درېیمه برخه
خادم شېرزاد
عراقۍ ډاکټره (نغم نوزت) د مصري ژورناليست صلاح لبن سره يوه مرکه کړې وه، هغې په خپله مرکه کې ويلي:
کله چې داعش د عراق څه سيمې ونيولې او بيا بيرته دغه سيمې له داعش څخه پاکې شوې، نو زه په هغه ډاکټرانو کې وم، چې د دغه نيول شويو سيمو ته د کار لپاره لاړو، تر څو هلته له بند څخه را خلاصو شويو خلکو سره مرسته وکړو.
هغه زياتوي :
ما د ۱۲۰۰ انجونو او ښځو علاج وکړ او له هغوی مې پوښتنې وکړې، دغه ۱۲۰۰ انجونو او ښځو باندې يو نه يو وار جنسي تيری شوی وو او ځینې خو پکې لا داسې هم وې چې ډله ايیز جنسي تيری پرې شوی ؤ، چې د علاج په کولو کې يې مونږ له ډېرو ستونزو سره مخ شو، ځکه هغه ډېرې وېرېدلې او ډار شوې وې.
ځینې داسې انجونې هم په کې وې، چې هغوی په بازار کې په ډېرو کمو پيسو خرڅې شوې وې.
نغم نوزت وايي:
د نوبل جايزه کټونکي ناديه مُراد هم دغه را خلاصو شويو بنديانو کې وه او د هغې علاج ما کړی ؤ، هغې ډېرې ويرونکې کيسې وکړې.
نغم نوزت وايې: هغه ځای کې چې موږ کار کاوه، ۳۴۰۰ انجونې او ښځې له داعش ژغورل شوې وې، چې ۱۲۰۰ علاج يې ما او زما نورو ملګرو وکړ او له دوی مې پوښتنې وکړې، دغه را خلاص شويو ښځو مونږ ته ويلي ول، چې ۱۷۰۰ انجونې او ښځې لا هم د نامعلوم برخلیک سره مخ دی.
فاطمة الشوقي يوه ژورناليسته ده. هغې په ۲۰۱۷ کال کې د يوې يزيدۍ انجلۍ چې هيام نومېدله او داعش له بنده را خلاصه شوې وه، هغې سره مرکه کړې.
هيام په خپله مرکه کې ويلي:
ما د داعش سره درې کاله په بند کې تېر کړل، داسې ورځ نه وه، چې پر مونږ شکنجه يا پر مونږ جنسي تېری نه کېده.
هيام زياتوي: موږ د رقه سره نږدې په يو ستر باغ کې ساتل کېدلو، هلته تقريبا ۳۰۰۰ نورې انجونې هم وي، چې يا به خلک راتلل او پرې خرڅېدلې به، يا به داسې ورځ نه وه چې په هغوی جنسي تيری نه کېده او يا يې وهل نه خوړل.
هيام وايي: زما خور هم زما سره وه، خو هغه تر اوسه ورکه ده او هېڅ نه پوهېږم، چې چېرته ده ژوندۍ ده، که مړه؟
