د داعش سره د مبارزې په پلمه د دیکتاتوري رژیمونو پیاوړتیا!
ډېر کلونه کیږي چې اسلامي امت د څو تنو مستبدو او دیکتاتورو واکمنانو په منګولو کې اسیر دی او هره ورځ د پخوا په پرتله د ډېرو رنځونو او مصیبتونو شاهد دی؛ هغه سختۍ چې ټولو له همدې دیکتاتورانو څخه سرچینه اخیستې ده.
بې له شکه د داسې مستبدو واکمنانو شتون هماغومره چې اسلامي امت ته زیان رسوي، د کفري نړۍ او د هغوی د ګټو لپاره ګټور ثابتېږي؛ ځکه دا بدنامې څېرې، پر واک د خپل بقا لپاره د غرب ملاتړ ته اړتیا لري او دا امر سبب شوی چې د کفر په خدمت کې د یوې وسیلې په توګه وکارول شي.
په دې پیړۍ کې، اسلامي نړۍ له بېمخینې ننګونو سره مخ ده؛ په داسې ډول چې د دې تر ټولو لویو او مرموزو ننګونو څخه یوه د داعش په نوم پدیده وه؛ یوه ډله چې د اسلام او مسلمانانو څخه د ملاتړ په دروغجن شعار سره، د کفري نړۍ په لاس کې د دیکتاتورانو د ساتنې لپاره په یوه ستراتیژیکه وسیله او وسله بدله شوه.
که څه هم لوېدیځو هېوادونو داعش د نړیوال امنیت پر وړاندې ګواښ معرفي کړ، رسنیو د دې ډلې د وحشت په اړه راپورونه ورکړل، لوېدیځو سیاستوالو پرې توندې ویناوې وکړې او د دې د له منځه وړلو په شعار سره نړیوال ائتلافونه جوړ شول، خو تر پردې شاته بل واقعیت روان و؛ داعش په ډېرو مواردو کې په هماغې زمانې او مکان کې راڅرګند شو چې د غرب او د هغوی د متحدینو ګټو ایجاب کاوه.
په سوریه کې، هغه مهال چې د بشار اسد حکومت د نسکورېدو په درشل کې و او ولسي پاڅون اوج ته رسېدلی و، د داعش ناڅاپي راڅرګندېدو معادلې په بشپړ ډول بدلې کړې، هغه ډله چې د اسد رژیم پر ضد مبارزې پر ځای، ډېری یې د رژیم پر مخالفینو تمرکز درلود او د روسیې هوایي بریدونو او د ایران پوځي مداخلې لپاره یې زمینه برابره کړه.
له بلې خوا، لوېدیځو قدرتونو هم د ترهګرۍ پر ضد مبارزې په پلمه، اسد ته د خپلو خلکو د ځپلو لپاره لاس خلاص کړ، په عراق کې هم ورته واقعه وشوه، په داسې ډول چې له کلونو اعتراضونو وروسته د اهل سنتو لخوا د نوري المالکي د حکومت پر ظلم او فساد، د داعش راڅرګندېدل یوه پلمه شوه چې دا اعتراضات د تروریستي حرکتونو په توګه وشمېرل شي.
د عراق حکومت د امریکا او نورو هېوادونو په مرسته، سنيمېشتې سیمې ورانې کړې او په زرګونو بې ګناه خلک د داعش پر ضد مبارزې په نوم ووژل شول یا بې کوره شول، که څه هم د داعش شتون په افغانستان دومره پام وړ نه و، خو غرب د دې ډلې له نوم څخه د خپل پوځي شتون د دوام، د تفرقه اچونې او د جهادي ځواکونو د کمزورۍ لپاره استفاده وکړه.
ان په ځینو مواردو کې داسې راپورونه خپاره شول چې ښودله یې هغه پرمختللې وسلې او تجهیزات چې ادعا کېده د ترهګرۍ پر ضد مبارزې لپاره چمتو شوي، پخپله د داعش لاس ته لوېدلي دي، ځینې مفاهیم لکه خلافت، جهاد، اسلامي حدود او آن اسلامي بڼه په داسې ډول له دې ډلې سره تړلي وو چې کله هم د حقیقي اسلام خبره کېده، ذهنونه د خوارجو منفورې ډلې ته ورتلل.
دا د غرب اصلي هدف و: د دین بد ښودل، د اسلامي مفاهیمو څخه د ملتونو وېرول او د لاسپوڅو دیکتاتورانو لخوا د مسلمانانو د ځپلو قانوني کول، په حقیقت کې، داعش د یوې لویې پروژې پر څېره یو ماسک و؛ یوه پروژه چې هدف یې د موجوده نظم ساتل، د ولسي حرکتونو خفه کول، او ملتونه د هغو دیکتاتورانو لمن ته بیا اچول وو چې مخکې تر دې، د ظلم او فساد له امله د نسکورېدو په حالت کې وو.
