که څه هم په نړیواله کچه د ښځو د جلب او جذب پروسه د هغو تنظیمونو تر منځ کمه تر سترګو کیږي، کوم چې له بېلابېلو هیوادونو سره د خپلو اهدافو پر سر په جګړه کې ښکېل دي، لیکن د داعشیانو زیات تمرکز بیا پر دې دی تر څو خپلو لیکو ته ښځې او ماشومان جذب کړي.
دا کار د داعش د افراطي دریځ او باطل منهج په پیاوړتیا کې ځانګړی رول لري چې موږ ورته په لاندې ټکو اشاره کوو.
۱:- د ښځو رول د جګړې او ملاتړ په ډګر کې؛
د ښځو جذبول د داعش لپاره دوه اړخیز اهمیت او ارزښت لري، لومړی ښځې د کورني ملاتړ، پخلي، درملنې او نورو غیر مستقیمو دندو لپاره کارول کېږي، چې د جنګیالیو د اړتیاوو د پوره کولو لپاره پوره پوره مرسته کوونکي ثابتېدلی شي، دوهم داعش ښځې هم جنګ ته هڅوي او په ځینو مواردو کې یې د ځانمرګو بریدونو لپاره روزي، د ښځو دا رول په دې ډلو کې نسبتاً نوی دی او په جګړه کې یې د دوی حضور نور هم زیات کړی دی.
۲:- د نسل پالنې لپاره د پلان جوړونې هڅه؛
داعش هڅه کوي تر څو ښځې او ځوانې نجونې د خپلو جنګیالیو سره واده کولو ته وهڅوي، دوی غواړي چې د داعش په باورونو روزل شوی نوی نسل منځته راوړي تر څو په آسانه توګه د دوی عقاید پر ځان ومني او د داعش لپاره یو اوږدمهاله قوت وګرځي، دا د داعش لپاره یو ډول “ایډیالوژیکي نسل پالنه” هم ده.
۳:- د نړيوالو پروپاګند او ترویج لپاره هڅې؛
داعش د ټولنیزو رسنیو او نورو تبلیغاتي وسیلو له لارې ښځې او ځوانان هڅوي تر څو له دوی سره یوځای شي، دوی هڅه کوي چې په دې توګه په نړيواله کچه خپل تبلیغ او نفوذ پراخ کړي او نړیوالو ته داسې انځور وړاندې کړي چې ګواکې دوی یو ځواکمن دولت دی چې ښځې، نارینه او ماشومان پکې په ګډه ژوند کوي.
۴:- د نظم او کنټرول لپاره د کورني ژوند د تاسیس هڅې؛
داعش په هغو سیمو کې چې تر ولکې لاندې یې راوستي دي، غواړي ځان د یوه “اسلامي دولت” په توګه وړاندې کړي، د دې لپاره دوی هڅه کوي کورنۍ جوړې کړي او په سیمه کې د عادي ژوند منظره رامنځته کړي.
د کورنیو جوړول او تنظیمول د دې لپاره یوه وسیله ده تر څو خلکو ته داسې انځور ورکړي چې دوی یوازې د جګړې ډله نه بلکي یو دولت دی چې کورنۍ ژوند هم پکې روان دی، ښځې د کورنیو په جوړښت کې کلیدي رول لوبوي او د ښځو جلب له دې اړخه هم دوی ته مهم دی.
۵:- د ځانمرګو بریدونو لپاره د ښځو کارول؛
داعش په ښځو د ځانمرګو بریدونو لپاره هم حساب کوي، ځکه په ډېرو کلتورونو کې ښځې امنیتي ځواکونو ته لږ شکمنې ښکاري او دا ډله هڅه کوي تر څو له ښځو څخه په تاکتیکي توګه ګټه پورته کړي، د ښځو په وسیله ځانمرګي بریدونه د دوی لپاره یوه د جګړې نوې تاکتیکي ستراتیژي ده، ځکه ښځې په اسانۍ سره هغه سیمو ته ننوځي چې نارینه جنګیالي یې نشي کولی.
۶:- د ښځو او ځوانانو لپاره د “شهادت” او “اتلولي” اډیالوژي کارول؛
داعش ښځو او ځوانانو ته داسې ویناوې او شعارونه وړاندې کوي چې په کې د “شهادت” او “اتلولۍ” د مفکورې تأکید شوی وي، دوی هڅه کوي تر څو دا باور پیاوړی کړي چې د دوی لپاره تر ټولو لوی بریالیتوب دا دی چې د دوی د “جګړې” په برخه کې خپله وینه ورکړي او د اسلام د دفاع لپاره ځان قرباني کړي، دا ډول مفکورې په ځانګړي ډول په هغو کسانو باندې ژر اغېز کوي چې له مذهبي عقایدو سره ژوره اړیکه لري او د قربانۍ او اتلولۍ احساس لري.
۷:- د ټولنیزو نابرابریو او اقتصادي ستونزو څخه ګټه اخیستل:
داعش په هغو ښځو او ځوانانو تمرکز کوي چې د فقر، بېکارۍ یا نورو اقتصادي او ټولنیزو ستونزو له امله له فشارونو سره مخ دي، دوی هڅه کوي چې دا ستونزې د ځان په ګټه وکاروي او خلکو ته داسې انځور ورکړي چې د داعش د “اسلامي دولت” تر سیوري لاندې به دوی ته عدالت، ژوند او کافي وسایل برابر شي.
په دې ډول، دوی هڅه کوي چې د اقتصادي محرومیت او ټولنیزو ستونزو څخه د خپلو سیاسي او جګړیزو موخو لپاره ګټه پورته کړي.
لنډه دا چې داعش ښځې او ماشومان د خپلو جنګي، تبلیغاتي او ایډیالوژیکي موخو لپاره د یوې وسیلې په توګه کاروي، د دوی هڅه دا ده چې د خپلو سخت دریځو نظریاتو له لارې راتلونکی نسل وروزي او د خپلو افراطي موخو د دوام لپاره یو اوږدمهاله بنسټ جوړ کړي، خو لله الحمد فلحال په دې کار کې هم له ماتې سره مخ دي.
