د راپورونو له مخې د ۱۴۰۴ کال د جدي میاشتې په دریمه نېټه د چهارشنبې په ورځ د إیران په پلازمینه تهران ښار امام حسین ساحه کې په قومندان اکرام الدین سریع او ورسره همکارانو باندې یې برید ترسره شو؛ په برید کې نوموړی له یو بل قومندان الماس سره ووژل شو او یو تن همکار یې ټپي شو.
په اصطلاح د احمد مسعود مقاومت ډلې او ځینو نورو فراري شخصیتونو سمدستي إدعا وکړه، چې دا قتل د إسلامي إمارت امنیتي ارګانونو له لوري ترسره شوی، دا چې دومره په سرعت ولې د إسلامي إمارت امنیتي ارګانونه په دې قتل متهم شول او دغه معلومات څنګه په دومره چټکۍ سره ترلاسه او تبلیغ شول؟ ګڼې پوښتنې یې را ولاړې کړې.
په إیران کې د ځینو سرچینو له قوله قوماندان إکرام الدین سریع د إیران د إنقلاب ساتونکي ځواک د انصار له قرار ګاه سره د افغانستان د تیر جمهوریت د دور د نظامي افسرانو د چارو په برخه کې کار کول او د هغوی د ميل مطابق یې استخدامول او تنظیمول، چې په دې وروستیو کې ورته(مشابه) إستخباراتي پروژه د پاکستان د إستخبارتي سرویس (ای اس ای ) له لوري هم پېل شوې ده او له ( ای اس ای ) سره په دې برخه کې جنرال عبدالمتین حسین خیل او جنرال جرئت همکاري کوي او غواړي چې د جمهوریت د وخت نظامي او امنیتي جنرالان او افسران پاکستان ته دعوت او له ( ای اس ای ) سره یې تنظیم او إنسجام ترسره کړي او د افغانستان د أمنیت د إخلال او قبایلي مهاجرینو په برخه کې د جاسوسۍ لپاره کار ترې واخلي، خو قوماندان اکرام الدین سریع نه غوښتل، چې په ایران او نورو هېوادونو کې میشت مخکیني جنرالان او افسران پاکستان ته لاړ شي، دا چې ولې یې نه غوښتل مختلف لاملونه یې درلودل.
په هر صورت د پاکستان د إستخباراتي سرویس (ای اس ای) د هلو ځلو پر وړاندې قوماندان إکرام الدین سریع ستر خنډ و له همدې امله یې د جنرال جرئت او جنرال عبدالمتین په توسط هڅه پيل کړې وه، چې قومندان سریع یا له ستونزو جوړولو لاس په سر کړي او یا قومندان سریع له مخې لیرې کړي.
ډېرې سرچینې دا تائیدوي، چې د قوماندان إکرام الدین د قتل تر شا د پاکستان د إستخباراتي سرویس (ای ایس ای) لاس و او د دې لپاره چې د پړې ګوته افغانستان ته ونیول شي پاکستان له مخکې څخه ممکن يو لړ تېرایستونکي تدابیر نیولي وي، همدا لامل و، چې پاکستان ته په دې وروستیو کې تللو او راغلو فراري اشخاصو فوراً د پړې ګوته افغانستان ته ونیوله.
د افغانستان په حکومت کې یوې سرچینې المرصاد ته تائید کړې، چې دغه برید د قوماندان إکرام الدین سریع او احمد مسعود په ډله کې د ځينو هغو کسانو له لوري ترسره شوی، چې له إکرام الدین سریع او د ده له ملګرو سره یې إختلاف درلود، دې سرچینې زیاته کړې، چې د افغانستان إسلامي إمارت هیڅ بیرون مرزي برنامه نه لري، نه یې د إشغال پر وړاندې په شل کلنه مبارزه کې په بهر کې خپل کوم مخالف ترور کړی او نه اوس داسې کومه إراده لري. د افغانستان إسلامي إمارت د عمومي عفوې عملي کولو ته ژمن دی او که هر څوک د خپل ژوند په بهر کې په خطر کې ویني افغانستان ته راتللی او خوندی ژوند کولای شي.
