فایز افغان
د نفاق جبهې مشر احمد مسعود د افغانستان له اسلامي امارت سره په جګړه کې له اسرائیلو څخه د مرستې غوښتنه وکړه.
احمد مسعود وايي: موږ د اسراییلو په ګډون د هر هغه چا مرستې ته اړتیا لرو چې زموږ ملاتړ کوي.
د مقاومت د جبهې مشر د سه شنبې په ورځ له اورشلم پوسټ ورځپاڼې سره په مرکه کښې وویل چې دغه جبهه د طالبانو په خلاف د مقاومت د یوې مهمې ډلې په توګه له اسرائیلو سره د سیمه ایزې سولې په پلان کښې همکارۍ ته چمتو ده او همدا راز د طالبانو پر خلاف د یهودي دولت مرسته او ملاتړ مني.
د تاریخي شواهدو له مخې نه یوازې دا چې احمد شاه مسعود او د ده کورنۍ د افغانستان د مظلوم ملت لپاره د ملي هویت او ارزښتناکو خدمتونو کوم ثبوت نه دی لرلی، بلکې هره ورځ، میاشت او کال چې تېرېږي، د دوی د غیر ملي کړنو په اړه نوي اسناد او شواهد را بر سیره کیږي. له نیواکګر شوروي سره د جګړې په ډګر کې پروتوکولونه، د کورنۍ جګړې پر مهال کابل کې د بشریت پر ضد جنایتونه، له غربي اشغالګرانو سره د افغانستان د اشغال په برخه کې مرسته، د هیواد د تجزیې او ټوټه کولو شومي هڅې او د افغان کړیدلي ولس پر ضد د بشریت دښمن (اسرایلو ) ته د سوال لاس اوږدول د دې کورنۍ ملي ضد څېره بربنډوي.
آخوا ته داسې راپورونه هم شته چې د منافقت جبهې په افغانستان کې له داعش خوارجو سره تفاهم ته رسیدلي چې مصارف به موږ درکوو، خو بشری قوه به تاسو جوړوئ.
همدا رنګه د ابو حنظله ظریف جوانمرد په نوم د خراساني خوارجو د یو پلوي کس چې ځان دعوتګر بولي، یو تقریر به مو اوریدلی وي، چې په ډاګه د مقاومت جبهې په نوم د باغیانو په ملاتړ غږیږي او د اسلامي امارت پر وړاندې د دې جنګي ډلګۍ جګړه ستايي.
په تقریر کې جوانمرد پر باغي ډلې ”افرین“ او ”نوش جان“ وايي، خپل ”وروڼه“ یې بولي او وايي د دې باغیانو جنګ که څه هم د ”غیر الله او فرانسې لپاره“ دی، خو بیا هم په لمانځه کې دعاوې ورته کوم.
د تش په نامه مقاومتي جبهې د مشر له ملي ضد هڅو څخه نتیجه اخلو چې دی غواړي په هر قیمت وي، په افغانستان کې د سولې او ثبات مخه ونیسي، خو دې کم عقله رهبر او د ده ړوندو ملاتړو ته په زغرده وایو چي په افغانستان کې ستاسو بریا خوب دی، خیال دی او جنون.
عاقبت گرگ زاده گرگ شود
گرچه با آدمی بزرگ شود
