جعلي شریعت؛ د داعش د تحریف شوي فقهي نظام تحلیل
د داعش د فکري او ایډیولوژیکي بنسټونو تر څېړنې او تحلیل وروسته، چې ریښې یې د لرغونو زمانو او د اسلامي تاریخ د لومړیو پېړیو د خوارجو له ناسمو افکارو سره تړلې دي، له همدې ځایه دا بنسټیزه پوښتنه راولاړېږي چې دا تکفیري ډله څنګه خپلې وژنې، پوځي عملیات او د واکمنۍ کړنې د دین او شریعت تر نامه لاندې توجیه کوي؟
د دیني دروغپردازۍ میکانېزم جوړول او د اسلامي خلافت پر بنسټ د «خالص شریعت» د پلي کېدو دعوه، د داعش له اساسي ستنو څخه وه؛ ځکه همدغې لارې ته یې د افرادو او ځواکونو د جذب او همدارنګه د خلکو او ښارونو ترمنځ د پايګاوو د جوړولو لپاره تکيه کوله. دوی د همدې میکانېزم په وسیله، د خپلو مخالفینو وژنه عبادت بلله او د خلکو د ښارونو او سیمو غصب یې «فتح» نوموه. هغوی په بېسارې سپینسترګۍ او بېشرمۍ سره شریعت تحریف او جعل کړ.
له همدې امله، د داعش د منحرف فقهي نظام څېړنه د دې انحراف د ژوروالي د درک کولو بنسټیز کلي دی. دا مقاله استدلال کوي چې داعش، د یوې فرصتطلبې او ګټهغوښتونکې ډلې په توګه، د معکوسې انجنیرۍ له لارې، لومړی خپل سیاسي او پوځي هدفونه وټاکل، او بیا یې د دیني متونو د تحریف او جعل په وسیله د هغو لپاره فقهي او مذهبي پوښ جوړ کړ.
دا بهیر په درېیو عمومي محورونو کې څېړل کېدای شي:
۱) د دین د فهم په طریقه کې تحریف،
۲) په صادر شويو احکامو کې تحریف،
۳) د شریعت په وروستي هدف کې تحریف.
لومړی د دین د فهم په طریقه کې تحریف وو، داعش د خپلې خوښې فقه د جوړولو لپاره، د اصول فقه له هغو منل شويو میتودونو څخه واوښت چې د اسلامي مذاهبو او سترو مجتهدینو ترمنځ پرې اجماع موجوده ده. د داعش لومړنی او تر ټولو څرګند منهجي تحریف، د آیتونو او روایتونو د سياق او د نزول د سببونو نادیده نیول وو.
د بېلګې په توګه، دوی د قرآن کریم د جهادي آیتونو هغه سياق او سبب النزول له پامه وغورځاوه، چې د مشرکانو او کافرانو د جګړهيیزو هڅو په ځواب کې نازل شوي وو، او هماغه آیتونه یې د خپلو ناوړه موخو لپاره وکارول، څو د هر سیاسي او فکري مخالف پر وړاندې خپل بېځایه تاوتریخوالی او جنایتونه توجیه کړي.
دا چلند د ټولو اسلامي مذاهبو له منل شوې طریقې سره په ښکاره ټکر کې دی؛ ځکه د نص د سم فهم لپاره د هغه شالید او علت ته پام کول یو اساسي اصل ګڼل کېږي.
دوهم تحریف د شریعت د مقاصدو تعطیلول وو. اسلامي فقها پر دې اصل ولاړ دي چې د شریعت د احکامو وروستۍ موخه د دین، ژوند، عقل، نسل او مال ساتنه ده. خو داعش په عملي توګه دا ستر اسلامي او انساني اهداف تر پښو لاندې کړل. د بېګناه خلکو قتلعام، د بنسټونو او زېربناوو ویجاړول او د داسې ناامنۍ رامنځته کول چې د ټولنې بشپړ جوړښت له منځه وړي، د داعش په فقهي نظام کې د «خلافت د پلي کېدو لپاره د ځمکې چمتو کول» په څېر پلمو سره توجیه کېدل. دا په حقیقت کې د شریعت د اهدافو پر ځای د سیاسي او ډلهيیزو موخو کېنول وو.
درېیم تحریف، په قصدي او جوړښتي ډول پر جعلي، کمزورو او بېاساسه روایتونو تکيه وه. دې تکفیري او منحرفې ډلې د خپلو غیرانساني او غیر اسلامي کړنو او همدارنګه د خپلو آخرالزماني او جغرافیایي باورونو د توجیه لپاره، زیاتره هغو احادیثو او روایتونو ته استناد کاوه چې د رجال او حدیث په معتبرو کتابونو کې یې سند رد شوی یا کمزوری بلل شوی دی. دا ډول انتخاب څرګندوي چې د داعش معیار د سند کرهوالی نه و، بلکې دا چې آیا د روایت محتوا له مخکې ټاکل شوې ایډیولوژۍ او عقیدې سره سمون لري که نه.
نو څرګنده ده چې د داعش فقه یوه جعلي او قلابي فقه وه. دوی له پيله د جنایت نیت درلود او بیا یې د هغه لپاره دیني پلمه جوړه کړه. دا فقه د خلکو د هدایت لپاره نه وه، بلکې د دوکې، د ترهګرۍ د توجیه او د وېرې د خپرولو لپاره جوړه شوې وه. د دې دروغپردازۍ د میکانېزم درک کول ډېر مهم دي؛ ځکه دا څرګندوي چې داعش د اسلام له سترو دښمنانو څخه دی او د دین په تحریف سره یې د اسلام څېرې ته تر ټولو لوی زیان رسولی دی.
له داسې ديني ضد او انساني ضد تفکر سره مبارزه فکري هڅه غواړي او یوازې په وسلو نه شي کېدای؛ ځکه باید د خلکو ذهنونه له دې ډول جعلي برداشتونو، چې د اسلام په نوم وړاندې کېږي، پاک کړل شي.
