که داعش د یو وحشي او ترهګر خوځښت په توګه وپیژنو او ومنو چې په نړیواله، سیمه ییزه او د هیوادونو دننه، په ځانګړې توګه په آسیایي هیوادونو کې یې شتون اغیزه کړې، نو په طبیعي توګه باید ومنو چې په تیرو څو لسیزو کې هیڅ کومې ډلې یا خوځښت د دې ډلې په اندازه په ترهګریزو بریدونو او وحشت خورولو کې لاس نه درلود.
داعش ډله له هغه ځانګړي فکر سره چې د مبارزې میدان ته راغله، له هماغه ابتداء او زیږیدو سره یې څرګنده وه چې د مسلمان میشته هیوادونو ترمنځ د تفرقې اچولو په حال کې ده او دې قضیې ته لمن وهي چې څنګه کولای شي هغه اسلامي هیوادونه چې په وده کې دي، تباه او د بدو ورځو سره مخ کړي.
د داعش خوځښت په دې بیان سره چې په خپلو پروګرامونو کې یې له اسلامي شعایرو کار اخیست، په حقیقت کې د همدغو شعایرو د تباهۍ او له منځه وړلو لپاره رامنځته شوی و، په هغو هیوادونو کې چې د مسلمانانو مجاهدین او فکري او خوځښتي مبارزین په یو ډول د بریالیتوب په لور روان وو او د دوی څو کلنې هلې ځلې د ثمر ورکولو په حال کې وې او هغه تخم چې کرل شوی و، د ټوکیدو په حال کې و، په دغو سیمو کې د داعش په راڅرګندیدو سره ټول هغه مقدس پروګرامونه او اهداف چې پلان شوي او پلي شوي وو، له منځه لاړل او د ناکامۍ سره مخ شول.
ډیری مبارزین چې په مختلفو هیوادونو کې یې په ډیرو ښکلو پروګرامونو او ځانګړي نظم سره پلانونه جوړول او پلي کول، او په یو ډول د دوی طی شوې لاره مثبتو پایلو ته په رسیدو وه، د دې تور او پلید فکر په راڅرګندیدو او د دې وحشت خورونکې ډلې په واک ته رسیدو سره؛ ټولې هغه مقدسې هیلې او آرزوګانې له خاورو سره یو شوې او په بشپړ ډول له منځه لاړې.
په حقیقت کې داعش ډله د انارشۍ رامنځته کولو او د هغه نړۍ بې ثباته کولو لپاره رامنځته شوې وه چې د آرامۍ په لور روانه وه، او د وحشت خورولو پروګرامونو سره چې په ذهن کې یې درلودل او د پلي کولو په حال کې و، سیمه او نړۍ یې په څو اړخیزه بې ثباتۍ کې راګیره کړه.
په هغه نظم او نظام کې چې په کوچنیو هیوادونو یا د سیاسي علومو په اصطلاح / دریمې نړۍ کې رامنځته شوی و او د عصري کولو او په ځینو هیوادونو کې د بیا رغونې بهیر پیل شوی و؛ د داعش په شتون او شکل اخیستلو سره، بیا یې نړیوال زورواکي یا نړیوال مرکز پام یې ورته واړوه او د دې اهدافو له منځه وړلو لپاره هغه اقدامات چې د نړیوالو قوانینو له مخې یې دوی ته په دې سیمو کې د بدلونونو د رامنځته کولو واک ورکړی و، ترسره شول.
لوی هیوادونه یا مرکزي هیوادونه چې په حقیقت کې خپل ځانونه برتر او هژمونیک ځواک بولي او په یو ډول د نړیوال نظم اداره او مدیریت په دوی پورې اړه لري، هیڅکله د نورو هیوادونو د عصري کولو او ودې په بهیر خوښ او راضي ندي او نه به وي ځکه چې د دوی لپاره د شیدو ورکونکي غوا په څیر دي.
له همدې امله د داعش په څیر د خوځښتونو په پیاوړي کولو او زیږولو سره، د دې ډول هیوادونو د ودې او لوییدو د بهیر د سستولو یا له منځه وړلو لپاره، خپل اهداف د قدرت د مشرانو په توګه پلي کوي.
لوی هیوادونه چې په حقیقت کې سیمه عییز او نړیوال استعمارګران او استثمارګران دي، د خپلو جوړو شویو قوانینو له مخې په ډیرو وختونو کې نشي کولای په مستقیم او بې دلیله اقدامات په پرمختلونکي او ودې په حال کې هیوادونو باندې چې د طبیعي زیرمو څخه ډک دي، ترسره کړي.
له همدې امله په هغو سیمو کې د وحشت او ترهګرۍ په رامنځته کولو او د ډله ایزو رسنیو په کنټرول سره، د هغو سیمو خلک قانع کوي چې د سیمه ایزو او نړیوالو قدرتونو شتون د دوی په ګټه دی او د ترهګرۍ او وحشت له منځه وړلو لپاره په سیمه او د دوی په خاورو کې د دوی شتون اړین او لازمي دی او دا پخپله د داعش په څیر د ډلو پخپله جوړیدل څرګندوي چې د تخریب او وحشت په فکر کې دي.
په حقیقت کې اوس مهال مو ولیدل او وینو چې داعش څنګه د سیمهییز او نړیوال ثبات په له منځه وړلو کې د لویو قدرتونو لخوا له مخکې پلان شویو پروګرامونو سره سم د دوی په سیمه کې د شتون لپاره خپل رول لوبولی دی.
په ډیرو سیمو او خاورو کې د نړیوالو ځواکمنو او لویو هیوادونو شتون هیڅ توجیه نه درلوده او نه لري، خو د وحشت خورولو له امله چې داعش یې په دې هیوادونو کې خپروي، په یو ډول دوی د دې وحشت او ترهګرۍ د له منځه وړلو په پلمه په دې خاورو کې د خپل شتون اجازه ترلاسه کوي او په یو ډول د خپل شتون لپاره اجازه لیک صادروي.
په دې کې هیڅ شک نشته چې داعش د سیمهییزو قدرتونو او د دوی د استخباراتي لوبغاړو یوه جوړه شوې پدیده ده، خو باید په روښانه کولو او عیني دلایلو سره نړیوالو او په ځانګړې توګه د اسلامي هیوادونو خلکو ته څرګنده شي چې دا فکر هیڅکله د ثبات او دایمي نظم د رامنځته کولو لپاره نه دی راغلی او برعکس د سیمې او نړۍ د انارشۍ او بې ثباتۍ لپاره پلان او ډیزاین شوی دی.
د داعش لخوا ترسره شوي ترهګریز بریدونه په داخلي، سیمهییز او نړیواله کچه: سوریه، عراق، بروکسل، افغانستان، پاکستان، تاجیکستان، ایران، لندن او نور بریدونه
