تېره ورځ د داعشي فتنو د افشا کولو په لړ کې، د تحقيقاتو ستر مرکز المرصاد يوه ويډيو نشر کړه، چې د يوه داعشي لخوا پکې د داعش او د پاکستان د استخباراتي کړیو (ISI) ترمنځ د پټو او ژورو اړیکو یو لړزوونکی داستان نغښتی و. د سرچينو په وينا، ياده ويډيو د هغو ادعاوو لپاره يو قوي سند دی، چې پکې ويل کېږي: چې د داعش تبلیغاتي او عملیاتي ماشین اوس په بشپړ ډول د پاکستان له جغرافیې څخه اداره کېږي.
په دغه خپره شوې ویډیو کې یو نیول شوی داعشي، محمد اقبال د شامدار زوی چې د کرمې ایجنسۍ اصلي اوسېدونکی دی، د یوې داسې لوبې حقایق رابرسېره کوي چې د اسلام او جهاد په نوم د سیمې د تباهۍ لپاره روانه ده. نوموړی په ياده ويډيو کې اعتراف کوي او وايي، چې زه یو خپل نږدې ملګري د ISI له یوه لوړپوړي مشر سره مخامخ کړم؛ هغه ماته په ډاډه زړه وویل چې د خلافت مشري، تمویل او د ټولو اړوندو چارو مدیریت زما په ذمه دی، ته یوازې عمل ته مټې راونغاړه.
دا اعتراف یوازې د اقبال اعتراف نه دی، بلکې د یوې داسې ستراتیژۍ افشا کېدل دي چې ښیي داعش په سیمه کې هیڅ خپلواک هویت نه لري، بلکې د راولپنډۍ په پوځي مراکزو کې روزل کېږي او د ای ایس ای تر مستقیمې څارنې لاندې افغانستان او نورو سیمو ته د تخریبي فعالیتونو لپاره استول کېږي. د محمد اقبال د اعترافاتو تر ټولو ټکان ورکوونکې برخه هغه ده چې وایي دغه پاکستاني جنرال ده ته د “تصفيې ورقه” ورکړه. چې همدې ورقې اقبال ته دا صلاحیت او خوندیتوب ورکاوه چې په ټول پاکستان کې پرته له کومې وېرې او خنډه تګ راتګ وکړي او د خپلو شومو پلانونو لپاره اکمالات او تنظیمات بشپړ کړي.
دا په دې مانا ده چې د پاکستان په قلمرو کې داعشي خوارج نه یوازې دا چې تر فشار لاندې نه دي، بلکې د پوځي رژیم د میلمنو او وسلو په څېر تر ځانګړې پاملرنې لاندې ساتل کېږي. د داعش او پاکستاني استخباراتو ترمنځ دا ژور پیوند دا ثابتوي چې دوی په سیمه کې د ناامنۍ او فکري خلا د رامنځته کولو لپاره یوه ګډه او همغږې ستراتیژي پر مخ وړي. د همدې اړیکو او د استخباراتي لارښوونو په استناد ویلی شو چې د شیخ الحديث مولانا محمد ادریس په څېر د جیدو، باخبره او حقپالو علماوو ترور د همدې خونړۍ پروژې یوه اساسي برخه ده.
دوی پوهېږي چې د حق غږ او د علم ډېوه د دوی د استخباراتي پروژو په وړاندې تر ټولو لوی خنډ دی، نو ځکه یې د سیمې د بې برخې کولو لپاره خپلې مټې رانغښتې دي.
دا او دې ته ورته نور بې شمېره شواهد چې وخت نا وخت د المرصاد لخوا رسنیز کېږي، دا حقیقت د لمر په څېر روښانه کوي چې داعش یوه بې ريښې، بې فکره او تپل شوې ډله ده. دوی نه فکري ازادي لري او نه د تصمیم نیولو استقلال؛ بلکې دا ډله د پاکستاني استخباراتو په لاس کې یوازې یوه پراکسي وسيله ده. چې پاکستاني جنرالان خپله دغه نيابتي ډله د سيمې او نړۍ د بې ثباته کولو لپاره کاروي. ترڅو په منځني ختيځ او شاوخوا نورو هيوادونو کې د قوي او باثباته نظامونو مخه ونیسي.
د دې ګټې ترڅنګ، د نړیوالو د پام را اړولو لپاره يې هم کاروي، ترڅو نړیوالو ته وښیي چې سیمه د افراطیت په اور کې سوځي او پاکستان د دې اور په مړ کولو کې یوازینۍ لوبغاړی دی. د المرصاد وروستۍ ویډیو د داعش د کاذب “خلافت” پر تابوت وروستی میخ وواهه. دا ثابته شوه چې د داعش په نامه د هرې حملې تر شا، د راولپنډۍ د جنرالانو لاس او د ISI لارښوونه شتون لري. د سیمې د ثبات او د ولسونو د ارامۍ لپاره اړینه ده چې دا استخباراتي پروژه په فکري او نظامي لحاظ په بشپړه توګه وځپل شي.
