د اسلامي امارت له واک ته رسېدو وروسته، لکه څنګه چې تمه کېده، د افغانستان په هر ګوټ کې د خوارجو ویجاړونکي ځالې له منځه یوړل شوې. د دې ډلې ټول غړي، له لوړپوړو قوماندانانو نیولې تر عادي کسانو پورې، د خپلو کړنو سزا ته ورسېدل او په بشپړ ډول منحل شول.
له هغې وروسته، د دې منفورې ډلې تخریبي فعالیتونه تر ډېره حده شنډ شول، خو بیا هم دوی وخت ناوخت بریدونه ترسره کول؛ هغه بریدونه چې یوه بنسټیزه پوښتنه یې راپورته کړه: اوس چې د داعش فتنه په افغانستان کې له منځه وړل شوې، د دې ډلې تر شا څوک ولاړ دي او څوک یې تمویلوي او افغانستان ته یې رالېږي؟
په لومړیو ورځو کې ښايي د دې پوښتنې ځواب موندل یو څه ستونزمن و، خو ورو ورو د داعش د دوکه شویو غړو په نیول کېدو او د هغوی د اعترافونو له مخې، یو پټ راز بربنډ شو او د خوارجو تمویل کوونکي نه یوازې د افغانستان، بلکې د ټولې نړۍ لپاره څرګند شول.
هو! د نیول شوو داعشیانو د اعترافونو له مخې، د دې ډلې غړي نه یوازې له افغانستان څخه بهر د پاکستان له لوري د هېواد ته لېږدول کېدل، بلکې افغانستان ته تر راتګ مخکې یې ټولې اړینې روزنې د پاکستاني پوځ او آیاېساې تر څارنې لاندې د افغانستان د ورانولو لپاره ترلاسه کولې.
د پاکستان او داعش د همکارۍ ادعا په لومړي سر کې د ځینو رسنیو له خوا مطرح شوه، خو کله چې پاکستان دغو ناوړه کړنو ته دوام ورکړ، اسلامي امارت په رسمي توګه پاکستان تورن کړ چې له داعش سره د افغانستان او نورو هېوادونو پر ضد د ویجاړونکو کړنو په ترسره کولو کې مرسته او تمویل کوي. دا ادعا که څه هم په پیل کې د پاکستاني چارواکو له خوا رد شوه، خو ډېر ژر یې د نهانکار وړ حقیقت بڼه غوره کړه.
څو موده وړاندې، کله چې پاکستان د افغانستان پر خاوره یرغل وکړ، خو د اسلامي امارت د زړورو سرتېرو له سخت غبرګون او تند انتقام سره مخ شو، نو له خپلې تېروتنې پښېمان شو او د اوربند غوښتنه یې وکړه. دغه اوربند د خبرو اترو لړۍ پیل کړه چې لومړی پړاو یې په قطر او دویم پړاو یې په ترکیه کې ترسره شو.
خو د اوربند له موضوع پرته، هغه څه چې د دې یادښت د بحث اصلي برخه جوړوي، د پاکستان له خوا د اسلامي امارت د استازو د منطقي او عاقلانه غوښتنې ردول دي؛ هغه غوښتنه چې له پاکستان څخه پکې غوښتل شوي چې له داعش خوارجو سره د ملاتړ او تمویل لړۍ بنده کړي. خو پاکستان په بشپړه بېشرمۍ سره دا غوښتنه رد کړه!
اوس پوښتنه دا ده، که داعش د پاکستان په خاوره کې ځاله نه لري او د آیاېسآی تر څارنې لاندې نه روزل کېږي، په داسې حال کې چې دا خبره د لمر په څېر روښانه ده، نو ولې یې د اسلامي امارت غوښتنه رد کړه او د خوارجو د شتون انکار یې ونه کړ؟
سربېره پر دې، د داعش د غړو او د هغې د لوړپوړو چارواکو د نامعلومو کسانو له خوا وژل کېدل هم د دې ادعا څرګند ثبوت دی. د بېلګې په توګه، نصرت نومی کس، د امیر محمد زوی، چې د ابوذر په نوم پېژندل کېده، د پاکستان په پېښور ښار کې ووژل شو. دا هماغه څوک و چې په ۲۰۲۲ او ۲۰۲۳ کلونو کې یې د کابل او ګاونډیو ولایتونو د ځینو بریدونو په پلان جوړولو کې برخه لرله او په پاکستان کې یې د «پهلوان» په نوم یو مهم مرکز رهبري کاوه.
په پایله کې، ټول شواهد او قراین څرګندوي چې د داعش د خوارجو ریښه او اصلي ساتنځای په پاکستان کې دی. دا هېواد د دې منفورې ډلې څخه د یوې وسیلې په توګه کار اخلي، څو د افغانستان، سیمې او نړۍ ثبات ګډوډ کړي او پر اسلامي امارت سیاسي فشار زیات کړي. دا د پاکستان هغه فریبکارانه تګلارې دي چې نه یوازې د افغانستان امنیت، بلکې د ټولې سیمې سوله او آرامي هم له ګواښ سره مخ کوي.
