه روان دي؛ خو بیا هم نه شکايت کوي، نه ستړی کېږي او نه تسلیمېږي، د هماغه احسان په ټول امت باندې پروت دی؛ ځکه هغه د خپل ایمان، صبر او استقامت په وینو د تاريخ پاڼې رنګينې کړې.
ای د غزې غيرتمنو مجاهدینو!
تاسو نېکمرغه یاست. تاسو د نړۍ له وحشي دښمن سره په تشو لاسونو مقابله پیل کړه. له سیمه ییزو خيانتونو او نړیوالو بندیزونو سره مخ شوئ، خپلو او پردیو یوازې پرېښودئ، خو تاسو نه مات شوئ، نه کمزوري شوئ او نه مو د ایمان بیرغ راپرېوت.
تاسو په دې سخت امتحان کې بریالي پاتې شوئ. خپل آخرت مو روښانه کړ او په الهي مینه کې رښتیني ثابت شوئ.
ستاسو ژوندي دې الله سرلوړي لري، او ستاسو شهیدان دې الله تعالی د خپل قرب او دیدار په نعمت ونازوي. آمین
