څو ورځې وړاندې د اردن پاچا، دویم ملک عبدالله د دوه ورځني رسمي سفر لپاره پاکستان ته راغی؛ هغه شخصیت چې ډېری خلک یې د یوه اسلامي هېواد د پاچا په توګه نه، بلکې د صهیونیستي رژیم د غیر رسمي استازي په توګه پېژني.
د کارپوهانو په وینا، د پاچا عبدالله سفر پاکستان ته له وروستیو پېښو او د افغان حکومت سره د پاکستان له شخړو بېارتباطه نه دی؛ هغه ویجاړونکي فعالیتونه چې ډېری یې وايي له دننه نه، بلکې د پاکستان له دباندې امر او تنظیمېږي.
په همدې ترڅ کې پاکستاني سناتور مولانا عطاالرحمن هم په افغانستان کې د پاکستان وروستی یرغل د بهرنیانو امر وباله او زیاته یې کړه چې له افغانستان سره جګړه د پاکستاني ولس اراده نه، بلکې د لویو قدرتونو هغه سناریو ده چې د دغه هېواد د پوځ له لوري پلي کېږي.
په پاکستان کې د اردن د پاچا شتون د اسرائيلي رژیم د پردې تر شا د پاکستان له اړیکو یوه بېلګه ده؛ ځکه په همدې ورځو کې په لندن کې د نړیوال نندارتون پر مهال د پاکستان په غرفه کې د اسرائیلي رژیم د استازي حضور هم ډېر شور او غوغا راپورته کړې ده.
له لندن نړیوال نندارتونه خپره شوې یوه لنډه ویډیو، چې په ټولنیزو رسنیو کې لاس په لاس ګرځي، ښيي چې د اسرائیلو د ګرځندوی وزارت عمومي رئیس د پاکستان غرفې ته ورغلی او د پاکستان د لومړي وزیر د ګرځندوی سلاکار سردار الیاس خان له لوري په تود هرکلي نازول کېږي.
په همدې حال کې مشهور سیاسي شنونکی مایکل کوګلمن د دې لیدنې په اړه وايي چې له اسرائیلي چارواکي سره د پاکستاني چارواکي لیدنه او تر هغې وروسته رامنځته شوی جنجال ښيي چې په پاکستان کې د ولسي افکارو او د واکمنو مخورو په چلند کې ژور واټن موجود دی.
د ده په وینا، که څه هم د پاکستان عام ولس د صهیونیستي رژیم په اړه منفي نظر لري، خو د دغه هېواد چارواکو او پوځي څېرو په تېرو کلونو کې له اسرائيلو سره بېلابېلې غیر رسمي اړیکې لرلي دي.
خو د پاکستان د وروستیو اقداماتو تر شا یوازې صهیونیستي رژیم نه، بلکې د امریکا څرګند حضور هم لیدل کېږي؛ هغه ادعا چې څو ورځې مخکې د نیویارک ټایمز د خپرېدلي راپور له مخې نوره هم پیاوړې شوې؛ ټایمز په یاد راپور کې ویلي چې پاکستان د ټرمپ د پام راجلبولو لپاره میلیونونه ډالر ورکړي دي.
دا ټول په داسې حال کې دي چې د پاکستان ولس له فقر، بیکارۍ او اقتصادي کړکېچ سره لاس او ګرېوان دی او دغه هېواد له نړیوال بانک او نړیوال صندوق په پور اخیستونکو هېوادونو کې د سر په کتار کې ولاړ دی؛ خو د اسلامآباد حکومت په واشنګټن کې میلیونونه ډالر لابي ګرۍ ته ځانګړي کړي دي.
د نیویارک ټایمز په وینا، د دې لویو لګښتونو موخه د دونالد ټرمپ توجه او رضایت تر لاسه کول و؛ هغه رضایت چې د افغانستان پر خاوره د برید او د سیمهییز امنیت د ګډوډولو لپاره ترې استفاده کېږي، څو واکمنان وکولای شي د پاکستان پر مظلوم ولس د خپل واک عمر یو څه نور هم وغځوي.
پاکستان ته د ملک عبدالله راتګ، له پاکستاني لوري سره د صهیونیستي رژیم د استازي لیدنه او د نیویارک ټایمز هغه راپور چې وایي پاکستان د ټرمپ د پام د راجلبولو لپاره میلیونونه ډالر لګولي، د پاکستان د پوځي رژیم د چارواکو اصلي څېره تر هر وخت روښانه کړې ده. اوس نه یوازې عام ولس، بلکې حتی یو شمېر حکومتي چارواکي هم د فلسطین د وګړو د آرمان په اړه د پاکستان د خیانت خبرې کوي.
پر همدې اساس، د پاکستان سناتور مشتاق احمد خان په خپل ایکسپاڼه کې په خپور شوي پوسټ کې د دې هېواد د نظامي رژیم چارواکو ته په خطاب کې لیکلي:
«د ټرمپ مینهوال، یا د ټرمپ غلامان! هر هغه څوک چې د صهیونیستي رژیم دوست وي، خاین دی، خاین دی!»
هو، پاکستان غدار دی، د دین، خپل ملت، د فلسطین د ځوریدلي خلکو او د ټولو هغو باوجدانه خلکو غدار دی چې د صهیونیستي رژیم او فلسطین ترمنځ په جګړه کې د مظلومو فلسطیني خلکو ملاتړ کړی دی.
