ملکي وګړي، په ځانګړي ډول ښځې او ماشومان د جګړې په ټولو قوانینو، ملي او نړیوالو کنوانسیونونو کې خوندي اعلان شوې او ضرر رسول ورته غیر قانون چلند او د بزدلۍ نښه ده، د اسلام مبارک دین خو بیا ورته بیخي لوړ درناوی کړی او د انساني کرامت په خوندیتوب کې یې تر ټولو لوړ مقام ورکړی دی.
خو ځینې ډلې او ذهنونه شته چې د خپلې اصلي او وحشي څېرې د را څرګندولو لپاره، یا د خلکو په منځ کې د رعب او خپل ناوړه کرکټر د معرفي کولو لپاره له ښځو او ماشومانو سره له ناوړه چلند څخه کار اخلي.
داعش خوراج هم په خپل تاسیس او مخینه کې ګڼې داسې پېښې او قضیې لري، چې له ښځو، بوډاګانو او ماشومانو سره یې ناوړه چلند کړی دی، که د نړیوالو رسنیو راپورونه تعقیب شي، دغه ډلې په عراق او بیا سوریه کې په ګڼو مواردو کې پر هغو سیمو او کلیو د یرغل پر مهال د ملکي وګړو پر شخصي حریم او سیمو تېری کړی او هره ناروا یې تر سره کړې ده، چې ګڼو ته یې سالم انسان ګوته په غاښ پاتې کېږي.
ملکي وګړو ته د زیان رسولو په بېلابېلو طریقو کې د هغوی وحشي بڼه په ځينو لاندې موردونو کې څرګندولی شو:
جنسي مریتوب: دا چې د داعش اکثره غړي تنکي غولول شوي ځوانان دی، د مجردۍ ژوند یې کړی او لا یې هم د کور او کورنۍ د تشکیل اجاره نه درلوده، دوی ته یې د جنسي بردګۍ ژمنې ورکړې دي، په اکثره پېښو کې چې دوی کومه سیمه په خپل وحشت لاندې کړې ده، بیا یې ښځې او نجونې هم له ځانونو سره په زور تښتولي او د جګړې د غنیمت په سترګه یې ورته کتلې دي.
دا ښځې یې له ځانونونو سره ساتلې او جعلي نکاح ګانې یې ورسره کړې دي، حتی مېړوښې ښځې یې هم خپلې مېرمنې ګرځولې او له خپل مرګ وروسته یې پر نورو غړو سپارلې دي، ګڼې نورې یې بیا له ځانونو سره ساتلې او ناوړه استفادې یې ورڅخه کړې دي.
جبري ودونه: په داعشي خوارجو کې هغه چې د دین او شریعت څخه یې ناوړې استفادې کړې دي، د اصولو له مخې یې د نیولو سیمو د وګړو ګڼ شمېر ښځې په زور او جبر نکاح کړې دي، حتی تر دې پورې یې وحشت کړی دی چې مېړوښه ښځې یې هم ځان او خپلو افرادو ته نکاح کړې دي، په دغه جبرې وادونو کې داسې پېښې هم لري چې د ښځو د انکار په صورت کې یې هغه د نافرمانۍ په صورت کې وژلې دي.
له بله اړخه یې د ښځو اړوندې کورنۍ او خپلوان هېڅ په جریان کې هم نه دي اچولې، ځکه دا ډول اکثره نکاح ګانې په زور او له اختطاف وروسته تر سره شوې دي، په دې اساس ویلی شو چې د دوی په کورنیو کې ټولنیز ثبات نشته او په ډېر لوړ تاو تریخوالي کې ژوند کوي.
د ماشومانو ګومارل: د داعشي خوارجو په لیکو کې ډېر ځله کم عمره ماشومان او تنکي ځوانان، چې لا قانوني سن ته نه دي رسېدلي، په زور بیول شوي او بیا یې د جګړې په لیکو او نورو پوځي خدمتونو کې ګومارلي دي، چې ګڼ هغه یې د شاقه کارونو او وهلو ډبلو په سبب مړه شوي هم دي، دا ماشومان د هغوی د کورنیو پر وړاندې د زور او باج اخیستنې د وسیلې په توګه هم کارېدلي دي او بیا بیا یې کوښښ کړی دی چې د خپلو لا درکه زامنو د ور خوشي کولو په بدل کې ورڅخه پیسې واخلي او یا هم په بدل کې د همدې کورنیو مشران د جګړو او پوځي خدمت لپاره وګوماري.
د کورنیو او بېوزلو وګړو له مجبوریت څخه ناوړه ګټه اخیستنه د داعشي خوراجو د ورځني ژوند یوه برخه ده، ځکه چې په خپله خوښه به د هېڅ سالم فکر لرونکی چې له خپل دین او ارزښتونو معلومات لري، هېڅکله له یوې داسې ډلې سره نه یو ځای کېږي. د دوی مشران دومره بې رحمه دي چې حتی په ډېرو مواردو کې په خپلو اولادونو او ښځو او ماشومانو هم رحم نه کوي، ځکه یې د دوی د مخالفت په صورت کې یې هغه وژلي او له یا تري تم کړي دي.
