په داسې عصر او زمانه کې چې هره ورځ په سلګونو فلسطيني ماشومان د اسرائيلو د صهيونستي رژيم تر بمباريو لاندې په وينو کې رنګیږي، د «نړيوالې جنايي محکمې» په نوم يوه محکمه د بشريت پر وړاندې دا ټول جرمونه او جنايتونه له پامه غورځوي، او د افغانستان د اسلامي امارت هغه مشران چې له کلونو جهاد او مبارزې وروسته يې په زړورتيا او مېړانه په خپل هېواد کې خپلواکي، امنيت او ارامي ټينګه کړې، په بند او محاکمې ګواښي.
دا هماغه عدالت دی چې لوېديځ پرې وياړي؛ هغه عدالت چې د غزې د ماشومانو پر وژنه سترګې پټوي، خو په افغانستان کې د هغو کسانو د محاکمې په لټه کې دی چې دې خاورې ته يې امنيت راوستی دی.
د افغانستان اسلامي امارت د خپل حکيم او مدبر مشرتابه په مشرۍ، له کلونو ناامنۍ او جګړې وروسته خلکو ته سوله او ثبات راوړی دی، د دې حکومت قوانين له اسلامي شريعت څخه اخيستل شوي؛ هغه شريعت چې پېړۍ پېړۍ يې بشريت ته عدالت راوړی، خو نن د لوېديځ په محکمو کې د بشريت ضد جرم په توګه محکومېږي! ايا دا هماغه عدالت دی چې نړۍ پرې وياړي؟
نړيوالې محکمه، دې بې واکه ادارې په وار وار ثابته کړې چې يوازې د سترو قدرتونو په لاس کې يوه وسيله ده، دا محکمه چې د اسرائيلو د وژنو په وړاندې چوپه خوله ده، نن د هغه مشرتابه پر وړاندې حکم صادروي چې توانېدلی افغانستان د اشغالګرو له منګولو وژغوري.
ايا دا ښکاره تبعيض په خپله يو ستر جنايت نه دی؟ ايا د غزې نارينه، ښځې او ماشومان انسانان نه دي؟ ولې ستاسې په خپله جوړ شوي قوانين هغوی نه شاملوي؟ ولې د اسرائيلو صهيونستي رژيم نه محاکمه کوئ؟
د اسلامي امارت مشر، يو داسې سړی دی چې په تدبير او پوهې سره يې افغانستان د جګړې له ګړنګه د امنيت ساحل ته رسولی دی، هغه چې تل پر اسلامي عدالت ټينګار کوي، نن د يوې داسې ادارې له خوا تورنېږي چې پخپله د لوېديځو سياستوالو تر سيوري لاندې کار کوي، دا هماغه محکمه ده چې ان د غزې د ماشومانو د قصاب یعنې نتانياهو پر وړاندې يې د نيولو يو حکم هم نه دی پلي کړی.
نن ورځ نړۍ د عدالت د يوې مسخره نندارې شاهده ده؛ هغه عدالت چې يوازې د کمزورو لپاره پلي کېږي، خو د افغانستان خلک په خپل ټينګ ايمان سره، پوهېږي چې يوازې الهي عدالت دی چې پر نړۍ به واکمن شي، د لوېديځ جوړې شوې محکمې به هېڅکله ونه شي کړای چې زموږ د مشرانو مشروعيت تر پوښتنې لاندې راولي.
رښتينی عدالت هغه دی چې د قرآن کريم له ژوند بخښونکو آيتونو څخه اخيستل شوی وي، نه د بې واکه محکمو په سپارښتي حکمونو کې؛ بايد هېره نشي چې هغه سياسي محکمې چې د قدرت د بادارانو تر څارنې لاندې د حقيقت ريښو ته تېشه وهي، زموږ له نظره هېڅ صلاحيت او موضوعيت نه لري او حکمونه يې لغوه دي.
