د اسلامي ښارونو ورانول:
د کفري نړۍ لپاره د داعشي خوارجو یو بل خدمت د مسلمانمېشتو ښارونو او سیمو ورانول ګڼلای شو؛ داسې چې داعشي خوارجو چې هر چېرته قدم کېښود، هغه سیمه په داسې کنډوالو بدله شوه چې بیا رغول یې ناشوني و او د ښارونو څېره یې په بشپړه توګه بدله کړه.
په دغو ښارونو کې د خوارجو له خوا وراني په پراخه کچه وه، چې ډېری زیربناوې، کورونه، روغتیایي مرکزونه، روغتونونه، تاریخي اثار او ځایونه، حتا ښوونځي او جوماتونه هم په اعظمي توګه یا په بشپړه توګه ویجاړ شوي و.
په هغه موده کې چې داعشي خوارجو پر عراق سیوری غوړولی و، د موصل ښار چې د عراق دویم لوی ښار و او له دوه میلیونو څخه ډېر وګړي یې لرل او د عراق د اقتصادي او فرهنګي مرکز په توګه شمېرل کېده، د هغه ۸۰٪ لوېدیځې برخې په ځانګړې توګه لرغونې سیمې په بشپړه توګه ویجاړې شوې.
د حدباء مناره او د النوري جومات چې شاوخوا ۱۱۷۲ میلادي کال (شپږمه هجري پېړۍ) کې د نورالدین زنګي په وخت کې جوړ شوی و او له ۸۴۰ کلونو څخه یې ډېره لرغونتیا درلوده، هم په ۲۰۱۷ کال کې هغه مهال ویجاړ شو، چې د موصل ښار د داعش تر ولکې لاندې و.
د سوریې په رقه ښار کې، یو بل ښار دی چې د داعشي خوارجو د شوم حضور قرباني شو؛ دغه ښار شاوخوا ۷۰ تر ۸۰٪ په بشپړه توګه ویجاړ شو او له یوولس زرو څخه ډېر کورونه چې د سوریې د مسلمان او کړېدلي ملت سرپناه وه، د روغتونونو او ښوونځیو په ګډون په ایرو بدل شول.
هغه مهال چې داعشي خوارج د خپل خیالي خلافت پراخولو باندې بوخت وو، د دغې منفورې ډلې تګلاره د لیبیا په سرت ښار کې هم پلي شوه؛ هغه ښار چې په ډېره لنډه موده کې ۶۰ تر ۷۰٪ ویجاړ شو، چې له هغې جملې څخه د استوګنې سیمې او ښاري زیربناوې لکه سړکونه او روغتونونه هم له منځه لاړل.
د سوریې الباغوز کوچنی ښار، چې د خوارجو تر واک لاندې یو له وروستیو سیمو څخه و چې د ډېرو جګړو او ورانیو شاهد و؛ هغه جګړې چې د خوارجو د نامبارک نامه له برکته، د دغه ښار ۹۰٪ ویجاړېدو لامل شوې او ډېری کورونه او سړکونه ویجاړ شول.
د سوریې په حلب او دیرالزور او د عراق په الرمادي او فلوجه کې ښارونه چې د سنيمېشتو سیمو په توګه یادېدل، پر دوی د داعش له واکمنۍ وروسته، سخت زیانونه ولیدل او ډېری زیربناوې یې په بشپړه توګه له منځه ولاړې او په دې توګه هغه اسلامي ښارونه چې داعشي خوارجو پکې قدم کېښود، یو په بل پسې ویجاړ شول.
