د هغو کبیره ګناهونو په دوام کې چي خوارج پرې مبتلا دي، ځينې نور یې په لاندې ډول دي:
۲۳: الطعن فی السنة و اهل السنة (په سنت، احادیثو او د اهل السنة خلګو بد ویل یا رد کول
سنت د اسلام دوهمه سرچینه ده، او اهل السنة هغه خلګ دي چې د قرآن او د پیغمبر صلی الله علیه وسلم سنت تعقیب کوي، څوک چې سنت یا اهل سنت ته بد وايي، هغوی د اسلام اساسي اصول ردوي.
الله جل جلاله په قرآن عظيم الشان کي فرمايي:”وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا”(الحشر: 7)
ژباړه: هغه څه چې رسول در کړي، هغه واخلئ، او له څه چې یې منع کړي یاست ، له هغه نه ځان وساتئ.
رسول الله صلی الله علیه وسلم فرمایي:
“علیکم بسنتی و سنة الخلفاء الراشدین المهدیین، عضوا علیها بالنواجذ.”(ابوداود، ترمذي)
ژباړه: پر تاسې لازمه ده چې زما پر سنت (طریقه) او د راشدینو خلفاوو پر سنتو عمل وکړئ؛ په خپلو غاښونو یې کلک ونیسئ.
او په بل حديث کي نبی علیه الصلاة والسلام فرمايي: أهل سنت هغه کسان دي چې زما او زما د اصحابو پر طريقه روان دي.
لکن خوارج د سنت او اهلسنتو منکر دي ،خوارج د صحابهوو سپکاوی کوي (لکه علی رضی الله عنه)، او سنتو ته ارزښت نه ورکوي، هغوی هغه علماء کرام او مجاهدین چي د صحابه کرام پر لار روان دي، شهيدان کوي، دوی یوازې د قرآن لفظي معنی اخلي، خو د رسول الله تفسیر او سنت نه مني.
۲۴: التشبیه بالنساء (د ښځو سره ځان ورته کول، که په لباس، حرکت، خبرو یا عادتونو کې وي)
دا یو حرام عمل دی چې نارینه ځان د ښځو په شان جوړ کړي، ځکه دا د فطرت خلاف دی، رسول الله صلی الله علیه وسلم فرمایي:”لعن الله المتشبهين من الرجال بالنساء والمتشبهات من النساء بالرجال.”(بخاري)
یعني: الله لعنت کړی پر هغو نارینهوو چې ځان د ښځو په څېر کوي، او هغو ښځو چې ځان د نارینهوو په څېر کوي.
علامه ابن کثیر الدمشقی رحمه الله فرمايي: خوارج د افراط او تکفیر سره سره په ډيرو فاسدو افعالو هم تورن دي له هغه جملې څخه: دښځو له صفاتو سره ځان مشابه کول (په جامو ،غږ،حرکاتو) د افراطي زهد په نامه د فطرت خلاف ژوند کول.
۲۴: التزویر. (د حق پټول، درواغ ویل، یا د دین په نامه خلک دوکه کول)
تزویر یوه ستره ګناه ده، ځکه دا خلک له رښتینې لارې اړوي، او د فساد سبب کېږي، الله ج فرمایي “وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ وَأَنْتُمْ تَعْلَمُونَ” (البقره: 42)
ژباړه: حق (رښتیا) له باطل (دروغو) سره مه ګډوئ، او حق مه پټوئ، حال دا چې تاسې پوهېږئ.
رسول الله صلی الله علیه وسلم فرمایي:”من غش فليس منا.”(مسلم)
یعني: څوک چې دوکه وکړي، زموږ له امت نه دی.
خوارج د دین په نامه خلګ وژني، او د تقویٰ، عدالت او خلافت په نوم خلګ غولوي، دوی د تقویٰ نقاب لري خو زړونه یې له بغض، تکفیر او فساد نه ډک وي.
