داعش خوارج؛ د اسلام پر وړاندې د لوېدیځ نوې وسله! نهمه برخه

احسان عرب

د مسلمانانو وینې تویول

د اسلامي امت پر وړاندې د داعش خوارجو یو بل ستر جنايت، چې د کفري نړۍ په استازولۍ یې تر سره کاوه، د بې‌ګناه مسلمانانو وینې تویول و، چې د باطلو او پوچو پلمو پر بنسټ یې وژل.

د خوارجو په اند د مسلمان وینې هېڅ ارزښت نه درلود، برعکس د دوی لپاره تر ټولو سپک شی و، هغوی به د عجیبو او ناسمو تورونو په پلمه، پرته له دې چې د الله جل‌جلاله له عذابه ووېرېږي، بې‌شمېره مسلمانان له منځه وړل.

حال دا چې د اسلام سپېڅلي شریعت د مسلمان وینه تر کعبې شریفې هم مقدسه ګڼلې، لکه څنګه چې رسول الله صلی‌الله‌علیه‌وسلم مکې ته خطاب کوي او فرمایي:

“مَا أَطْيَبَكِ وَأَطْيَبَ رِيحَكِ، مَا أَعْظَمَكِ وَأَعْظَمَ حُرْمَتَكِ، وَالَّذِي نَفْسُ مُحَمَّدٍ بِيَدِهِ، لَحُرْمَةُ الْمُؤْمِنِ أَعْظَمُ عِنْدَ اللَّهِ حُرْمَةً مِنْكِ، مَالِهِ وَدَمِهِ، وَأَنْ نَظُنَّ بِهِ إِلَّا خَيْرًا.”

(ابن ماجه، حدیث ۳۹۳۲)

ژباړه: ” ته څومره پاکه یې! ستا بوی څومره خوشبو دی، ته څومره ستره یې او ستا حرمت څومره لوی دی!

خو قسم په هغه ذات چې د محمد صلی‌الله‌علیه‌وسلم نفس د هغه په لاس کې دی، د مؤمن حرمت د الله جل‌جلاله په نزد تر تا هم لوی دی، هم د هغه مال او هم د هغه وینه او دا چې باید د هغه په اړه یوازې نیک ګومان وشي.”

هو! د یوه مسلمان وینه تر کعبې مطهرې هم مقدسه ده، خو څومره بې‌شمېره مسلمانان وو، چې د داعش خوارجو په لاس ووژل شول او آن تر دې چې د کفر نړۍ سره یې د مسلمانانو په وژنه سیالي کوله.

بې‌بنسټه تکفیر، چې د خوارجو یو اساسي ځانګړنه ګڼل کېږي، د داعش تر ولکې لاندې سیمو کې دومره ژور نفوذ کړی و چې د هرې وړې مذهبي تېروتنې په صورت کې به یې یو مسلمان ته د ارتداد حکم ورکاوه او بیا به یې بې‌درېغه سر له تنې ترې پرې کولو.

کله چې د خوارجو د ظلمونو کړۍ راتنګه شوه او دوی ورځ تر بلې خپلې نیول شوې سیمې له لاسه ورکولې، نو د خپلو اشغال شویو سیمو اوسېدونکي یې د انساني سپر په توګه کارول او له خپلو سیمو څخه یې د خلکو د وتلو مخنیوی کاوه.

دا ټول د داسې ډلې له‌خوا ترسره کېدل، چې د خپلو تبلیغاتي ویډیوګانو له لارې یې ځانونه د امت مدافعین بلل او ادعا یې کوله چې دوی د مسلمانانو ساتنه کوي، په هغه وخت کې یې د خلکو د تېښتې د مخنیوي لپاره بېلابېل اقدامات کړي و.

د ځینو سیمو پر وتلو لارو یې امنیتي پوستې جوړې کړې او هر هغه کس چې د داعش له ولکې د وتلو نیت درلود، په بې‌رحمۍ سره یې په ډزو ویشته، ځینې وختونه به یې هغه مسلمانان، چې د خپلې عقیدې او ژوند د ژغورلو لپاره د دوی تر ولکې سیمو څخه وتل، په عام محضر کې اعدامول. آن کله نا کله به یې نښه ویشتونکي د دې لپاره ګومارل چې د تېښتې پر مهال تلونکي خلګ ووژني.

خو دا د دوی د وحشت وروستی حد نه و، د تېښتې ځینې لارې یې په ماینونو فرش کړې، څو هر هغه څوک چې د دوی له واک څخه ځان خلاصوي، په مرګ اخته کړي، دا بربریت په داسې حال کې روان و، چې د خوارجو ځان‌ساخته خلیفه، ابوبکر البغدادي، له خپلو جعلي سرحدونو بهر، د سوریې د ادلب ښار د باریشا په سیمه کې، چې هغه مهال د تحریرالشام تر ولکې لاندې وه، ووژل شو.

Exit mobile version