څو ورځې وړاندي د اسلامي همکاریو سازمان په ۵۱ مه غونډه کې د افغانستان د بهرنیو چارو وزیر، مولوي امیر خان متقي صاحب د افغانستان په استازیتوب وینا وکړه، وینا یې نه یوازې دا چې د خپل رسالت رښتیني اداینه وه، ترڅنګ یې د مظلومې غزې غږ هم داسې اوچت کړ، لکه د فلسطین استازی چې د ممبر پر سر د بهرنیو چارو وزیرانو ته مخاطب وي.
خبرې یې لومړی د ایران په نوي کړکېچ را پیل کړې، چې د اسرائیلو بمبارونه یې د ایران د ارضي تمامیت بشپړ نقض وګڼل او په کلکه معنا یې وغندل، متقي صاحب د وینا په جریان کې په ټولو غړو هیوادونو غږ وکړ، چې مونږ د اسلامي نړۍ په توګه دا حق لرو، چې په خپلو اسلامي مشترکاتو سره راټول شو، زیاته یې کړه چې دا وخت او فرصت دی، چې اسلامي نړۍ د وروسته پاتي کېدو په عواملو ژور فکر وکړي او شته ننګونې له منځه یوسي، ترڅو د راتلونکي نسل لپاره داسې یو هویت وړاندي کړو، چې د پردیو پدیدو پر ځای په خپل اسلامي تاریخ او تمدن و ویاړي.
متقي صاحب د غزې پر لور ور تاو شو، د غزې روان وحشت یې د ټولو انساني اصولو خلاف وباله او دا یې د ټولې اسلامي نړۍ لپاره خطر وګاڼه، متقي صاحب بیا د اسلامي همکارۍ سازمان په غړو هیوادونو غږ وکړ، چې د فلسطین او ایران په ملاتړ، باید د اسرائیلو د روانو مظالمو مخنیوی وشي، د رژیم دا یرغل یې د فلسطیني وګړو نسل وژنه او د ټولو انساني حقوقو خلاف وباله او په وړاندي یې اقدام د ټول انساني ضمیر عاجله وجیبه وګڼله.
متقي صاحب وروسته بیا د اسلامي اخوت د جوهر را ژوندي کولو پر لور لاړ او ټولو اسلامي هیوادونو ته یې وویل چې باید په نوي بین المللي نظم کې یوازې د ناظر په حیث نه؛ بلکې د یوه پېژندل شوي، اغېزمن او تعریف کوونکي لوري په توګه ژوند وکړو، نوموړې په مکرر ډول بیا هیوادونه اسلامي اخوت ته راوبلل او و یې ویل: اسلامي نړۍ باید داسې واوسي، چې په تصمیم نیوونکیو لوریو ژور اغېز ولري.
له دې وروسته د افغانستان پر لور راوګرځېد او په افغانستان د قائم قیادت کړنلارې، اقتصاد، امنیت او نړیوالو اړیکو په برخو کې بېلا بېلې لاسته راوړنې یادې کړې، بیا یې زیاته کړه، چې امریکا د افغانستان سرمایه غلا کړې، چې له امله یې افغان ملت له ګڼو اقتصادي ننګونو سره مخ دی، په امریکا یې غږ وکړ، چې یاده شمتني باید له دې دومره ځنډ او خنډ وروسته ډېر ژر بېرته ازاده شي.
بیا یې زیاته کړه چې د افغانستان اسلامي امارت د بهرنیو اړیکو اساس متقابل درناوی او متوازن سیاست دی، نو د سازمان په غړیو هیوادونو غږ کوو، چې د افغانستان په څېر د هغو هیوادونو ملاتړ ته توجه وکړي، چې تازه د ثبات او ازادۍ تر پولو رسیدلي دي، اشاره یې سوریې ته وه.
او و یې ویل چې د افغانستان اسلامي امارت تیار دی، چې د اسلامي هیوادونو ترمنځ د ترانزیټ، سوداګرۍ او اقتصادي نښلون مهمه دروازه شي.
په پای کې یې بیا په غړیو هیوادونو غږ وکړ، چې د غزې د کړکېچ په اړه عاجل اقدامات وکړئ، تر څو د غزې په جغرافیې روان کړکېچ پای ته ورسېږي، دا راز د بشري مرستو په برخه کې باید ټول اسلامي هیوادونه عاجل اقدامات ترسره کړي.
دا د اسلامي اخوت په اساس ولاړه وینا بیخي خوندوره وه، پیل او پای دواړه د غزې په کړکېچ راوڅرخېد او ټول اسلامي هیوادونه د غزې ملاتړ ته دعوت شول، خو څوک به یې ومني، سعودي؟
هغه چې د ټرمپ لپاره البقرة الحلوب رول لوبوي.
که مصر؟ هغه چې د سیکولریزم مادې له یوه مخه د اسلامي اخوت انګېزه پکې وژلې ده.
که قطر؟ هغه چې د ټرمپ لپاره یې د انعام په توګه د میلیونونو ډالرو الوتکه ډالۍ کړه، خو د ترڅنګ او نږدې غزې د وږو غږونه او اسوېلۍ نه اوري.
که امارات؟ هغه چې د ټرمپ د ملاتړ لپاره یې خپلې سرتورسرې راوایستلې او ویې نڅولې.
دا نن د مسلمانانو د دومره کثرت باوجود ذلت ځکه په برخه دی، چې د اسلامي اخوت جوهر یې پایمال کړی او له یو بل سره د کرکې او نفرت تر نهایي حده رسېدلي دي، زما باور دی چې که په سیمه کې د افغانستان په څېر دوه درې متفق، خو په ټکنالوجۍ سمبال هیوادونه درلودای، نن به په سیمه کې د ښکرورې امریکا راج او باج نه چلېدای، د هغه ښکر به دومره نه وو اوږد چې د یو مسلمان په لور یې ور کاږه کړي وای.
