المرصاد له خپلو سرچینو څخه معلومات ترلاسه کړي چې د تېرې چهارشنبې په شپه د پکتیکا د برمل ولسوالۍ په څلورو سیمو د پاکستاني تیري ګر پوځ په هوایي بریدونو کې محلي افغانانو ته هم مرګ ژوبله اوښتې.
ویل کېږي د شهیدانو په جمله کې له ۱۵ څخه زیات کسان یې افغاني ښځې او ماشومان دي چې زیات یې د یوې کورنۍ دي. پاتې دې نه وي چې په دې وحشیانه برید کې په شهادت رسېدلي له ۵۰ کسانو څخه یې زیاتره د وزیرستاني مهاجرینو بې ګناه ښځې او ماشومان دي. په دې سره د پاکستان د تیري ګر پوځ هغه ادعا چې دوی په افغانستان کې خپل وسلوال مخالفین په نښه کړي، ناسمه ثابته شوه او د دوی پر وړاندې د نړیوالو اصولو له مخې هر ډول انتقامي عمل ته مشروعیت ورکوي.
د کارپوهانو له انده، دا څنګه کېدلای شي چې په جنوبي او شمالي وزیرستان کې دې په پاکستاني امنیتي کسانو وسلوال تعرضي او انفجاري بریدونه له افغانستان څخه تنظیم او ښځې او ماشومان دې یې سرته ورسوي؟ ځکه یو خو په فرضي کرښه کې ازغن تار، خندقونه او موانع دي او زیاتې سیمې غرنیزې دي، له بلې خوا دا سیمې له فرضي کرښې څخه ډېرې لېرې دي او له مخکې څخه هلته د پاکستاني تیري ګر پوځ او قبایلو تر منځ جنګونه او شخړې روانې وې، څو ځله یې تر منځ د سولې تړونونه هم شوي دي.
هغه مهال هیڅ وزیرستانی وګړی په افغانستان کې نه وو. په حقیقت کې د پاکستان تیري ګر پوځ غواړي په دې سره قبایلي سیمې د تل لپاره تسخیر کړي، د قبایلي حیثیت له منځه تګ یې تضمین کړي، له خپلو داخلي ستونزو څخه د خپل ولس توجه بلې خواته واړوي، د امنیت په قایمولو کې خپلې ناکامۍ پټې کړي او خپله هغه جنګي ستراتیژي چې د خپلو جنرالانو د مسترح ژوند لپاره پرې پیسې او لګښتونه لاسته راوړي، د تېرو څو لسیزو په څیر مخته بوزي چې عواقب به یې د سیمې امنیت ته ډېر زیات زیان رسوونکي او هیڅوک به ترې خوندي پاتې نشي.
