د مسلمانانو بېکوره کول:
په تېرو برخو کې مو د داعشي خوارجو له لوري د اسلامي ښارونو د ویجاړولو په اړه مفصل بحث وکړ، خو دا سترې ورانۍ یوازې د ودانیو تر نړولو محدودې نهوې، بلکې د مسلمانانو د بېکوره کېدو او کډوالۍ لامل شوې.
د داعش خوارجو ناوړه حضور په عراق او شام کې پراخې بېکوري ته لاره هواره کړه؛ د شته معلوماتو له مخې، یوازې تر ۲۰۱۴ کال پورې، په شام کې شاوخوا ۷.۶ میلیونه او په عراق کې ۳.۳ میلیونه کسان د جګړو له امله بېکوره شوي و.
د مسلمانانو کډوالي اروپایي هېوادونو ته، د داعش خوارجو تر ټولو ستر خدمت خپلو بادارانو ته بلل کېږي، ځکه چې دا یو زهرجن دام و، چېرته چې عام مسلمانان د مسيحي تبلیغیانو او نورو فاسدو ادیانو د فریب ښکار شول.
هغه دعوتګر چې د کډوالو له ناورین څخه ناوړه استفاده کوي، خپل ټول وس کاروي چې بېکوره شوي مسلمانان له خپل دین څخه بېل کړي او تحریف شوی مسیحیت پرې ومني، د « داعش خوارج؛ د اسلام په وړاندې د لویدیځ نوې وسله» د مقالاتو د لړۍ په دې برخه کې به د مسلمانانو د بېکوره کېدو زیانونه او اروپایي هېوادونو ته د هغوی د هجرت ناوړه پایلې وڅېړو.
۱. د ایمان کمزوري کېدل او د کلتور بدلون:
ډېر کډوال داسې هېوادونو ته ولاړل چې هلته دیني ارزښتونه کمزوري دي او له همدې امله، یو شمېر خلک د غرب له کلتور څخه متأثر شول او له خپل دین او عقیدې لرې شول.
۲. اخلاقي او ټولنیزې ستونزې:
په داسې ټولنو کې ژوند کول چې نامحدود او بې کچې آزادي لري، په ځانګړې ډول د ځوان نسل لپاره، د اخلاقي فساد، بېهویتي او فحشا د خپرېدو لامل شو.
۳. رواني فشارونه او هویتي بحران:
په غیر اسلامي ټولنو کې د کډوالۍ ژوند، په ځانګړې توګه د ماشومانو او تنکیو ځوانانو لپاره، داسې هویتي بحران وزېږاوه چې هغوی یې د کورني اسلامي کلتور او بهرني چاپېریال ترمنځ ښکیل کړل.
۴. اقتصادي او ټولنیزې ستونزې:
ډېری کډوال له سختو اقتصادي شرایطو سره مخ دي، مناسب کار نه شي موندلی او کله ناکله د نامشروع کارونو یا د دولتي مرستو محتاج ګرځي.
۵. په راتلونکو نسلونو اغېزه:
هغه ماشومان چې د کډوالۍ په نتیجه کې د غیر اسلامي ټولنو په غېږ کې لویېږي، ډېر ژر خپل دیني ارزښتونه، ژبه او فرهنګي هویت هېروي او په پایله کې یې له اسلام سره اړیکه کمزورې کېږي.
په دې توګه، داعشي خوارجو د اسلامي ښارونو د ویجاړولو له لارې، د مسلمانانو د بېکوره کېدو سبب شول، هغوی یې د لوېدیځو هېوادونو پر لور وتلو ته اړ کړل او دا لاره یې ورته هواره کړه – یوه داسې لار چې انجام یې د دنیا او آخرت بربادي ده.