سرچینې زیاته کړې، چې په مشهد کې په غلام معروف باندې ترسره شوی برید هم د جاوید په نوم د یو کس له لوري چې د هرات ولایت د کوهسان ولسوالی اوسیدونکی دی ترسره کړی و، جاوید د احمد مسعود د ډلې غړی او په افغانستان کې د نارنجک اچولو په دریو پېښو کې ښکېل او دوه قتلونه یې ترسره کړي، همدارنګه په زیاتو اختطافونو او سرقتونو کې یې هم لاس درلود. په ۱۴۰۱ کال د دلوې په ۲۵ مه نيټه یې د (احمد سديس) په نوم د اهل تشیع یو ځوان اختطاف کړی و او د نوموړي له کورنۍ يې د احمد سديس د خلاصون په بدل کې د يو لک امريکايي ډالرو غوښتنه کوله، يادو اختطافچيانو احمد سديس د یوه کور په حمام کې ساتلی و، چې وروسته د إسلامي إمارت د امنیتي ارګانونو د عملیاتو په نتیجه کې (احمد سديس) نامی د دوی له منګولو ازاد او د نويد په نوم د جاوید یو ورور ووژل شو او خپله جاوید إیران هېواد ته فرار کړی و او هلته پټ و. تحلیل دا ده؛ چې جاوید نامي غلام معروف (مشهور په معروف لنګ) د خپلمنځي اختلافاتو له وجې وژلی.
سرچینه زیاتوي چې دوی د تهران او مشهد د قتلونو په اړه تحقیقات پیل کړي او په نږدې راتلونکې که به د تهران او مشهد د قتلونو په اړه د خپلو تحقیقاتو پایلې د نوموړو مقتولینو له کورنیو او رسنیو سره شریکې کړي.
د پاکستان استخباراتي سرويس ( ای اس ای ) په بیرون کې د مخکیني نظام د قوماندانانو تر منځ د نفاق اچونې لړۍ په تیزۍ پیل کړې. د روان ۱۴۰۴ کال د قوس مياشتې په ۲۳ مه نيټه د کندهار ولایت د تیر جمهوریت د وخت ځینې قوماندانانو تر منځ چې په إیران هېواد کې اوسیږي د خپلمنځي اختلافاتو د شدت په نتیجه کې سخت فزیکي برخورد رامنځته شوی و، چې یو لوری یې قوماندان هاشم ریګوال، قومندان عصمت او قومندان مصطفیٰ وو او بل لوری یې د جنرال رازق کورنۍ ته وفادار قوماندانان سراج، رحیم الله خان او بسم الله وو؛ په دې برخورد کې له چاقو ګانو او دې ته ورته نورو آسېب رسوونکو وسایلو څخه استفاده شوې او هڅه شوې تر څو رحیم الله خان او ورسره ملګري یې ووژل شي، د دې برخورد په نتیجه کې قوماندان رحیم الله خان د هاشم ریګوال له لوري سخت ټپي شو.
راپورونه ښيې چې قوماندان هاشم ریګوال د خپل يو نږدې ملګري ( قومندان ولي جان) له لارې چې په کويټه کې استوګن دی د پاکستان د استخباراتي سرویس (ای اېس ای) سره ژورې اړیکې جوړې کړې او له بلې خوا په دې وروستیو کې د جنرال رازق کورنۍ د پاکستان غوښتنو ته منفي ځواب ویلی. تحلیل دا دی؛ چې د قومندان رحیم الله د ترور هڅه ځکه شوې چې دوی د پاکستان غوښتنو ته مثبت ځواب نه دی ویلی.
سربیره پر دې ( ای اس ای ) د خپلو هڅو په دوام کوښښ کړی و او کوي یې، تر څو د خپل استخباراتي سرویس د پروژه یې اشخاصو په توسط د افغانستان له خاورې په إیران هېواد کې يو لړ تخریبي کړنې ترسره کړي او د إیران او افغانستان تر منځ اړیکي ترینګلې کړي او په تهران کې د قومندان سریع ترور او پراخه تبلیغات یوه بله موخه هم د إیران او افغانستان تر منځ د بې باورۍ رامنځته کول دي.
