په منځني ختیځ کې له فبروري ۲۸، ۲۰۲۶ راهیسې د امریکا او اسرائیلو پر ایران مستقیم بریدونه، د ایران د ستر رهبر آیتالله علي خامنهيي او نورو لوړپوړو چارواکو وژل کېدل، د هرمز تنګي اغېزمن کيدل، په لبنان کې حزب الله سره جګړه او د خليجي هېوادونو انرژي تأسیساتو ته زیانونه، د مسلمانانو لپاره یو لوی عبرت او درس دی. په همدې وخت کې په افغانستان او پاکستان قبايلي سیمو کې وروستي سيلابونو (له مارچ راهیسې) لسګونه مسلمانان په شهادت رسولي، زرګونه کورنۍ بېځایه کړې او سلګونه کورونه یې ویجاړ کړي دي. دا دواړه پیښې، پوځي جګړه او طبيعي آفتونه، په ګډه یو ښکاره پیغام لري.
لومړی درس:
د مسلمانانو تر منځ تفرقه او اختلاف د ضعف لامل دی.
قرآن کریم فرمایي: «وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ» (انفال: ۴۶)
ترجمه: د الله تعالی او رسول الله صلی الله علیه وسلم اطاعت کوئ او په خپلو کې سره جګړه مه کوئ چې کمزوري نشئ او ستاسو ځواک له منځه لاړ نشي.
نن ورځ په منځني ختیځ کې د «مقاومت محور» شبکې ماته خوړلې، شیعه-سني اختلافات، عرب-غیر عرب سیالۍ او د هر هېواد لخوا خپلې ګټې لټول، دې تفرقې اسرائیلو او امریکا ته فرصت ورکړ چې یو په بل پسې په مسلمانانو بریدونه وکړي. درس دا دی چې مسلمانان باید یووالي ته راوګرځي، نه دا چې نيابتي جګړو او بهرنیو قدرتونو ته لاس ورکړي.
دوهم درس:
په منځني ختيځ کې وروستي تحولات ښيي چې ایران او د مقاومت محاذ (حزبالله، حوثیان او نور) د امریکا او اسرائیلو پر وړاندې په اسیمټریک (نامتوازن) جنګ سره بریالي دي. امریکا سره له ټولو بریدونو او ګواښونو نه ده توانېدلې چې ایران مات کړي. ایران د هرمز تنګي تړلو او سیمهییز ملګرو له لارې امریکايي اقتصاد ته لوړ لګښتونه زيان ورساوه او د هغې ستراتیژي یې ناکامه کړې.
مسلمانانو ته پکې مهم درس دا دی چې د یووالي او ګډ مقاومت ځواک لا پسې پراخ کړي. حتی چې کمزوری ښکاریدونکی مقاومت کولی شي قوي دښمن ته ماتې ورکړي، ځکه چې د اشغالګرو (امریکا او اسرائیل) پر وړاندې صبر، دفاع او غير مساوي جګړې تاکتیکونه بریالي دي او د امریکا “لوړ فشار” پالیسي په سیمه کې بیا ناکامه شوه.
دریم درس:
دایمي حل یوازې په توبه، اصلاح او مثبته ډیپلوماسۍ کې دی. پوځي بریدونه لنډمهالې بریا راوړي، خو نوې ستونزې ايجادوي. انساني لګښت (مرګ ژوبله، بېځایه کیدنه، اقتصادي بحران) ډېر دی. مسلمانانو ته درس دا دی چې باید له ظلم سره مبارزه وکړي، خو په عادلانه ډول او له اسلامي اصولو سره سم. د فلسطین مسئله، د سیمې ثبات او د مسلمانانو حقونه یوازې په یووالي، علم، اقتصادي پیاوړتیا او دعاګانو سره حل کېدی شي. نیک خلک باید امر بالمعروف او نهی عن المنکر وکړي، ترڅو ټوله ټولنه عذاب ته ونه ګرځي.
وروستۍ پایله او پیغام دا دی، چې دا روان ګړندي تحولات موږ ته ددې یادونه کوي چې مسلمانان د نړۍ تر ټولو لوی او باعزته امت دی، خو یوازې هغه وخت به عزت ولري چې له قرآن او سنت سره سم ژوند وکړي. «إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنفُسِهِمْ»(رعد: ۱۱) الله تعالی د هېڅ قوم حالت نه بدلوي تر هغې چې هغوی خپل ځانونه بدل نکړي.
نو زموږ فرض دی چې توبه وباسو، صالح اعمال وکړو، یووالي ته راوګرځو او له زيانمنو مسلمانانو سره بې لالچه مرسته وکړو. په افغانستان او قبايلي سيمو کې سيلاب ځپلو او په منځني ختیځ کې جګړه ځپلو ته له الله تعالی نه صبر، شفا او مرسته وغواړو. نو مسلمانانو! دا وخت د غفلت نه، د بیدارۍ او اصلاح وخت دی. الله پاک دې موږ ټولو ته توفیق راکړي چې له دې درسونو څخه ګټه واخلو او د اسلام عزت بیرته راولو. آمین یا رب العالمین.
