نن شنبه (۲۹ رمضان / ۲۹ مارچ) په بلوچستان کې د بلوڅانو پر یوه لاریون د داعشیانو له لوري ناکام برید ترسره شوی دی.
د راپورونو له مخې، نن سهار د مستونګ په لکپاس سیمه کې یوه داعشي غوښتل چې د پاکستاني رژیم د پالیسیو پر ضد پر جوړ شوي لاریون او د هغه پر تنظيموونکي، سردار اختر مینګل، باندې برید وکړي، خو تر پېژندل کېدو وروسته یې د تيښتې په حال کې په ځان پسې تړلو چاودېدونکو توکو ته چاودنه ورکړه او ووژل شو.
په لومړنیو راپورونو کې لاریونوالو ته د اوښتو تلفاتو په تړاو څه نه دي ویل شوي.
د یادونې وړ ده، له تېرو څو ورځو راهیسې په بلوچستان کې د سردار اختر مینګل په مشرۍ بلوڅانو د خپلو فعالانو او خپلوانو د نیول کېدو او ژوندي ورکېدو په غبرګون کې لاریونونه پیل کړي او د اسلام آباد له رژیمه غواړي چې خپلو ظالمانه کړنو ته د پای ټکی کېږدي او د دوی حقوق ورکړي.
هېره دې نه وي چې د سردار اختر مینګل نوم په هغه ليست کې موجود دی چې د ٢٠٢٤ز کال د جولای په ١٠مه نېټه د داعشي فتنه ګرو له یوې مهمې شبکې څخه ترلاسه شوی و او په پاکستان کې د داعشيانو لپاره مطلوب اشخاص پکې په نښه شوي وو. یاد ليست په تېره اکتوبر میاشت کې المرصاد خپور کړی و او دلته یې کتلای شئ.
په مستونګ کې د داعشیانو د خراسان څانګې او پاکستان ولایت د رهبرۍ او جنګیالیو فعال مرکزونه شته او دا ناکام برید یې د دې ښکارندويي کوي چې د پاکستاني رژیم د اهدافو او پوځي ادارې د مخالفینو د له منځه وړلو لپاره په مستقیم ډول کارول کیږي.
