د داعش د پراختیا او د دیني حلقو پر ضد یې د استعمال استراتیژي
لیکوال: عمر شهید
د اسلام دښمنو قوتونو له لوري د داعش د پروژې ایجاد د اسلام د بدنامۍ، د جهادي اجماع د ختمولو، د جهادي حرکتونو د مصروفولو، پر مسلمانانو د شا لخوا د ګوزار، پخپلو اسلافو او مشرانو د مسلمانانو د اعتماد د ختمولو لپاره ترسره شوی. اسلام دښمنو قوتونو له دې پروژې څخه په عراق، شام، لیبیا، یمن، صومال، افغانستان او د افریقا په لویه وچه کې د یادو اهدافو لپاره کار واخیست. اوس دا پروژه د اسلام دښمنو قوتونو نیابتي استخباراتي سازمانونو په لاس کې نیولې ده. د داعش د خراسان شاخه چې په افغانستان کې د یرغلګرو او د دوی د غلامانو پر ضد د سپېڅلي جهاد پر وړاندې د خنډونو د ایجاد لپاره ایجاد شوې وه، مطلوبه نتیجه یې ورنکړه. د شرعي نظام له حاکمیت د مخه او وروسته په افغانستان کې سخته وځپل شوه. اوس یې مرکزیت بلوچستان ته انتقال شوی او هلته د خوندي پټنځایونو د ایجاد زمینه ورته برابره شوې ده. په فعالیتونو یې تسامح او اغماض کېږي. په غیرمستقیمه توګه د اسلام دښمنو قوتونو د نیابتي استخباراتي سازمانونو له لوري هڅه کېږي چې ددې پروژې نفوذ ټولو قبایلي سیمو ته وغزول شي او تر څنګ یې د هر هغه چا په ضد ترې کار واخیستل شي چې له خپلو دست داشته وسایلو څخه په پاکستان کې د اسلامي مقدساتو، شعایرو، دیني مراکزو او اسلامي ثقافت د ساتنې او حمایې لپاره کار کوي.
د داعش د پروژې په لومړۍ درجه اهدافو کې د دیوبندي فکر او مسلک اړوند دیني علماء کرام او مدرسې قرار لري. همدغه راز د جمیعت علمای اسلام چې په پاکستان کې د دیوبندي فکر او مسلک د اکثرو علماؤ ملاتړ ورسره دی، د داعشیانو د لومړۍ درجې اهدافو څخه دي. جمیعت علمای اسلام هغه واحد تنظیم وو چې په تېرو شلو کلونو کې یې د یرغلګرو په خلاف د جهاد ملاتړ او حمایت کاوه. په تېرو څو میاشتو کې په باجوړ او بلوچستان کې د دوی په تجمعاتو له وحشي خونړیو بریدونو وروسته چې پکې سلګونه دیني علماء کرام، د مدرسو طلاب او عام مصلح مسلمانان په وینو کې ولمبېدل، اوس د دیني علماء کرامو او د جمیعت د مخکښو شخصیتونو هدفي وژنو ته داعشیانو مخه کړې. د جنوبي وزیرستان په واڼه کې په مولوي میرزا جان باندې برید چې د جمیعت علمای اسلام د جنوبي وزیرستان پخوانی مشر او یو سیمه ایز عالم وو، د داعشیانو وروستی برید دی چې ترسره کېږي او نوموړی پکې په شهادت رسېږي. له دې برید څخه معلومېږي چې داعشیانو ته کرار کرار په قبایلي سیمو کې نفوذ ورکول کېږي او هر هغه څوک به د داعشي پروژې د اهدافو په نوملړ کې وي چې له دیوبندي فکر او مسلک سره اړه ولري او د شریعت د انفاذ ناره پورته کوي.
ألمرصاد چې کوم اطلاعات له خپلو سرچینو څخه ترلاسه کړي، د داعشیانو د نفوذ پراخول او د دوی په توسط د دیوبندي فکر او مسلک مربوط دیني علماء کرامو هدفي قتلونه د اسلام دښمنو قوتونو نوې استراتیژي ده چې غواړي د خپلو نیابتي استخباراتي سازمانونو په توسط یې پیاده کړي او هغوی ددې استراتیژۍ په تطبیق کې د داعشیانو د خراسان له څانګې څخه چې مرکزیت یې بلوچستان ته انتقال شوی او په واک کې ورکول شي، کار اخلي؛ او کېدای شي په نږدې راتلونکي کې ددې استراتیژۍ له مخې د دیوبندي فکر په علماؤ، مدرسو او تجمعاتو ورته زیات بریدونه ترسره شي. له همدې امله د دیوبندي فکر او مسلک علماء کرام، طلباء کرام او مدارس دې نوي دسیسې ته توجه وکړي، د داعشي پروژې د امحاء لپاره فکري او دعوتي کار وکړي او په عامو مسلمانانو کې په دې اړه عمومي ویښتیا وهڅوي او پیدا یې کړي.